Eɓelê 7 - Myēnj phōn mí Zɛɛ̄mb

Mɛlkiseɗɛ̂k, kūmāndē, thɔ́k fata mɛ́tûnka

¹ Mɛlkiseɗɛ́k ték ɛ́, ā ɓɛ kūmāndē khandǎ Salɛ̂m, ɛ ɓākā ɗi thɔ́k fata mɛ́tûnka Zɛ́mb ɗí ɓɛ̄ ɛ́kó ɓɛ ɛ́kó ɔ̂. Ā ɓɛ ɛ́ ɛ́ kɛ́ ɓoma nɛ Áɓilam tɛ́m Áɓilam ā ɓɛ tí ɛɓúlǎ ɓɛ ā kɛ ga mikūmāndē ê, ɛ ɓúzī lɛ́mɛl Áɓilam.

² Áɓilam ɛ ɓúzī jüe ɛ́ ɛkɔɔ ɛ kām lɛ̄ ísá ɓyɛ̂ɛsa ā nwɔŋ pyaāŋ ɓîk. Ɗín ɛ̄ Mɛlkiseɗɛ́k lí nyēē tian nāá «kūmāndē óceece.» Thɔ́k ɛ́, ā ɓɛ kūmāndē Salɛ̂m, í tian nāá, «kūmāndē ɛ́pyaala.»

³ A a ɓɛ nɛ sāŋg, a a ɓɛ nɛ naāŋg, a a ɓɛ thɔ́k nɛ ɗú ɛ̄ njāā ɓôt. Yá a ɓɛ̄ nɛ yīl pyaāt ɗí tí ɛlüiiaá tɔɔ̄p mɛ́ɓyɛ̄l mɛ̄, gú thɔ́k ɛsüee lɛ̄ ê. Ɛ da ɓɛ̄ fata kɔ̌m tí nɛ kɔ̄m ɛ nɔ́ŋlā tí pyaāt ték nɛ Mwán mí Zɛɛ̄mb.

⁴ Jüākká ɗakɛ ɛ́ ɗí ánénén ê! Ísu mot ɗɛ Áɓilam mot ɗí sǎŋg-phāmb káwūnā ɔ́kɛ́, ɛ́ ɛ jüe ɛ ɛkɔɔ ɛ kām lɛ̄ ísá ā ɓúla nɛ ɓyɛ́ ɓɛ ɗɔ́mb ɓîk.

⁵ Tí oceece, lɔ́a yā ɓɛ tí ɛjüě chīlā mí Leví ɓā ɓɛ ifata ɓák zyē nāá, ɓɛ̄ jí ɓot ō ndɔŋ yɔ̄ɔ̄ kúl Ízaɛ́l ɛkɔɔ ɛ kām. Ɓyela nāá, ɓɔ̂ɔ thɔ́k ɓā ɓɛ chīlā mí Áɓilam.

⁶ Mɛlkiseɗɛ́k nyɛ́, a a ɓɛ tí chīlā mí Levî. Sá gwát ɛ́, Áɓilam ɛ́ ɛ jüe ɛ ɛkɔɔ ɛ kām lɛ̄ ísá ā nwɔŋ ɓîk. Phúla ték ɛ́, ɛ lɛ̄mɛ̄l Áɓilam mot ā ɓye ikɛs i mí Zɛɛ̄mb ɔ̂.

⁷ Thɔ́k ɛ́, yá a ɓɛ̄ nɛ mɛsō, í mot lɛ́mɛl ɔ́kɛ́, ɗí ɛ́ ɛ́ thaŋ mót ɛ́ lɛ́mɛl ɔ̂.

⁸ Chīlā mí Leví ɗí tí ɛnwɔŋ ɛ́kɔɔ ɛ kām ɓák ɛ́, ɓɛ́ ɓot o ɗí nɛ khul ɛjüe ɓâk. Sá gwát, Mɛlkiseɗɛ́k nyɛ mot Áɓilam ā jüe ɛ ɛkɔɔ ɛ kām ɔ́kɛ́, ɛ mot ɗí tí cyuk ɔ, ɗakɛ Ɓááchāāchānj ō Mítilā ō lɛ́ɛ́ ê.

