Tito 2 - Bíblia

Hasruklewlu Halukkaluru Satkaka Yineru Tshinanupa Piranapni

¹ Seyni pixa Tito, tokantshi, halikakalutu pirana hasrukle pixka pixa hasrukletanu.

² Pasrukanna tsrutsolejine hike mixkane rixyawakapna, potuka hchinikanurunepa, kihler-potuko nuretatshinepa, halixlewlu homkahpotutatshinepa, hamotlewatatshinepni, mchiretanunepa rixyawakapna jejine tsrutsolejine.

³ Hiyrun-koxa pasrukanna tsrotsolejine potuka kamrure rixjexyawakna, Hoyakalu homkahitatshrone poyahokakatshine pixka. Hi jihyehjetatshinepni, hi katsholu jirakleronepni seyni kihle kamrure hasruklewatatshinepni suxone tsrotsolejine.

⁴ Rumukata hasruklexyawakapna hehnuruwatkalo, hhanurna ruchinijyawakna hiyrun-koxa hiwhenenna ruchinijyawakna.

⁵ Rasrujikowakapna maklojine kihler-potuko himat-nuretatshrone rixyawakapna, hike mixkanepa, hi yanachatatshronepa seyni pantshi suslahakleronepni, kchinikanuronepni, hhanurna tokanu homkahitatshinepni. Wan-hixatshronepa, hi Hoyakalu tokanu reyikkakanna.

⁶ Hiyrun-koxa hijretanna maklujine hike mixkane rixyawakapna.

⁷ Pix-potuko xako ptowru kamrurtshi potukalu tshinanu potuka kamhatshripyi. Rimathexyawakapna yine hanu hixatshine potu raluk-hixletna. Hasruklewlu pirana tshinanu hike pupjexikatshripyi, potuka hchinikanupyi.

⁸ Halikak-potu pirana tsonu kochtshekatshripyi, hi jikolukanurupni ptokanu. Wan-hixatshripyi hike hektutu rumukata tshinrenwakatanwuna ptokanu malukkane seyni hpatewatan-honukna.

⁹ Hijretanna towretshine hyijnakoxyawakna htowutjene. Ptowru potuka ralukanruna hkamhiywakapna towretshine. Hi ruhjetanna htowutjene.

¹⁰ Htowutjene hejnunkate hi rumutukanna towretshine seyni ptowruka tshinanu himnanhikalunepni rimathexikowakapna. Wan-hixatshinepa Hoyakalu Wiwekkakjeru hasrujikolu pirana hepixatshine rixyawakapna ptowru potuyako.

Kihleru Kamhatshinepwu Haté Cristo Hapojinri Hohnepa Piranapni

¹¹ Klu tshinanu Hoyakalu hekhitlu repixle, hiweklu heneklewatatshri, rawamka ptowru yineru tshinanumka.

¹² Rasrukwu Hoyakalu mukchikhihlenutanutu hiyrunu xye tshijne halukanru pirana wuknojyawaka. Waluklu kihleru himat-nuretatshine wixyawakapa, potuka hchinikanurune wixyawaka, Hoyakalu hikchikhihlenreru wkamhiywakapa xye pirana papko.

¹³ Wkahwakjetlu kihler-potuko hohnepa hiyrun-koxa Hoyakalu tsru himukatatshri hiyrunu Wiwekkakjeru Jesus Cristo hoyaknu hiphujexikolu hohnepatka.

¹⁴ Renejnawa hixa repixyawakapa. Wan-rixa hkochpajyawakapwu ptowru jikolukanuruya ruhlexyawakapwu waleko rayinetene wixyawakapa, jmererunepwu kihleru kamhalu tshinanupa.

¹⁵ Xyekaka pirana punkakletanu Tito, pujretlewatanu, puykolewatanu ptowru towutlewluyma. Hike yineru heyikanyi.