Tito 1 - Bíblia

Haliklu Piranapni

¹ Hita, Paulo-no, Hoyakalu towrerno. Jesus Cristo nurrerno. Hoyakalu nurrene halixlepa tshinanu nyokanatka. Hiyrun-koxa nyokanatka Hoyakalu halukanru homkahixikolu himathexikowakapa halikakalutu tokantshi tshinanu.

² Hiweklu hikeklu hohne mnikawnakatu kahwajikolu tshinanni. Hoyakalu, mimat-weyawatkatu, hinkakletlu xye hiwejikolu mnikawnakatu pirana xye tshiji muyakotkonuklunuwa papko.

³ Hiyáhoni waleko hnurre papko, ruphujetlu htokanu, hinkaklewatatshineya. Wiwekkakjeru Hoyakalu, ntowutjeru, hit-potuko reneklu xye kamrurtshi.

⁴ Tito tshinkaluru, noturu pixkalutu potuko halixlu tshinanu, pixa tshinanupni twu yonawahlo. Hepixkalurupyi Hoyakaluya, hetwamonutkalurupyi, hike pikatshripyi Hirtshi Hoyakaluya hiyrunu Tsru Hixikatshriwa Jesus Cristo-ya, Wiwekkakjeru.

Cristo Halixatshine Hapatjetatshine Kosekjene Piranapni

⁵ Creta poktshi, tshinikowaka nuknokatkayi, puhlepokoxyawakaplu muhletkaka wane hajeru. Hiyrun-koxa Cristo halixatshine hapatjetatshine kosekatshinepa putakanu ptowru poktshikaka, ntowuxyawakatkayi pixka, pixyawakapa.

⁶ Hetanu ho rawhe yineru hike mixkatu, pa hnunropkalutu, hiwhenene ptowru kahwakpirluymalunepni, hi malixkane hchinikanu pixka rixanna, malixkane hma tshinikolupna, hi kmajnakowaklerunepni hiwhenene.

⁷ Klu tshinanu Cristo halixatshine hapatjetatshine kosekjeru haluklu hike mixkatu rixyawaka, Hoyakalu kamrure hepixatshripni wale, hi chiko hchinikanurupni, hi jihekanuwhapkatatshripni, hi katsholu jiraklerupni, hi kyahotkakaklerupni, hi tiyiro herupni.

⁸ Yanamtatshine hapojini kihle yoptole rixanna, jejine kchinikanurune hamotatshripni, kchinikanurupni, kihler-potuko himat-nuretatshripni, potuka hchinikanurupni, waleko himane himat-towutatshripni.

⁹ Halikakalutu tokantshi hasrukakanaxikolu pirana homkahpotutatshripni, rumukata hiykoletna tokantshi heyikatshine hiyrunu rumukata halixkota Hoyakalu hasruklewlu halikakalutuyma.

Hoyakalu Tokanu Hasruklewatatshine Minje Piranapni

¹⁰ Klu tshinanu halikaka hi heppikna mchinikanune, tokantshi hike mkochpakkatu pirana kochtshekatshine. Hiyrun-koxa híxona yokwijrewatatshine. Jiprojhaptojru pirana homkahitatshine potukni wan-hixjeta.

¹¹ Rujhaluna rutshrokkajikowakna klu tshinanu rumtukahchinikanutna yine pa pji pejnu hwatshine. Tokantshi mujhakotu rasrukjetna yine tiyiro hkayaxyawakapna tshinanu.

¹² Satu wannako hipirana hinkaklewjetatshri Creta hajene pirana hkochtsheka, wla htshina: “Creta hajene kayloklerunni wanna. Hocha hajeru kmatsyirune pixkalunni. Tsru nikatshinni, mmerenni.”

¹³ Hiyrun-koxa halikaka piranni wale pirana. Hiyáhoni hijretanna hipokananu halixlu poyehixikolu rumukata homkahrexyawakapna.

¹⁴ Judeu-ne hinkakle, waleni hinkakluchakaka. Yineru hiykolechani wale. Hi romkahitlu halixlu.

¹⁵ Powra hchinikanurune tshinanu ptowru potuko powratka. Seyni hektu hchinikanuru, malixkatu, hikenni powralu seyni haté ruchinikanretlerna hiyrunu rajna hi powra seyni himtukalewatatshrini wale ptowruka.

¹⁶ Hoyakalu hima rimatna seyni hkamhalerna tshinanu rimathexikowaka hi halikaka htshinna. Heyikalunetka, kmajnakowaklerunni hiyrun-koxa ptowru kamhalu tshinanu mpoyahokakanni.