⁹ Tí ɛgɔl ɛ́, ní nɛ khul ɛlɛ́ɛ́ ká nāá: Tɛ́m Áɓilam ā dána ɛkɔɔ ɛ kām ékɛ́, Leví nyɛ mǒt chīlā yɛ̄ nwɔ́ŋ ɛkɔɔ ɛ kām ɔ́kɛ́, ā ɓɛ thɔ́k ɛ́ ɛ́ ɗána.

¹⁰ Nɛ dɔ nāá, ísu ɗɛ yā ɓyela nāá, Leví a a ɓá ɓyɛ́l ékɛ́, ā ɓɛ ɛ mú yes twóó nda sǎŋg-phǎmb wɛ̄ Áɓilam, tí tɛ́m Mɛlkiseɗɛ́k ā kɛ ɓoma nɛ nɛ̄ ê.

¹¹ Ló sɛ̄ɛ̄ ífata i mɛ́tûnka chīlā mí leví, yā ɓɛ ɛtín ɛ lɔ́a Zɛ́mb ā jüe ɛyɔŋ lɛ ízaɛ́l ê. Tí ɛkū ɓɛɛ ɛ́, ló-sɛ̄ɛ̄ ífata i chīlā mí Leví ték wá a jüe sá ɗí ta ɓɛ nɛ jüas ê. Ū ɓɛ̄ ú u jüe sá ɗí ta ɓɛ nɛ jüas ê nák, phú yá a ka ɓaka je nāá, i ɓɛ̄ nɛ yīl fata mɛ́tûnka tí tɛ̄lā mí Mɛlkiseɗɛ́k, ɗí ta ɓɛ tí tɛ̄lā ɓīl ī chīlā mí Álɔn ê.

¹² Nɛ dɔ nāá, ló-sɛ̄ɛ̄ ífata ū cēnj nák ɛ́, lɔ́a thɔ́k í dalǎ nɛ ɛcênj.

¹³ Mɛkɛ́l mák mɛ lüǐ tɔɔ̄p mí Ɗá káwūnā. Nyɛ ɛ tí yīl kúl ɓót süís ɗí mot ŋgwát nɛ ŋgwát a a ɓá nyēē sálǎ sɛ̄ɛ̄ ífata salā ɓɛ̌ pyaāt mɛ́tûnka ê.

¹⁴ Ní tí gú ká nāá, Ɗá káwūnā ā ɗüis tí chīlā mí Yuɗâ. Thɔ́k ɛ́, Moís a a lüii tɔɔ̄p ífata tí ɛsú ɛ̄ yízǎŋ kûl.

Yīl fata ɗí ɗɛ̌ Mɛlkiseɗɛ́k ɔ̂

¹⁵ Yīl sá ɗí tí ɛsá nāá, isá ɓīnɛ́ɛ̌ŋ ɓyɛ̂ɛs ɓī ɓáka ɓú ɗǐ óceece ékɛ́ í nāá, yīl fata ɗí ɗɛ̌ Mɛlkiseɗɛ́k ékɛ́, í í túula.

¹⁶ A a ɗi fata tí lɔ́a ɗí tí ɛjüák tɔɔ̄p íthānd ī ɗú ɛ̄ njāā ɓot ê. Sá gwát, ā ɗi fata tí khul cyuk ɗí ta ɓɛ nɛ khul ɛsamɓaa ê.

¹⁷ Tí oceece, Mitilā mí lɛ̄ɛ̄ nāá: «U fata mɛ́tûnka tí ɛsú ɛ kɔ̌m tí nɛ kɔ̄m, Tí tɛ̄lā mí Mɛlkiseɗɛ̂k.»

¹⁸ Tí ɛkū ɓɛɛ ɛ́, Zɛɛ̄mb ā ɓɛ ɛ́ ɛ́ gbanj lɔ́a ɛ́sɔ̂k, nɛ dɔ nāá, yā ɓɛ tí tyak, thɔ́k yá a ɓɛ nɛ nɔm.

¹⁹ Tí oceece, lɔ́a mí Moís yá a jüe sá ɗí ta ɓɛ nɛ jüas ê. Sá gwát, Zɛɛ̄mb ɛ́ ɛ́ jüe kaɓiná mɛjendɛɛ̄l mɛ ɗí tí ɓú nwɔŋ mâk. Í mɛjendɛɛ̄l mɛték ɗí tí ɛsá nāá, nī jémbaka ndumɛ nɛ nɛ̄ ê.

