Lomɛ̂ 13 - Myēnj phōn mí Zɛɛ̄mb

Ɗūū zinjá miŋgɔ́mina

¹ Mot nyɛ̂ɛs ɛ́ dalǎ nɛ ɛɗúɛl míŋgɔ́mina mi ɗí tí də́ə́ mîk. Nɛ dɔ nāá, də́ə́ ŋgɔ́mina yɛ̂ɛs í jüǐs ɓɛ ɗá mí Zɛɛ̄mb. Thɔ́k ɛ́, Zɛɛ̄mb ā tɛ̂l miŋgɔ́mina myɛ̂ɛs mi ɗí ti də́ə́ mîk.

² Í yɛ́ ɗí nāá, ɓot o lūmlā nɛ ŋgɔ́mina ɓák ɛ́, ɓɛ́ lūmlā nɛ sá Zɛ́mb ā tɛ́l ê. Ɓɛ̄l ō ɗí ta kam ɛ́ɗúɛl ŋgɔ́mina ɓák ɛ́, ɓá á sá nāá, ɓɛ̄ pɔ́nɛs ɓɛ.

³ Tí oceece, mot ā ā dálā ɛ́gwók ɓwɔ̄ŋ nɛ míŋgɔ́mina tɛ́m ɛ́sā sá ɛ́nwɔŋ ê. Sá gwát ɛ́, mǒt gwōk ɓwɔ̄ŋ nɛ míŋgɔ́mina tɛ́m ɛ́ sá ɛ́ɓyóó ê. Í ɓɛ̄ nāá, u tí ɛkpɛl ɛ́ ɗi ta gwók ɓwɔ̄ŋ nɛ miŋgɔ́mina nák ɛ́, sā phɛ̄ ɛnwɔŋ, i zyē á á lɛ́ɛ́ nāá, u tyaa mot.

⁴ Nɛ dɔ nāá, ŋgɔ́mina ɛ tí ɛsú lɛ̄ ɛ́sála Zɛ́mb tí nāá, á á jüe mót khul ɛsá ɛ́nwɔŋ. Sá gwát, ú sā ɛ́ɓyóó nâk, gwók ɓwɔ̄ŋ nɛ nɛ̄. Nɛ dɔ nāá, ɛ nɛ də́ə́ ɛ́pɔ́nɛs ɓôt. Ɗə́ə́ yɛ̄ ték yá a ɓɛ̄ títoōk. Tɛ́m ŋgɔ́mina pɔ̄nɛ̄s ɓót ékɛ́, ɛ tí isɛ̄ɛ̄ ī mí Zɛɛ̄mb, ɛ tí ɛlyákɛl ɛ́ɓūk ɛ̄ mí Zɛ̌mb zinjá ɓot o sâ ɛ́ɓyóó ɓâk.

⁵ Í yɛ́ ɗí nɛ nɔm nāá, mot ɛ ɗúɛl míŋgɔ́mina ê, ta dā ɓɛ tí ɛsú lɛ̄ ɛ́pemba ɛ́ɓūk ɛ̄ mí Zɛɛ̄mb lɛ́ nɛ lɛ́, sá gwát nɛ dɔ nāá, mwáályém ɛ tí ɛje nāá, nī sá ka ɗyaāŋ.

⁶ Í yɛ́ thɔ́k ɓí dānā lapó ê, nɛ dɔ nāá, ɓot o nwɔ́ŋ ímɔnī ílapó ɓâk ɛ́, í Zɛɛ̄mb ā jüe ɓɛ ló-sɛ̄ɛ̄ ték nāá ɓɛ̄ gbâ milyém tí ɛsála wɛ̂.

⁷ Jüēká ákɛl yɛ́ sá ɓí dálā ɛ́jüe ɛ́ ê. Dānāká lapó nɛ mot ilapó, ɓi dānā tíkɛ̄t, nɛ mot itíkêt, ɓī jüe mót dálā nɛ ɗūū ɔ́, ɗūū, ɓi jüe mot dála nɛ kúm ɔ̂, kûm.

Ɛkpɛl mót nyɛ̂ɛs

⁸ Ɓyá a ɗi nɛ tolós mót phúla tolós kpɛɛ̄l ɓí dálā ɛ́ɗi nɛ yɛ́ pāká nyēn ê. Nɛ dɔ nāá, nɔ̄l kpɛ́l ɓót ō ndɔŋ yɛ̄ ɔ́kɛ́, ɛ́ ɛ́ ɗúɛl lɔ́a yɛ̂ɛsa.

⁹ Tí oceece, mɛtyuūŋ mɛ́ lɛ̄ɛ̄ nāá: «Wa a gús ɛ́kɔnd, wa a dó môt, wa a jyûu, wa a gómb sá môt», zī ká nwɔŋ mɛ̄l myɛ̂ɛsa, mɛ́ dā gwêsla tí ɛtyuūŋ ɛgwát ɗí tí ɛlɛ́ɛ́ nāá: «Kpɛɛ̄l môt ndɔŋ yɔ́ ɗɛ ú kpɛ́l wɔ́ mot ték ê.»

¹⁰ Nɔ̄l ɗí nɛ kpɛl ɔ́kɛ́, ā ā sā môt ndɔŋ yɛ̄ ɛɓyôo. Tɛ́m mót kpɛ́l môt ndɔŋ yɛ̄ ékɛ́, ɛ́ ɛ́ ɗúɛl lɔ́a yɛ̂ɛsa.

Ɛɗǐ kwomsā tí ɛ́zye ɛ mbá ɛ̄ Kūmāndē Zɛ́mb ā kɛs ɔ̂

¹¹ Ɓi tí gú tɛ́m ní mú ka ték ê. Ī mú tí tɛ́m ɛjem tí idɔ́ ɓyēn! Tí ɛgū ɓɛɛ ɛ́, mwēs Zɛ́mb wā zī cis ɓót úkɛ́, ú ú kúnɔɔ nɛ kányīnā ɛ́chāak, ī tháŋ ɗakɛ tɛ́m nā ɓɛ ná a lwɔ̂ɔ ɓûkla ká ê.

¹² Pum ú ú ɓū nyûŋgla, mwēs ú ú kúnɔɔ, nī myâs ka iɓyǒla ɓī ísīsɛ̄ɛ̄ ɗí tí ɛsɛ́ɛ́ tí khɔmwaāl ê, nī nwɔ́ŋ ká isá ī ɗɔ́mb ɓɛ́ ɓɛ́lā nɛ ɓyɛ́ tí ɛɓyakɔɔ ɓîk.

¹³ Nī kɛ́ ka ɛ́dalá ɗakɛ ɓɛ́ kɛ̄ tí mwēs ê. Ná a thaŋgɛl ká ɛɗēē lɛ̄ íɗóó nɛ mɛnɔk, mot a a sá mɔlā nɛ mumá gú motóm ɗí ta ɓɛ wɛ̄ ɔ̂, nɛ ɛsá ósapâk, nɛ mɛgɔ́ya, nɛ ɓyǒlǎ lyêm.

¹⁴ Ɓaŋaká cyuk mí Ɗá Yésus Kilîs. Ta kā ɓākā ɓyét nāá, iɓyǒla i mínjeā myēn ɓī kɛ̂nd ɓěn ɓɛ ɛ́ɓyôo.