Apokalîs 17 - Myēnj phōn mí Zɛɛ̄mb

Dɔ́s sapák nên

¹ Phúla ték ɛ́, nɔ̄l éŋgeles ŋgwát tí ndɔŋ ɓééŋgeles tɛ̄n nɛ ōɓá ɓā ɓɛ nɛ ikɔ́p ī mítūŋ tɛ̄n nɛ īɓá ɔ́kɛ́, ɛ ɓúzī jémbǎ ndumɛ nɛ naām, nyɛ nɛ naām nāá: «Thâ, má á lyákɛl ɔ́ ɗakɛ ɓɛ́ wā cyúkɛ̌l tɔ̌p sapák nén énɛ́ɛ̌ŋ ê. Í nyɛ ɗí khanda ánénén ɗí sumā ndumɛ nɛ thūnd ɓáánénén ō mɛ́thyūū ɔ̂.

² Mikūmāndē mɛ̄ íɓwaās myɛ̂ɛs mi ɓɛ̄ mí í sá ósapák nɛ nɛ̄. Ɓot ɓɛ̄ íɓwaās ɓɛ̄ tɔ́mbɔ̄ mɛ́nɔk mɛ̄ ósapák ɓɛ̄.»

³ Áchāāchǎnj Sisímb ɛ ɓúzī nwɔŋ mɛ̂. Éŋgeles ɛ tɔ́ nɛ nǎm ɓɛ̌ sɔ̄sā sî. Mi ɓúzī ɓɛɛ nɔ̄l múmá pyǎŋ ndíndiīl kwóó tīt. Tīt ték ā ɓɛ nɛ nól ɛ́twaatwamb, nɛ miló tɛ̄n nɛ mīmbá, nɛ ithɔ́ŋ kām. Tí nól nyɛ̄ nyɛ̂ɛsa, yā ɓɛ nɛ mitilā mī mín mɛ̄ ɗí tí ɛlə́ə́ Zɛ́mb mîk.

⁴ Mumá ték ā ɓwāt iɗim i míkānd tí ɓú twamb. Ā ɓɛ nɛ mɛkhweēs ɓɛ̄ sā mɛ́ nɛ gól māk, nɛ mɛ̄l ɓɛ̄ sā mɛ́ nɛ iɗim i mɛ́kɔ̄k mâk. Ā ɓɛ nɛ kɔ́p ɓā sâ yɛ́ nɛ gól ékɛ́ tí mbɔ̂, lwōndlā nɛ isá ī lɔk ɓɛ̄ ímɔlā ā sisâ ɓîk.

⁵ Ā ɓɛ nɛ ɗín tilā tí phɔ̌mb nyɛ̄ ɗí ɓot ɓā ā gū sá ɗín ɛ ték lā kam ɛlɛ́ɛ́ ê. Tilā ték nāá: «Ɓáɓilɔn, khanda ánénén, nǎŋg isapák nɛ ilwǒkla ɓɛ̄ ísá ī sɛ̄ɛ̄ tí iɓwaās ɓîk.»

⁶ Mi ɓúzī ɓɛɛ nāá, mumá ték ɛ tí mɛtɔmbɔ̄ mɛ̄ mɛ́chía mɛ̄ ɓót ō ɗí tí ɛsú ɛ̄ mí Zɛɛ̄mb ɓák, nɛ mɛchía mɛ ɓót ō ɓā dóaa tí tɔɔ̄p ɛ́ɗúɛl Yésus ɓâk. Tɛ́m mā ɓɛɛ ɛ ékɛ́, mi ɓúzī sɛ́mɛ sá ték ɛ́ɓuuɓu.

⁷ Í náǎŋ éŋgeles zī jī nɛ naām nāá: «Ú sɛ̄mɛ̄ yɛ̂? Myam má á gbɛ́s ɔ́ sā ɗí sɔlā tí tɔɔ̄p múmá ɔ́nɔ́ɔ̌ŋ nɛ tīt ɗí tí ɛkhɛ̄ɛ̄ ɛ́ ɔ, tīt ɗí nɛ miló tɛ̄n nɛ mīmbá nɛ ithɔ́ŋ kām ɔ̂.

⁸ Tīt ū ɓɛɛ ɗyáŋ ɔ́kɛ́, ɛ́ ɛ ɓɛ̂. Sá gwát ɛ́, a a ká ɓɛ̂. Á gbɔ̂m tí ɗǐmla tóŋ, tí ɛsú lɛ̄ ɛ́kɛ̄ ɗîmb. Ɓot o sī ɗí mín mɔ̄ɔ̄ má a ɓɛ̄ mítilā tí khuu mɛkanā mɛ̄ cyuk tát tɛ́m Zɛ́mb ā kus sī ɓák ɛ́, ɓá á sɛ̄mɛ tí ɛɓɛɛ tīt ɔ́nɔ́ɔ̌ŋ. Nɛ dɔ nāá, ɛ́ ɛ ɓɛ̂, a a ká ɓɛ. Sá gwát ɛ́, á á ɓākā zye.»

