Zwâŋ 21 - Myēnj phōn mí Zɛɛ̄mb

Yésus ɛ́ ɛ́ túula óphōn ɓɛ̄ ɓɛ̌ mwɔ̄ŋ jembe

¹ Phúla ték ɛ́, Yésus ɛ ɓúzī ɓākā sula óphōn ɓɛ̄ ɓɛ̌ mwɔ̌ŋ jembě khandǎ Tiɓelyâɗ. Sá ték yā thaŋ ɗêk.

² Nɛ Símɔn Pyɛ̂ɛ, nɛ Tómas ɓɛ́ jōō nāá, Ɛgbás ɔ, nɛ Natanaɛ́l mot khanda Kána gūm nɛ pák ɓwǎs Galilé ɔ, nɛ ɓwán ō mí Zeɓeɗe, zī kā nwɔŋ ɓɛ̄l óphōn ōɓá o mí Yésus, ɓā ɓɛ ɓyɛ̂ɛsa pyaāt gwát.

³ Símɔn Pyɛ̂ɛ ɛ ɓúzī lɛ́ɛ́ nɛ ɓot ō ndɔŋ yɛ̄ nāá: «Mi í kɛ̄ sá gba mɛ́ɗyūū.» Ɓɔ̂ɔ nɛ Pyɛ̂ɛ nāá: «Nī tɔ́ ka.» Ɓá nɛ nɔ̄ɔ̄ ɓɛ̄ ɓúzī tɔ̂, ɓɛ̄ kálɔ̄ɔ̄ ɓyɛ̂l. Sá gwát tí ŋgúmǎ pum ték wɛ̂ɛsa, ɓá a dô sínɔŋ.

⁴ Tɛ́m mɛ́lyám kā lyâmla ékɛ́, í ɓyela Yésus náǎŋ tí mbyōk. Sá gwát ɛ́, ophōn ɓɛ̄ ɓá a jwok ɛ.

⁵ Yésus ɛ ɓúkā jí nɛ nɔ̄ɔ̄ nāá: «Ɓyá a dó ósû, ɓwán ɓâm?» Ɓɔ̂ɔ nɛ Yésus nāá: «Yāā!»

⁶ Nyɛ nɛ nɔ̄ɔ̄ nāá: «Guská phūndā yēn ɓɛ pák mbɔ́ ɛ́dóm ɓyɛ̂l, ɓyá á dô.» Ɓɛ ɓúkā zī gǔs phūndā tí mɛɗyūū. Tɛ́m ɓɛ́ kā sáŋ ɛ́ɗul ékɛ́, yá a kā ɓánda, nɛ dɔ nāá, yā ɓɛ í í lwónd ósû.

⁷ Phōn Yésus ā ɓɛ tí kpɛl ɛ́ ɔ́kɛ́, ɛ ɓúzī lɛ́ɛ́ Pyɛ̂ɛ nāá: «Mot ɔ́kɛ́, í Ɗá Yésus.» Ɗɛ Símɔn Pyɛ̂ɛ ā gwôk nāá, í Ɗá Yésus ékɛ́, ɛ ɓúzī swǎm kānd kó wɛ̄. Nɛ dɔ nāá, ā ɓɛ ɓet títoōk, ɛ só nól tí mɛɗyūū.

⁸ Ɓɛ̄l óphōn ō ɓā lîs ɓák ɛ́, ɓɛ ɓúzī ɓúla nɛ ɓyɛ́l ɓɛ pák cīnd nɛ ɛɗiɗǔl phūndā nɛ osú ték ɛ́kēŋ. Ɓá a ceta nɛ cīnd. Pāká nyɔ̄ɔ̄ nɛ cīnd ɛ́, í i dala kum omɛ́ta thyet ɗyaāŋ.

⁹ Tɛ́m ɓɛ kɛ̄ kǔm ɓɛ cīnd ékɛ́, ɓɛ́ ɓyela sû kɛlā kwóó ɗú nɛ mwâpha.

¹⁰ Yésus nɛ nɔ̄ɔ̄ nāá: «Thāāká nɛ ɓɛ̄l ósû o ɓí dō ɓâk.»

¹¹ Símɔn Pyɛ̂ɛ ɛ ɓúzī kalɔɔ tí ɓyɛ̂l, ɛ ɗúl phūndā lwōndlā nɛ osú ō ɓáánénén ɓɛ̄ íɓwaās. Osú ōték ɓā ɓɛ thyet nɛ mɛkām mɛ̄tɛ́n nɛ ōlɛ̂l. Phūndā ta kat tí thūnd ósú ɓīnɛ́ɛ̌ŋ.

¹² Yésus ɛ ɓúkā lɛ́ɛ́ nɛ nɔ̄ɔ̄ nāá: «Thā ɗɛkâ.» Mot ŋgwát tí ndɔŋ wɔ̄ɔ̄ ta kā tūŋ jí ɛ̄ nāá: «Í wɔ zɛ̄ e?» Nɛ dɔ nāá, ɓā ɓɛ tí gú nāá, ī Ɗá Yésus.

¹³ Yésus ɛ ɓúzī jémbǎ ɓɛ yɔ̄ɔ̄, ɛ́ nwɔ́ŋ mwâpha nɛ sû ɛ káá ɓɛ̂.

¹⁴ Yā ɓɛ í í sá kɛnd lɛ́l Yésus tí ɛsula óphōn ɓɛ̄, phúla ɛpas lɛ̄ ê.

