Hibru 1 - Godigo dwagi yai po buku

Jisasgo te ensel dabe aiyaba elaluali (Dąį 1-2) Godigo Ogwago po dabolo mani

¹ Te polobadu mu hauwa sogo me, te haniani kolesaga hauwago me, te Godigo agai po pusali bidi profet dabego pedauwalidu agai po meba te dago wąį dabebolo mena mena pai dao.

² Tiali goli megi e sogo da, te nosali pedalobo sogo tiwai mu yali, te Godigo aga Ogwago pedauwalidu agai po dabolo pusai dao. Te aga Ogwago nogogo me te Godigo te tǫ dali dagalu dali te tigidali nai nigai dao. Tama Godigo agai te tigidali nai nosali somainogo aga sa muai.

³ Te Ogwa agai te Godigo wiegi wiegi yai homu kolesaga te dabolo hania ola mabo bidi dao, tama aga te God tiwai gagawai mu tama. Agai po da te genuai bomo elalubo, tama te bomai pogo agai te tigidali bidibo nai me bidaluao odubadi tama te bidalubo dao. Agai te we bidigo sęgę sali sela sąbo sę te silama, tama megi da te Tigidali Bomo Elalubo Tuni Bidi, te God dolo nogo badu dulalubao, aga genuai bidi mu dao.

Te Godigo Ogwago nogigo te ensel mobo bidi dabego nogi aiyaba elalubo dao

⁴ Te aga Ayade sali nogigo te ensel mobo bidi dabego nogi te aiyaba elaluama, tama wiegi yai mu yali. Tama tiwai yaligo da, aga digi te mobo bidi ensel dabe augwaligo Genuai Bidi mu pedalama, tama augwali aga dologoba pali.

⁵ Magi baso meni. Polobadu Godigo aga Ogwa dali te po wai, “Nage eno Ogwa dao. Megi tama ena digi nago Aya pedalomainogo yai.” Tama agai po ma wai, “Te ena digi agai Aya bidiyu, tama aga te eno Ogwa bidaibao.” Te me sogo Godigo te po si te ensel mobo bidi me deli dali wai dawe? Menio.

⁶ Tiali goli agai aga gomunai Ogwa te e tǫba tamadi tagala palobo sogo tama agai te po wai, “Tigidali eno sę ebo ensel mobo bidi dabe, dage kidu sugunama, tama dagego aga nogi ugwaba sao,” wali.

⁷ Tama God agai te ensel bidi dabe augwalide te po wai, “Godigo te aga ensel mobo bidi dabe augwali te wali tiwai pedalomainogo ilibo dao. Te agai aga sę ebo bidi dabe augwali te moni posolo ebo sia tiwai pedalomainogo ilibo dao.”

⁸ Tiali goli aga Ogwabolo agai te tiwai po wai, “Nage God dao, nage tuni bidi sesemane sogo bidada peyu, bidada paibao. Nago naga we bidi te doloba pai kolesagago tonalubo dao, tama te kolesaga naga ebode nago genuai wiegi yai nogi elalubao.

⁹ Nago te doloba pai kolesaga ebo te godolo mu eyu, tama te bomo yai po sela sąbo te nago hagela mu ebo dao. Tama tibaso, ena nago God bidiyu, tama eno nago nogi ugwaba somainogo eyu, te wel nago toboluba gelali, tama tebogo nage te wiegi yai homu pemene ilali. Te naga hai namu dabe augwaligo te nago wiegi yai homu pemene ebo tiwai me egobeo.”

¹⁰ Tama agai po agabolo ma weyu te po wai, “Genuai Bidi, polobadu mu nago e tǫ nigilama tama aga bomo elalubao. Te dagalu me, te naga nogogo nigai.

¹¹ Te dagalu de tǫ si te tigidali dolaibao, tiali goli nage da me dologobeo. Menio. Nage da sesemane sogo bidaibao. Te dagalu de tǫ si da te tigidali te badia paibao, te poloba ugwa badia pai tiwai yaibao.

¹² Te nago augwali pedeyu, te bidigo badia pai ugwa pedebo tiwai yaibao. Te nago augwali hasegeleyu, te bidigo ugwa hasegelebo tiwai yaibao. Tiali goli, nage da, tama naga bidibo dao. Nage me hasegelegobeo. Tama nage bidibo sogo te munu me siligobeo.”

¹³ Polobadu Godigo te po wai, “Nage genuai bidi ena dali hodobo bidimainogo eyu, tama eno dolo nogo badu duayao. Tama dualubadi, te eno nago boi bidi dabe augwali te nago sągą dologoba muaibao.” Tiali goli me sogo Godigo te po te ensel mobo bidi me deli dali waliwe? Menio.

¹⁴ Te ensel mobo bidi dabe augwali da, te noma bidi, tama augwaligo te Godigo sę ebo dao. Te Godigo augwali tagala palaibao, te aga augwaligo sęgę sali sela sąnama ma sainogo ebo we bidi dabe tau somainogo tebo dao.