Misāwā 1 - Myēnj phōn mí Zɛɛ̄mb

Ikɛs ɓī Áchāāchǎnj Sisîmb

¹ Tíofîl. Twóó khuu mɛkanā mɛ̄ ɛ́sɔ́k mā til ɔ mák ɛ́, mí i syɛɛ isá ɓyɛ̂ɛs Yésus ā sá nɛ ɛlyákɛl tát tí mɛnyɛɛ̄l mɛ̄ ísɛ̄ɛ̄ ɓyɛ̄ ékɛ́,

² i kúm tí mwēs Zɛ́mb ā ɓén ɛ ɓɛ̌ jwóó ê. Ā ɓɛ ɛ́ ɛ́ tɔ́p ɓót ɗɛ mílwōmtwōm. Ɛ lɛ̄ɛ̄ ɓɛ́ sá ɓɛ́ dálā ɛ́sá ékɛ́, tí khul Áchāāchǎnj Sisîmb.

³ Phúla ɛsüee nɛ ɛgbal lɛ̄ ɛ́vit lɛ̄, ɛ́ ɛ lyákɛl nól ɓɛ mílwōmtwōm myɛ̄ tí mimbi mi mítɛ̄lā myɛ̂ɛsa ɛ́kpɛŋlɛm tí nāá, ɓá á gú nāá, ɛ tí ɛcyuk. Táŋ mɛlú mɛkám mɛ̄nâ, ā ɓɛ tí ɛsula ɓɛ́ nɛ ɛlyákɛl ɓɛ́ isá i ɗúm nɛ Də́ə́ mí Zɛɛ̄mb ê.

⁴ Tí wūl mwēs Yésus ɓá nɛ milwōmtwōm myɛ̄ ɓā ɓɛ tí ɛɗēē ékɛ́, ɛ ɓúzī lɛ́ɛ́ nɛ nɔ̄ɔ̄ nāá: «Ɓyá a gbɔ́m twóó khandǎ Yotósalɛm. Sá gwát ɛ́, ɗiká náǎŋ ɓī ɓwōnd íkɛs i sāŋg waām á lɛ́ɛ ɓěn ɓîk, mā lɛ́ɛ nāá:

⁵ “Zwáŋ á á ɗuu nɛ mɛɗyūū, sá gwát ɓyɔ̂ɔ tí ɓīɓyɔ̄k mɛ́lu, Zɛɛ̄mb á á ɗuu ɓén twóó Áchāāchǎnj Sisîmb.”»

Yésus ɛ́ ɛ́ jwǒŋ ɓɛ̌ jwôo

⁶ Ɗakɛ Yésus ɓá nɛ ophōn ɓɛ̄ ɓá ɓɛ ɓɛ̄ jína náǎŋ ɓá nɛ ɓɔɔ nɔ̄ɔ̄ pyaāt gwát ékɛ́, ɓɛ̄ ɓúzī jí ɛ́ nāá: «Ɗâ, wá á jüe ɓwán ɓɛ̄ Ízaɛ́l də́ə́ tí yɔ́ɔ́ tɛ́m?»

⁷ Ɛ ɓúzī ɓɛ́s nɛ nɔ̄ɔ̄ nāá: «Ɓyɔ̂ɔ ɓyā ā dálā nɛ ɛgú ítɛ́m nɛ mɛwolo mɛ sǎŋg waām á tɛ̂l tí də́ə́ yɛ̄ nyɛ̄ mot ték ê.

⁸ Sá gwát ɛ́, Áchāāchǎnj Sisímb á á sul ɓén tí mɛnôl, ɓi ɓyé khúl tí nāá, ɓyá á lɛ́ɛ́ ɓot sá ɓí ɗí tí gú tí tɔɔ̄p wám twóó khandǎ Yotósalɛm ɛ́, nɛ twóó cǐl ɓwǎs Yuɗé yɛ̂ɛsa, nɛ Samalí ī kɛ́ kum tí sī mipák mīnâ.»

