Godigo Nogi Ugwaba Sabo Tęąbi Po Wabo Buku Dabe 62 - Godigo dwagi yai po buku

God deligo naga da tonalubo dao

Te Devitgo asęani balia po me deli dao.

¹ Mu tama, eno konealubo homu te God deliba naga dąų weyu, tama sagia siyu, tama eno te agai ena tau sabo tonalubo dao. Aga deligo naga te ena ma selama, tama ena bidibo ula dali bidibo dao.

² Agai deligo te ena tonalu, tama ena tau siyu ebao. Tama aga deli naga eno bomai obo elalubao. Tama tiyu, te hwįbo side ena me hagagobeo. Mu menio.

³ Ena dali boi homu ebo bage, nisu naga sogo dagego ena dali hwįyu, te ena dolainu ebawe? Dagego homugo ena te obo tomage me deli te tulaluama, te mu togwa pabo tiwai gilama emainu ebao.

⁴ Eno genuai nogi elalubadi, tiali goli, te dagego eno genuai nogi dolainu ebao. Dagego te tibo po wabo godolo homu mu ebo dao. Dagego te Godigo enaba wiegi yai sę yabo po pusai, tiali goli dagego haligade dagego te tama weyu wali, “Dago homugo te Godigo aga dolomainu homu ebao,” po wali.

⁵ Eno konealubo homu te God deliba naga dąų wabo dao. Tama eno te agai deligo ena tau sabo tonalubo dao.

⁶ Agai deligo naga ena tonalu, te ena tau sabo dao. Tama aga deli naga eno bomai obo elalubao. Tama tiyu, ena te hwįbo side me hagagobeo. Mu menio.

⁷ God deligo naga ena ma sali, tama aga digi enaba te genuai nogi mani. Aga te ena tonalubo bomai bidi te bidibao. God aga digi aga te eno bomai obo elalubaso, tama te boi bidi dabego ena me dologobeo.

⁸ Eno hani dabe, sesemane sogo dagego te Godiba konealubo homu dąų waiyąo. Dagego te duga tigidali sęgę me, te tigidali homu te agaba pusao, awe, bidigo te wę gelibo tiwai eyu yao. Magi baso meni, da te agaba pelama, bugagia bidainu te tama tiao.

⁹ Te we bidi da, augwali e tiwai dao. Te olo we bidi dabe te pedauwalide olo mobo pedalubo tiwai te ebao. Tama te genuai namba elalubo bidi dabe augwali me, te olo nai tiwai naga yai. Te augwali dago dagalobaso da, teda augwali te sęgę mu elalusiąbo te dago me suaibao. Te augwaligo sęgę te pedauwalidu pedalubo mobogo sęgę dali usu egobeo.

¹⁰ Tama tibaso, dagego te tama homu igimio, “Te hwįbo kolesaga me, te nai dabe wi sabo kolesaga me, te wiegi yai kolesaga da weyu, tama da te mone bidi pedalubaso, te usu yaiba,” homu me igio. Ma, te dagego mone me doado bage te hauwa pedalubaso da, teda dagego te nai dabeba naga duga homu mugio. Te usu egobeo.

¹¹ Godigo te tama po wabo te eno odali, “Ena God, eno te genuai bomo elalubo dao,” wali. Me ma, e tama po wabo eno hauwa sogo odali,

¹² “Tama sesemane sogo eno te tigidali we bidi godolo mu ebao.” Te po wabo si eno mu odalio. Genuai Bidi, nago te da tigidali we bidigo ebo kolesagade usu nama, te sę wei si ma ilibo dao.