Lókas 3 - Myēnj phōn mí Zɛɛ̄mb

Tūnd mí Zwáŋ mɛɗuu-ɓot

^1-2 Tɛ́m Zɛ́mb ā lüii nɛ Zwáŋ mwán mí Zakalí ɓɛ̌ sɔ̄sā sī ékɛ́, Tiɓɛ̂ɛ ánénén kūmāndē ā ɓɛ ɛ́ ɛ́ sá mímbú kām nɛ mītɛ́n, nyɛ tí ɛdə́ə́ njés kánda ilomɛ̂. Pɔ́ŋs Pilát ā ɓɛ ndə́ə́ tí pák ɓwǎs Yuɗé twóó kanda ŋgwát nɛ ŋgwát têk. Elôd Aŋtípas, nyɛ ɛ də̄ə̄ pák ɓwǎs Galilé Fílíp, tōl mí Elôd ɛ də̄ə̄ Itulé nɛ Talakonîɗ. Lizanyás ɛ də̄ə̄ Aɓilɛ̂n. Án nɛ Kaíf, ɓɔ̂ɔ ɓā ɓɛ ífata i mɛ́tûnka i ɓáánénên.

³ Zwáŋ ɛ ɓú titɔ́ dala mípák mī ɓwǎs ɗyūū ɓɛ̄ jóó nāá, Yuuɗɛ́n ê. Ɛ ɓú nyɛl ɛ́lɛ́ɛ́ nɛ ɓot nāá: «Ɓot ɓâk! Sāŋká nāá, ɓī ɗúwa. I zyē yá á nyén nāá, ɓí í cénj ícyuk ɓyēn. Í náǎŋ Zɛ́mb wā ju ɓén misɛ̄m myēn ê.»

⁴ Í ɗyaāŋ ték ɗí í í sɛ́ɛ́ ɗakɛ ɓá ɗǐ tilā tí mɛkanā mí mgbɛ́sel mitɔɔ̄p mí Zɛɛ̄mb Izaí nāá: «Jwōnd mót ī tí ɛdós ɓɛ̌ sɔ̄sā sī, Í lɛ̄ɛ̄ nāá: Kwombɛlká zyē mí Ɗâ, Ɓī syēs mímbɔ̄ŋ!

⁵ Mindwɔŋg mī lwóndlaa, Mɛcók myɛ̂ɛs mɛ̄ ɓówaa, Mimbɔ̄ŋ mī syésaa, Ikphaāk i ɗí ɓí í sɛmb ɓík, Ɓī kwômblaa.

⁶ Í náǎŋ ɓót ɓyɛ̂ɛs wā ɓɛɛ́ ɗakɛ Zɛ́mb ɗí tí ɛcis káɓiná ê.»

⁷ Mɛthum mɛ ɓót mɛ ɓúzī zye tí nāá, Zwáŋ á á ɗuu ɓɛ̂. Zwáŋ nɛ nɔ̄ɔ̄ nāá «Jüākká mɛ isá ɓɛ̄ ígúukaa ɓîk. Zɛ̄ lɛ̄ɛ̄ ɓén nāá, í ɗyaāŋ ɓí ɗí nɛ khul ɛ́kámb ɛ́ɓūk ɛ̄ mí Zɛɛ̄mb ɗí lí í kúnɔɔ lîk?

⁸ Sākāná phɛ̄ tyaa isīsɛ̄ɛ̄ ī lyākɛ̄l nāá, ɓí í lúm míkɔŋ nɛ ɛ́ɓyôo ê. Ɓyá a dá gú ɛ́swômbla nāá: “Zí chīlā mí Áɓilam.” Gūká nāá, Zɛɛ̄mb ɛ nɛ khul ɛlinj mɛ́kɔ̄k mák ɓwán ō mí Áɓilam.

⁹ Zyóŋ nyī mú ɛ́nyeetɛ̄ tí ɛsuk ɛ̄ lē. Lē yɛ̂ɛs ɗí ta gúm tyâa phuūm ékɛ́, ɓá á cyúkɛl yɛ̄, ɓɛ gús yɛ̄ twóó ɗû.»

¹⁰ Ɓot ɓɛ̄ ɓúzī jí nɛ Zwâŋ nāá: «Zī káa sá phɛ̄ nā?»

¹¹ Nyɛ nɛ nɔ̄ɔ̄ nāá: «Mot ɗí nɛ mikānd mīmbá ɔ́kɛ́, ɛ jüē nɔ̄l ɗí ta ɓɛ nɛ yɛ̄ ɔ́kɛ́, ŋgwát. Nɔ̄l ɗí nɛ iɗóó ɔ́kɛ́, ɛ pyâk mot ɗí ta ɓɛ nɛ yɛ́ ɔ̂.»