⁹ Phúla Yésus ā síl ɛlüii ékɛ́, Zɛ̌mb ɛ ɓúzī nwɔ̂ŋ ɛ́, ɛ tɔ̄ nɛ nɛ̄ ɓɛ ɛ́kó tí mís mɛ̄ mílwōmtwōm. Tɛ́m ā ɓɛ tí ɛtɔ́ ékɛ́, juūnd ī ɓúzī zye ī zí ɓúmɛl ɛ́, ɓɔ̂ɔ ta kā ɓɛɛ ɛ́.

¹⁰ Ɗɛ mís mɔ̄ɔ̄ mā ɓɛ mɛ̄ jína tí ɛjwák jwóó tɛ́m Yésus ā ɓɛ tí ɛtɔ́ ékɛ́, ɓɛ́ dā sɔka ɓótóm ōɓá nɛ mikānd mi ápuupúm ndumɛ nɛ nɔ̄ɔ̄.

¹¹ Ɓot oték ɓɛ̄ ɓúzī lɛ́ɛ́ nɛ milwōmtwōm nāá: «Ɓot ō Galilê, ɓí ɗi náǎŋ tí ɛsisyuŋgɛ̌l jwóó tí yɛ́ e? Yésus Zɛ̌mb ɗüis ɛ́ pāká nyēn tí ɛtɔ́ nɛ nɛ̄ ɓɛ jwóó ɔ́kɛ́, á á ɓākā zyě jwok gwát ɗɛ ɓí ɓā ɓɛɛ ɛ́ tí ɛtɔ́ ê.»

Mɛjila mí Yúɗas

¹² Milwōmtwōm ɓɛ̄ ɓúkɛ̄ ɓúlǎ ɓɛ ɛ́cók ɛ̄ mɛ́suk mɛ̄ olîv, ɓɛ̄ zyē ɓɛ̌ Yotósalɛm. Yá a ɓu ceta, yā ɓɛ nɔŋ ŋgwát ɗyaāŋ.

¹³ Ɗɛ ɓā kɛ kum ɓɛ̌ Yotósalɛm ékɛ́, ɓɛ̄ ɓúzī jwoŋ, ɓɛ̄ nī twóó wūl kwōŋ njāā kó gúmɛ ɓā gigwêsla tɛ́m yɛ̂ɛs ê. Yā ɓɛ nɛ Pyɛ̂ɛ nɛ Zwâŋ, nɛ Zwâk, nɛ Ándéa, nɛ Fílíp, nɛ Tómas, nɛ Ɓaatelemî, nɛ Matyôos, nɛ Zwák mwán mí Alfê, nɛ Símɔn mot ɗākɔ̄ɔ̄ ɛ kúl yɛ̄, nɛ Yûɗ mwán mí Zwâk.

¹⁴ Ɓɛ́ ɓyɛ̂ɛs ɓā ɓɛ tɛ́m yɛ̂ɛs cyǔŋ inɔɔ̄n tí mindakla ɓá nɛ ɓɛ̄l ɓúá nɛ Malía naāŋg mí Yésus kā zī nwɔŋ ɓwán ɓɛ̄ ónaāŋg o mí Yésus.

¹⁵ Tí mwēs ték ɛ́, ɓot o mí Yésus ɓā ɓɛ ɓɛ́ ɛ́ gwêsla ɓɛ̄ kúm ɓót thyet nɛ mɛkām mɛ̄mbá ɗyaāŋ. Pyɛ̂ɛ ɛ ɓúzī gbal pāká nyɔ̄ɔ̄ nyɛ nāá:

¹⁶ «Ɓwán ɓɛ̄ ónaāŋg ɓâm, yá á je nāá, sá Áchāāchǎnj Sisímb ā lɛ́ɛ twóó Mɛkanā mɛ̄ Zɛ́mb ékɛ́, ī lwónd ê. Áchāāchǎnj Sisímb ték ɛ́ ɛ lüii tɔɔ̄p mí Yúɗas tí nup mí Ɗávit. Í Yúɗas ték ā ɓɛ ɗɛ mɛphūk nɛ mɛkha tí ɛsú ɛ ɓɛ̄l ō ɓā mɛ̂t Yésus ɓâk.