Yésus ɓá nɛ Pyɛ̂ɛ

¹⁵ Phúla ɓā sîl ɛɗɛ ékɛ́, Yésus ɛ ɓúzī jí nɛ Símɔn Pyɛ̂ɛ nāá: «Símɔn mwán mí Zwâŋ, u tí kpɛl mɛ́ ī tháŋ ɗakɛ ɓót o ndɔŋ yɔ́ ɓák kpɛ́l mɛ́ ékɛ́?» Pyɛ̂ɛ nɛ nɛ̄ nāá: «Ɛ̂ɛŋ Ɗâ, wā ā jōk nāá, mi tí kpɛl ɔ̂.» Yésus ɛ ɓúkā lɛ́ɛ́ nɛ nɛ̄ nāá: «Gū jüák mɛ́ itaa ɓyâm.»

¹⁶ Ɛ ɓákā jí ɛ́ kɛnd mbá: «Símɔn mwán mí Zwâŋ, u tí kpɛl mɛ́ ê?» Pyɛ̂ɛ nāá: «Ɛ̂ɛŋ Ɗâ, wā ā jōk nāá, mi tí kpɛl ɔ̂.» Nyɛ nɛ Pyɛ̂ɛ nāá: «Gū jüák mɛ́ itaa ɓyâm.»

¹⁷ Ɛ ɓákā jí ɛ́ kɛnd lɛ̂l: «Símɔn mwán mí Zwâŋ, u tí kpɛl mɛ́ ê?» Sā ték í ɓúzī nyɛl ɛ́thés Pyɛ̂ɛ tɔɔ̄p nāá, Yésus ɛ́ ɛ́ ɓākā jí ɛ́ kɛnd lɛ́l nāá: «U tí kpɛl mɛ̄ ê?» Pyɛ̂ɛ ɛ ɓúzī ɓɛ́s nɛ nɛ nāá: «Ɛ̂ɛŋ Ɗâ, wɔ wā ā jōk sínɔŋ. U tí gú nāá, mi tí kpɛl ɔ̂!» Yésus nɛ nɛ̄ nāá: «Gū jüāk mɛ̄ itaa ɓyâm.

¹⁸ Tí oceece e, tɛ́m wā ɓɛ mgbānj ékɛ́, wɔ mot ték wā lilyembɛl mbaāmb wɔ́ tí kuū, u tɔ̄ pyaāt yɛ̂ɛs ú kám ê. Tɛ́m ú wā kā ɓɛ̌ ndoōmb ékɛ́, wá á ɓén mɛ́ɓɔ́, nɔ̄l mót süís ɛ ká zí lyembɛl ɔ́ wá, ɛ tɔ̄ nɛ nɔ̌ pyaāt ú ɗí ta kpɛl ê.»

¹⁹ Yésus ā lɛ́ɛ sá ték tí ɛlyákɛ̌l ɗɛ Pyɛ̂ɛ wā jüe e, tí nāá, ɗín ɛ̄ Zɛ́mb lá á nwɔŋ kûm. Phúla ték ɛ́, nyɛ nɛ Pyɛ̂ɛ nāá: «Ɗū mɛ̂!»

Yésus ɓá nɛ phōn ā ɓɛ tí kpɛl ɔ̂

²⁰ Pyɛ̂ɛ ɛ ɓúzī lyuŋg, ɛ ɓɛɛ phōn Yésus ā ɓɛ tí kpɛl ɔ́kɛ́, phús mikɔŋ myɔ̄ɔ̄. Í phōn ték ā jémba ndumɛ nɛ Yésus tɛ́m ɓā ɓɛ tí ɛɗɛ é, ɛ jī nɛ nɛ̄ nāá: «Ɗâ, mot wā ɓɔ́ma ɔ́ ɔ́kɛ́, í zɛ̄ ɔ̂?»

²¹ Ɗɛ Pyɛ̂ɛ ā ɓɛɛ phōn ték ékɛ́, ɛ ɓúzī jí nɛ Yésus nāá: «Ɗâ, á nyɛ nâk, yɛ̄ wā kúl nyɛ́ ê?»

²² Yésus ɛ ɓúzī ɓɛ́s nɛ nɛ̄ nāá: «Mí lɛ̄ɛ̄ nāá, má á ɓyét ɛ́, ɛ cyúk ī kɛ́ kum tɛ́m mí wā ɓākā zye é nâk, í jüāk ɔ́ wɛ̄? Wɔ̄ ɗū mɛ̂.»

²³ Tí lɔ́ŋ ték ɛ́, pɔ́ nyā ɓɛ nyí í nyaman pāká oɓúkɛl nāá, phōn mí Yésus ték ɛ́, á a kā jüe. Ɓyela nāá, Yésus nyɛ ā lɛ́ɛ yɛ̄ nāá: «Mí lɛ̄ɛ̄ nāá, ɛ ɗí ta jüe ī kɛ́ kum tɛ́m mí wā ɓākā zye é nâk, í jüāk ɔ́ wɛ̄?»

²⁴ Í phōn ŋgwát nɛ ŋgwát ték ɗí tí ɛtɔ́ nɛ ɛlɛ́ɛ́ ɗɛ ísá ī ték ɓyā ɓa thaŋ e, ɛ tíl thɔ́k ɓyɛ̄ ê. Thɔ́k ɛ́, zyɔ̂ɔ zī tí gú nāá, lɔ́ŋ wɛ̄ ú oceece.

Ɛgɔleēl

²⁵ Yésus ɛ́ ɛ ɓaka sâ ɓīl ísínɔŋ ɛ́ɓuuɓu. Isá ī ték ɓyɛ̂ɛs ɓī tílaa til é nâk, phú yá a kā ɓɛ nɛ pyaāt tí sī ɗí nāá, ɓá á gbá ókhuu o mɛ́kanā mɛ̄ték ê.