Lomɛ̂ 7 - Myēnj phōn mí Zɛɛ̄mb

Ɛnwɔ̌ŋ ɓwoŋa nɛ ɛɓâ

¹ Ɓwán ɓɛ̄ ónaāŋg ɓâm, mā ā jōk nāá, ɓī mú tí gú sá mí wā lɛ́ɛ́ ɓén ɗék ê. Nɛ dɔ nāá, ɓyā ā jōk sínɔŋ tí tɔɔ̄p lɔ́a. Lɔ́a í nɛ də́ə́ tí mot ɛ́, tɛ́m yɛ̂ɛs mót ték jína tí ɛcyuk ê.

² Nī ɓá a nwɔŋká ɓwoŋa nɛ mumá ɗí tí ɛɓá ɔ̂. Lɔ́a í lɛ̄ɛ̄ nāá, tɛ́m yɛ̂ɛs ndóm jína tí ɛcyuk ékɛ́, ā ā dálā nɛ ɛɓɛ́sa nɛ nɛ̄. Sá gwát ndóm ɛ́ wā jüe nâk, mumá ték ɛ́ ɛ́ ɗüis tí lɔ́a ɓɛ̄ tí ɛmɛ́t ɛ́ nāá, a a ɓɛ́sa nɛ ndóm ê.

³ Mumá ték ɛ́ wā ɓá nɔ̄l mótôm, gú thɔ́k ɛsā ɛ́ɓá nɛ nɔ̄l mótóm ndóm tí ɛcyuk nák ɛ́, ɛ́ ɛ́ sá ɛ́kɔnd. Sá gwát ndóm ɛ́ jüē nák, lɔ́a yá ǎ kā mɛ́t ɛ̂. Náǎŋ ɛ́, ɛ nɛ khul ɛ kā tɔ́ ɛ́ɓá ɛsüís ɓɛ ɗáá nɔ̄l mótóm, ta kā jówaa nāá, mumá ɛkɔnd.

⁴ Í thɔ́k ɗyāaŋ tí mɛsú mēn ɓwán ɓɛ̄ ónaāŋg ɓâm. Lɔ́a yā ā ká də́ə́ ɓén nɛ dɔ nāá, tɛ́m Kūmāndē Zɛ́mb ā kɛs ɔ́, ā jüe tí kolos ékɛ́, ɓyɔ̂ɔ ɓot o ɗí lɛt nɛ nɛ̄ ɓák ɛ́, ɓí í jüe thɔ́k tí sá jüāk lɔ́a ê. Ɛ́chāak ɛ́, ɓī mú tí də́ə́ nɔ̄l mót süîs. Mot ték í nɔ̄l ā pas pāká mimúŋ tí nāá, ná á gúm ká phuūm tí ɛsú ɛ̄ mí Zɛɛ̄mb ɔ̂.

⁵ Tí oceece, tɛ́m nā ɓɛ nyī jína cyuk ká ɗakɛ nyɔ̂ɔ ká ɓot oték kpɛ́l ékɛ́, lɔ́a yā ɓɛ í í sá nāá, minjeā mī mísɛ̄m mī nwɔ̂ŋ khul twóó mɛnól mɛ̄ kámīnā, i zyē, ná á gúm ká phuūm kɛ́nd ɓót ɓɛ ɛ́süee nyîk.

⁶ Sá gwát ɛ́chāak ɛ́, lɔ́a yá a ká ɓɛ nɛ yīl də́ə́ zinjá kányīnā. Nɛ dɔ nāá, Zɛɛ̄mb ɛ́ ɛ́ sá nāá, nī ɗí ka ɗakɛ mímúŋ tí sá mimɛ̄t ɓot okwōm ê. Nī mú nɛ khul ɛkā sálaká Zɛɛ̄mb tí tɛ̄lǎ myēnj, tí də́ə́ Áchāāchǎnj Sisîmb. Ta ka ɓɛ tel ɗɛ nā nyee sisálaká nyɛ tí də́ə́ yīl ɗí tilā tí lɔ́a ê.

Tɔɔ̄p lɔ́a nɛ tɔ̌p sɛ̄m

⁷ Í ɓɛ̄ nāá í ɗyaāŋ nâk, ná á lɛ́ɛ́ ká phɛ̄ nā? Lɔ́a í sɛ̄m ɛ́? Yāā yá a ɓɛ̄ ɗyáŋ. Tí oceece, ī ɓɛ̄ nāá, lɔ́a yá a lɛ́ɛ mɛ nāá, ɛgómb sá mót í sɛ̄m nâk, phú ma a gū nāá, ɛgómb sá mót í sɛ̄m.

⁸ Ɗɛ̌ sɛ̄m wā zi kalɔɔ tí sá lɔ́a yā lɛ́ɛ ékɛ́, ī ɓúzī sá mɛ́ nāá, mi gômb isínɔŋ mimbi mimbi. Nɛ dɔ nāá, ī ɓɛ̄ ta ɓɛ nɛ lɔ́a nâk, phú sɛ̄m wá a ɓɛ̄.

⁹ Tɛ́m mā ɓɛ tɛ́m ɛsɔ́k ta gú lɔ́a ékɛ́, mā ɓɛ tí ɛcyuk. Sá gwát ɗɛ mɛ́tyuūŋ mā zi kûl ékɛ́, cyǔk sɛ̄m ī ɓúzī nyɛl.