⁹ «Í je nāá, mot ɛ ɗî nɛ pek, nɛ ɛcélɔɔ tí nāá, á á gwók ísá ī têk. Miló tɛ̄n nɛ mīmbá mí ɓáánénén ō mɛ́cók tɛ̄n nɛ mɛ̄mbá pyaāt múmá ɗí ndíndiīl ê. Miló mīték mí thɔ́k mikūmāndē tɛ̄n nɛ mīmbā.

¹⁰ Otɛ́n tí ndɔŋ wɔ̄ɔ̄ ɓɛ́ ɛ́ ɗuma. Nɔ̄l twōō ɛ jína tí də̂ə. Nɔ̄l tɛ̄n nɛ mbá á á ɓākā zye. Sá gwát, tɛ́m ɛ́ wā zye ékɛ́, yɛ̄ də́ə́ yá ǎ ɓwɛɛ.

¹¹ Tīt ā nyee ɓɛ ɛsɔ́k, ɗí a a kā ɓɛ tel ɔ́kɛ́, ɗí kūmāndē tɛ̄n nɛ lɛ̂l. Ɛ thɔ́k tí ndɔŋ míkūmāndē tɛ̄n nɛ mīmbá. Thɔ́k ɛ́, Zɛ̌mb á á dó ɛ.»

¹² «Ithɔ́ŋ kām wā ɓɛɛ ɗyaāŋ ɓík ɛ́, í mikūmāndē kâm. Ɓɔ̂ɔ ɓá a ɓā nyɛ̌l də̂ə. Sá gwát ɛ́, ɓá á jüeaa khúl tí ɛsú ɛ̄ nāá, ɓá nɛ ɓɔɔ tīt ɔ́nɔ́ɔ̌ŋ ɛ́, ɓá á də́ə́ táŋ ɛwolo ɛgwát.

¹³ Mikūmāndē kām mīnɛ́ɛ̌ŋ myɛ̂ɛs mī da ɓɛ̄ nje nɛ jwok yɔ̄ɔ̄ gwát. Jwok yɔ̄ɔ̄ ték í nāá, ɓɛ̄ jüê tīt də́ə́ yɔ̄ɔ̄ nɛ mɛkhul mɔ̄ɔ̄.

¹⁴ Ɓá á lûmla nɛ Mwâthɛmbɛ. Sá gwát ɛ́, á á ga ɓɛ̂, nɛ dɔ nāá, nyɛ ɗí Ɗá oɗâ, Kūmāndě míkūmāndē. Mwâthɛmbɛ ték, ɓā nɛ ɓot ɓɛ̄ ā jôo, ɛ tɔɔ̄p ɓɛ́ ɓák ɛ́, ɓá á ga.»

¹⁵ Éŋgeles ɛ ɓúzī ɓākā lɛ́ɛ́ nɛ naām nāá: «Mɛthyūū ú ɓɛɛ́ pyǎt sapák ínɛ́ɛ̌ŋ a ɓɛ ndíndǐl ndumɛ nɛ mɛ́ mák ɛ́, í náǎŋ mɛyɔŋ, nɛ mɛthum mɛ ɓót, nɛ okanda, ká zī nwɔŋ ílüiī.

¹⁶ Ithɔ́ŋ kām ú ɓɛɛ ɗyáŋ ɓík, nɛ tīt ɔ́nɔ́ɔ̌ŋ ɛ́, ɓá á nǐmb sapák múmá énɛ́ɛ̌ŋ: Ɓá á sa ɛ́ isínɔŋ ɓyɛ̄ ɓyɛ̂ɛs, ɓɛ̄ sɔ̄ ɛ́ mikānd myɛ̄ myɛ̂ɛs, ɓɛ̄ ɗɛ̄ ípúnd ɓyɛ̄, iɓuɓuka ī ték, ɓɛ̄ ɗīs ɓyɛ́ tí ɗû.

¹⁷ Nɛ dɔ nāá, Zɛɛ̄mb ɛ́ ɛ́ gbá tí milyém myɔ̄ɔ̄ ɛ́, njeā ɛ́lwóndɛ̌l jwok yɛ̄. Ɛlwóndɛ̌l jwok yɛ̄ ték í nāá, mikūmāndē myá á ɗi cyūŋ, ɓɛ̄ ɓɛ́lā nɛ də́ə́ yɔ̄ɔ̄ tí ɛsála tí ɛsú ɛ̄ tīt, i kɛ́ kum tɛ́m sá Zɛ́mb ā lɛ́ɛ ékɛ́, wā lwónd ê.»

¹⁸ «Phúla ték ɛ́, mumá ú ɓɛɛ ɗyáŋ ɔ́kɛ́, í khanda ánénén ɗí nɛ də́ə́ tí mikūmāndē mī sī myɛ̂ɛs ɔ̂.»