¹² Phúla ték ɛ́, ɓot ɓɛ̄ ítɔ́ya ɓɛ̄ ɓúkɛ̄ zye nāá ɓá á zī ɗua. Ɓɔ̂ɔ nɛ Zwáŋ nāá: «Yêkle, á zyɔ̂ɔ zī sá nā?»

¹³ Ɛ ɓúzī ɓɛ́s nɛ nɔ̄ɔ̄ nāá: «Ɓyá a kɛl sínɔŋ tí mɔnī tɔ́ya.»

¹⁴ Isóda ɓyɔ̂ɔ thɔ́k ɓī ɓúzī zye. Ɓɔ̂ɔ nɛ Zwáŋ nāá: «Á zyɔ̂ɔ nâk, zī sâ nā?» Zwáŋ ɛ ɓúzī ɓɛ́s nɛ nɔ̄ɔ̄ nāá: «Ɓyá a nwɔŋ ɓót imɔnī nɛ khul. Gú thɔ́k, ɓī jüe mót mɛkua tí tɔ̌p nyɛ nɛ mɛkɛpɛ. Dá ɓyeká nje mɔnī ŋgɔ́n yēn.»

¹⁵ Phúla ɓā ɓɛ ɓɛ́ ɛ́ gwók ísá ī ték ékɛ́, ɛyɔŋ lī ɓúzī ɗi tí phónd nɛ thūnd mɛ́jendɛɛ̄l. Ɓɛ̄ ɓú sisîmsa nāá, Zwáŋ ɛ́ dala ɓɛ Kūmāndē Zɛ́mb ā kɛs ɔ̂.

¹⁶ Zwáŋ nɛ nɔ̄ɔ̄ nāá: «Myam mí ɗuu ɓén nɛ mɛɗyūū. Sá gwát ɛ́, nɔ̄l ɗí nɛ khul ɛ thaŋ mɛ́ ɔ́kɛ́, ɛ tí ɛzye. Ma a ɓɛ̄ nɛ tɛ̄lā ɛ́sɔ́ ínalɓwaās ɓyɛ̄. Nyɛ á á ɗuu ɓén nɛ Áchāāchǎnj Sisímb, nɛ ɗû.

¹⁷ Ɛ nɛ pyapa yɛ̄ tí mɛɓɔ́ tí nāá, á á ɓɛ́s pāká phǔm nɛ ikōt. Á á nwɔŋ phúm, ɛ māk tí tâŋ. Ɛ nwɔ́ŋ íkōt ɛ́, ɛ gbā ɓyɛ́ tí ɗú ɛ ɗí ta ɗím lîk.»

¹⁸ Zwáŋ ā ɓɛ thɔ́k tí ɛɓākā ɓɛla nɛ mɛ̄l mɛ́kɛ́l ɛ́ɓuuɓu tí ɛlyóó ɛ́yɔŋ lɛ̄ Ízaɛ̂l. Í ɗyaāŋ ték ā lilɛ́ɛ ɓot Tyaa Pɔ́ ê.

¹⁹ Thɔ́k ɛ́, Zwáŋ ā ɓɛ ɛ́ ɛ́ jüě kūmāndē Elôd mɛɓɛ̌ tɔɔ̄p ā ɓâ Eloɗyâaɗ myǎ mot ndɔŋ yɛ̄ ê. Zī kā nwɔŋ ɓīl íɓyǒla ɓɛ̄ ísínɔŋ ā ɓɛ tí ɛsá ɛ́ɓuuɓu ɓîk.

²⁰ Ī kɛ́ kum nāá, ɛ ɓándā nwɔŋ Zwáŋ ɛ nwáp ɛ́ tí mbok.

Nduān mí Yésus

²¹ Ɗakɛ yā ɓɛ ɓɛ́ ɛ́ síl ɛ́ɗuu mót nyɛ̂ɛsa ékɛ́, ɓɛ̄ ɓúzī ɗuu thɔ́k Yésus. Tɛ́m ā ɓɛ tí mindakla ékɛ́, jwóó ī ɓúzī ɗii.

²² Phúla ték ɛ́, Áchāāchǎnj Sisímb ɛ ɓúzī sul tí nól nyɛ̄. Ɛ nyēn tí mís mɛ̄ ɓôt, ɛ nɔ́ŋlā nɛ ɛpep. Zɛɛ̄mb ɛ ɓúzī lüǐ ɓɛ̌ jwôo, nyɛ nāá: «U Mwán aām, mí ɗí tí kpɛl ɔ̂, myaŋla wám wɛ̂ɛsa, ú zinjá nyɔɔ̄.»

Mɛtē mɛ̄ njāā ɓót mí Yésus

²³ Tɛ́m Yésus ā ɓɛ ɛ́ ɛ́ kum mímbú ɗɛ ɓɔ̂ɔ mɛkām mɛ̄lɛ́l ɗyaāŋ ékɛ́, ɛ ɓúzī nyɛl ísɛ̄ɛ̄ ɓyɛ̄. Ɓot ɓɔ̂ɔ ɓā sisîmsa nāá, Ɛ mbyāwā mí Yósɛp mwán mí Élî.