¹⁰ Náǎŋ ɛ́, myam mí í jüe. Mɛtyuūŋ mā ɓɛ nāá, mɛ̄ kɛ́nd mɛ ɓɛ̌ cyuk mák ɛ́, mɛ̄ dá kā kɛnd mɛ́ ɓɛ ɛ́süee.

¹¹ Nɛ dɔ nāá, sɛ̄m ú ú dā kalɔɔ tí lɔ́a tí ɛkwóŋ mɛ́, ū kɛ́nd mɛ́ ɓɛ ɛ́süee.

¹² Ɗyaāŋ ték nák, lɔ́a í ɛ́chāāchānj, mɛtyuūŋ tí chánjɔɔ, mɛ́ ɛ́dalâ, mɛ̄ thɔ́k tí nwɔŋ.

¹³ Í kam ɛ́tian phɛ̄ nāá, sá ɗí tí nwɔŋ é, í í zye mɛ́ nɛ ɛsüee ɛ́? Yāā! Yá a ɓɛ̄ ɗyáŋ. Sá gwát, í sɛ̄m ték ɓɛlǎ nɛ tyaa sínɔŋ tí nāá, ū zyé mɛ nɛ ɛsüee. Í ɗyaāŋ lɔ́a sā nāá, nī gú ka ɗɛ̌ sɛ̄m ɗí nɛ thūnd khúl ū tháŋ ísínɔŋ ɓyɛ̂ɛs ê.

Mot tí də́ə́ sɛ̄m

¹⁴ Nā ā jōk ká nāá, lɔ́a í ɗüǐs ɓɛ ɗá mí Zɛɛ̄mb. Sá gwát myam mi mot ipûnd, mi mú mbwāmā ɗakɛ̌ kwǒm sɛ̄m.

¹⁵ Tí oceece, mā ā gwōk sá mí ɗí tí ɛsa ê. Nɛ dɔ nāá, yīl mí kpɛ́l ɛ́sá ékɛ́, mā ā sā yɛ̂. Sá gwát í yīl mí ɗí ta kpɛl ɛ́sá ékɛ́, mí sá ê.

¹⁶ Mí sā sá mí ɗí ta kpɛl ɛ́sá é nâk, náǎŋ ī tí ɛlyákɛl nāá, mí í kam nāá, lɔ́a ī tí nwɔŋ.

¹⁷ Ɗyaāŋ ték ɛ́, tɛ́m mí sā ɗyáŋ ékɛ́, yá a ɓɛ̄ myám ɗí tí ɛsâ, í sɛ̄m ɗí twóó myam ékɛ́, ɗí tí ɛsá nāá, mi sâ ɗyaāŋ.

¹⁸ Mi tí gú nāá, twóó myam, mí kam ɛ́lɛ́ɛ́ tí nól ípúnd mí ɗí ték ékɛ́, nāá, ma a ɓɛ̄ nɛ lyém ɛ́sá ɛ́nwɔŋ. Í kǔ ceece nāá, mi nɛ njeā nāá, mi sâ ɛnwɔŋ, sá gwát khul ɛsá nyá a ɓɛ̄.

¹⁹ Nɛ dɔ nāá, tɛ́m mí kpɛ́l ɛ́sá ɛ́nwɔŋ ékɛ́, mā ā sā lɛ̂. Sá gwát ɛɓyôo ɛ̄ mí ɗí ta kpɛl ɛ́sá lík ɛ́, lɛ́ mí dā sá ê.

²⁰ Í ɓɛ̄ phɛ̄ nāá, mí sā yīl ɗí nāá, mā ā kpɛ́l é nâk, pha yá a ká ɓɛ myám ɗí tí ɛsá sá têk, í sɛ̄m ɗí twóó myam ékɛ́ ɗí tí ɛtínd mɛ̂.

²¹ Í ɗyaāŋ sá ték mú mɛ ɗɛ ŋgúma lɔ́a ê. Lɔ́a ték í nāá, tɛ́m mí kpɛ́l ɛ́sá ɛ́nwɔŋ ékɛ́, mí dākā sûkla ɛ́sá ɛ́ɓyôo.

²² Nɛ dɔ nāá, twóó lyém wám ɛ́, mi tí kpɛl lɔ́a mí Zɛɛ̄mb.

²³ Sá gwát mi tí ɛɓɛɛ nāá, í nɛ ŋgúmǎ lɔ́a ɗí twóó nôl nyaām tí ɛlûmla nɛ sá pek yám ɓɛ́ɛ́ nāá, ī tí nwɔŋ ê. Lɔ́a ték ī tí ɛsá nāá, sɛ̄m ɗí twóó myam ékɛ́, ū gbā mɛ́ tí mbok.

²⁴ Á khɔ̌ŋ nɛ naām é ê, zɛ̄ wā zī ɗüis mɛ́ tí nól ɛsüee nyík ē?

²⁵ Mimyaŋla nɛ Zɛɛ̄mb, nyɛ mot wā zī tii mɛ́, ɛ tháŋ tí kɔŋ mí Yésus Kilís Ɗá káwūnā ɔ̂. Nák ɛ́, mi tí ɛɗúɛl lɔ́a mí Zɛ̌mb nɛ pek yâm. Sá gwát, tí ípúnd ɓyám ɛ́, mí ɗūɛ̄l lɔ́ǎ sɛ̄m.