¹⁷ A a ɓɛ lwōmtwōm ɗɛ zyɔ̂ɔ. Zá nɛ ɓɔɔ nɔ̄ɔ̄ za ɓɛ nɛ ló-sɛ̄ɛ̄ ŋgwát.

¹⁸ Mɔnī ɓā dána ɛ tí mɛtwes ā sâ mák ɛ́, ā kɛ ɓwâm pyěmb nɛ yɛ̂. Ɛ ɓúzī ɗuma nɛ mo, mo u ɓôl, minda mi sâ ɛ́pōtōpōtō.

¹⁹ Ɓot ō Yotósalɛm ɓyɛ̂ɛs ɓɛ̄ ɓúzī gwôk lɔ́ŋ têk, ɓɔ̂ɔ thɔ́ dǒt pyeēmb ték ɗín tí lüii yɔ̄ɔ̄ nāá, “Akɛldáma” i tian nāá, pyeēmb chía.

²⁰ Í sá gwát nɛ gwát ték Ɗávit ā lɛ́ɛ tí yīl dā yɛ̄ nāá: “Í je nāá, njāā wɛ̄ ū lîs pund, mot ta ɗi têk.” Ɛ ɓú ɓākā lɛ́ɛ́ thɔ́k nāá: “Nɔ̄l mót süís ɛ́ ɛ́ zī jila tí pyaāt ísɛ̄ɛ̄ ɓyɛ̄.”

²¹ Í nɛ ɓotóm ná nɛ nɔ̄ɔ̄ nā ɓiɓɛka ndɔŋ, tí tɛ́m yɛ̂ɛs Ɗá Yésus ā kikɛ nɛ kányīnā ê.

²² Tí ɛnyɛl tí tɛ́m Zwáŋ ā ɗuu Yésus ékɛ́, ī kɛ́ kum tí tɛ́m Zɛ́mb ā ɗüis ɛ tí iɓwaās ê. Í je nāá, nī tɔ̂pkana mot ŋgwát tí ndɔŋ wɔ̄ɔ̄. Í zyeē nāá, mot ték á á lɛ́ɛ́ thɔ́k tɔɔ̄p ɛ́pas ɛ mí Yésus ɗɛ zyɔ̂ɔ.»

²³ Ɓɛ̄ ɓúzī kǎm lüii mí Pyɛ̂ɛ. Ɓɛ̄ tɛl ɓótóm ōɓá: Nɛ Yósɛp ɓɛ́ jóó ɛ́ nāá, Ɓaasáɓas ɔ̂. Līl ɗín lɛ̄ lí nāá, Yústus ɓá nɛ Matías.

²⁴ Phúla ték ɛ́, gós yɛ̂ɛs ī ɓúzī dakla, ɓɔ̂ɔ nāá: «Ɗâ, wā ā jōk sá yɛ̂ɛs ɗí tí lyém mót ê. Ɓā lyákɛl ɓés nɔ̄l ú tɔ̄p ɛ́ tí ɓot oɓá ɓák ɔ̂.

²⁵ Tí nāá, á á ɗǐ lwōmtwōm tí ɛjila tí pyaāt Yúɗas ā lyúk ɛ kɛ́ ɓyelǎ pyaāt dálā nɛ nɛ̄ ê.»

²⁶ Ɓɛ̄ ɓúzī sá ánupmísul. Ánupmísul ték ɛ ɓú ɗuma tí ló mí Matías. Ɓɛ̄ ɓúzī nwɔŋ ɛ́, ɓɛ̄ gbā ɛ́ tí ndɔŋ milwōmtwōm kām nɛ ŋgwát.