²⁰ Sá ɓākā ɗi ékɛ́ í nāá, sá ték yá a sɛ́ɛ Zɛ̌mb ta nyēē kana. Ɓyela nāá, ɓɛ̄l ɓā ɗi ifata, Zɛ̌mb ta nyēē kana.

²¹ Sá gwát tí ɛsú ɛ̄ mí Yésus ɛ́, Zɛɛ̄mb ā tɛ́l ɛ fata, ɛ kána tí tɛ́m ā lɛ́ɛ nɛ nɛ̄ nāá: «Ɗá ɛ́ ɛ́ kana, A á ɓākā cénj lɛ̄ɛ̄ā wɛ̄. “Wɔ ū fata kɔ̌m tí nɛ kɔ̄m”.»

²² Í yɛ́ ɗí nāá, Yésus ɛ phyēnj phōn ɗí tí ɓú nwɔŋ Zɛ́mb ā lat nɛ kányīnā ê.

²³ Í thɔ́k nɛ wūl mbɔ̄k: Mbɔ̄k ték ū nāá, tɔ́ŋ ɓīl ífata i mɛ́tûnka nyā ɓɛ tí ɓû. Nɛ dɔ nāá, ɛsüee lā ɓɛ tí ɛkambɛl nāá, ɓá a tɔ́ nɛ ló-sɛ̄ɛ̄ wɔ̄ɔ̄ ɓɛ sɔ̂k.

²⁴ Sá gwát ɛ́, Yésus nyɛ á á ɗǐ kɔ̌m tí nɛ kɔ̄m, thɔ́k ló-sɛ̄ɛ̄ ófata wɛ̄ wá ǎ sî.

²⁵ Í yɛ́ ɗí nāá, ɛ nɛ khul ɛcis ɓɛ̄l ō jēmbā ɓɛ ɗá mí Zɛɛ̄mb tí kɔŋ wɛ̄ ɓák ceece ê. Nɛ dɔ nāá, ɛ tí ɛcyuk ítɛ́m ɓyɛ̂ɛs, ɛ thɔ́k tí ɛdakla ítɛ́m ɓyɛ̂ɛs nɛ Zɛɛ̄mb tí mɛsú mɔ̄ɔ̄.

²⁶ Yésus ɗí phɛ̄ ánénén fata mɛ́tûnka yā je nāá, nī ɓɛ́ ka nɛ yɛ́ ê. Ɛ ɛ́chāāchānj, ta ɓɛ nɛ jüas, ta ɓɛ nɛ sɛ̄m, Zɛɛ̄mb ā ɓɛ ɛ́ ɛ́ ɓɛ́s ɛ́ nɛ ɓot o mísɛ̄m, ɛ ɓēn ɛ́ ɓɛ ɛ́kó ɓɛ̄ ɛ́kó twóó ijwôo.

²⁷ Nyɛ a a ɓɛ̄ ɗɛ ɓɛ̄l ɓáánénén ɓɛ̄ ífata ī mɛ́tûnka. A a ɓɛ̄ nɛ nāá, ɛ sá mɛtûnka mɛlú myɛ̂ɛs tí ɛsú ɛ̄ mísɛ̄m myɛ̄, nɛ tí ɛsú ɛ mīl mí ɛ́yɔŋ. Nyɛ ā da sá mɛtûnka nɛ nyɛ mot ték kɛnd gwát, ī dála.

²⁸ Lɔ́a mí Moís yɔ̂ɔ yā titɛ̂l ɓǎnénén ɓɛ̄ ífata i mɛ́tûnka, ɓot ɓɛ̄ íjüas. Sá gwát, mɛkɛ́l mɛ̄ Zɛ́mb ā lɛ́ɛ tɛ́m ā kāna phúla lɔ́a mák ɛ́, mɛ́ tɛ̄l Mwán Zɛ́mb ā sâ nāá, ɛ ɗî ta ɓɛ nɛ jüas ɔ́ tí ɛsú ɛ̄ ndɔ̌mb ɗî ɔ, ánénén fata mɛ́tûnka.