²⁴ Élî ték ā ɓɛ mwán mí Matât. Matât wɛ̄ sāŋg ā ɓɛ Levî Mɛlkí nyɛ ɛ ɓúkā ɓyá Levî, Yanayí ɛ ɓyā Mɛlkî, Yósɛp ɛ́, ɛ ɓyā Yanayî,

²⁵ Matatyás ɛ ɓyā Yósɛp, Amós, ɛ ɓyā Matatyâs, Naúm ɛ ɓyā Amôs, Ɛslí ɛ ɓyā Naûm, Nagaí ɛ ɓyā Ɛslî,

²⁶ Maát ɛ ɓyā Nagayî, Matatyás ɛ ɓyā Maât, Semeyíŋ ɛ ɓyā Matatyâs, Yósɛk ɛ ɓyā Semeyîŋ, Yóɗa ɛ ɓyā Yósɛk,

²⁷ Yoanáŋ ɛ ɓyā Yóɗa, Lezá ɛ ɓyā Yoanâŋ, Zotóɓaɓɛ́l ɛ ɓyā Lezâ, Keyaltyɛ́l ɛ ɓyā Zotóɓaɓɛ̂l, Nelí ɛ ɓyā Selasyɛ̄l,

²⁸ Mɛlkí ɛ ɓyā Nelî, Ají ɛ ɓyā Mɛlkî, Kosám ɛ ɓyā Ajî, Ɛlmadám ɛ ɓyā Kosâm, Ɛ̂ɛ ɛ ɓyā Ɛlmadâm,

²⁹ Yésus ɛ ɓyā Ɛ̂ɛ́, Elyezɛ̂ɛ ɛ ɓyā Yésus, Yolím ɛ ɓyā Elyezɛ̂ɛ, Matát ɛ ɓyā Yolîm, Leví ɛ ɓyā Matât,

³⁰ Simeɔ́ŋ ɛ ɓyā Levî, Yúɗa ɛ ɓyā Simeɔ̂ŋ, Yósɛp ɛ ɓyā Yúɗa, Yonám ɛ ɓyā Yósɛp, Elyakím ɛ ɓyā Yonâm,

³¹ Meleá ɛ ɓyā Elyakîm, Mená ɛ ɓyā Meleâ, Matatá ɛ ɓyā Menâ, Natáŋ ɛ ɓyā Matatâ, Ɗávit ɛ ɓyā Natâŋ,

³² Yesé ɛ ɓyā Ɗávit, Oɓɛ̂d ɛ ɓyā Izaî, Ɓɔ̂ɔz ɛ ɓyā Oɓɛ̂d, Sáta ɛ ɓyā Ɓɔ̂ɔz, Naasɔ́ŋ ɛ ɓyā Sáta,

³³ Aminadáɓ ɛ ɓyā Naasɔ̂ŋ, Admín ɛ ɓyā Aminadâɓ, Aaní ɛ ɓyā Admîn, Ɛslɔ́ŋ ɛ ɓyā Aanî, Pelɛ́s ɛ ɓyā Ɛslɔ̂ŋ, Yúɗa ɛ ɓyā Pelɛ́s,

³⁴ Yákɔp ɛ ɓyā Yúɗa, Ízak ɛ ɓyā Yákɔp, Áɓilam ɛ ɓyā Ízak, Téla ɛ ɓyā Áɓilam, Naɔ̂ɔ ɛ ɓyā Téla,

³⁵ Selúk ɛ ɓyā Naɔ̂ɔ, Leú ɛ ɓyā Selûk, Pelɛ́k ɛ ɓyā Leû, Eɓɛ̂ɛ ɛ ɓyā Pelɛ̂k, Selá ɛ ɓyā Eɓɛ̂ɛ,

³⁶ Kenán ɛ ɓyā Selâ, Apaksâd ɛ ɓyā Kenân, Sɛ́m ɛ ɓyā Apaksâd, Nɔ́y ɛ ɓyā Sɛ̂m, Lemɛ́k ɛ ɓyā Nɔ́y,

³⁷ Matusalɛ́m ɛ ɓyā Lemɛ̂k, Énɔk ɛ ɓyā Matusalɛ̂m, Yelɛ́d ɛ ɓyā Énɔk, Malaleɛ́l ɛ ɓyā Yelɛ̂d, Kenán ɛ ɓyā Malaleɛ̂l,

³⁸ Enɔ́s ɛ ɓyā Kenân, Sɛ́t ɛ ɓyā Enɔ̂s, Áɗam ɛ ɓyā Sɛ́t, Zɛ̌mb ɛ kús Áɗam.