Romanos 3 - Bíblia

Hoyakalu Hi Yohikanru Htokanu Piranapni

¹ Hiyáhoni klunerhe rawyana judeu-nerune, judeu mixkane pnute? Klunerhe repixlewaxya jiprojhalu?

² Tsru potuko repixlewaxya judeu rixkaklewaxyawaka. Mitshikananhapka klu tshinanu Hoyakalu henekna judeu-ne htokanu rimwiywakna.

³ Ha xawakni, hanhe rixna satkaka hma malixlenna tshinanu? Ha xawakni Hoyakallahe yohikanru htokanu?

⁴ Hike, hi psojikna. Hoyakalu hikeklu hweyawata yáholu yine ptowruneko kayloklerunemkani seyni Hoyakalu hike. Hiyáhoni Hoyakalu tokanu yonatkaluru wan-tshina: “Pimathexikowakapni pixa Hoyakalu potukalyi kluneruktako ptshina hiyrun-koxa pimalwutko yahmaklu pweyawyehitko.”

⁵ Seyni hi he xawaka wektunu hiphujetlu Hoyakalu hihlenu? Hanu wtshin-hihretanru xye? Wumukata wla tshinrehetkota, Hoyakalu hetko pupjeta rapnokaxyawakwu. (Seyni hewiya yine hchinikanu pixka ntshinachaxya.)

⁶ Maka hike! Klu tshinanu Hoyakalu mpotukatu rixkamka himka rimat-hikolukanuwnayehjixanna ptowruneko yine.

⁷ Hiyáhoni nmajnakowaxini hi he xawaka rimalwutko Hoyakalu pimrineya? Klu tshinanu rimathexikowaka potukalu rixyawaka Hoyakalu nektunu tshinanu. Hiyáhoni kluneru tshinanhe napnokatko nektunu tshinanu, wtshinjeta?

⁸ Wan-rixkamka wlamka wtshinanu: “Wuya, hektututshi wkamhanu kihleru hakanhiywakapa.” Wane htshina hapatlexinnona pimrine seyni wane ntshinjenepni rapnokatkonna halikaka.

Ptowru Yineru Hektuwaka Kamhatshri Hixyawaka Piranapni

⁹ Hiyáhoni ha wanna judeu-ne xawaka hixa yohnik-hihlenurunrahe? Hike, hi psojikna klu tshinanu wekhixnatkawa judeu-neru hiyrun-koxa judeu mixkane pixkakakanni klu tshinanu rektunna tshinanu.

¹⁰ Wla htshina yonatkaluru tshinyawakakotnaka: “Hi satukna yineru potukalu.

¹¹ Hi satukna himatjematshri. Hi satukna Hoyakalu homkahitatshri.

¹² Wanna ptowruneka howuka hwa Hoyakaluya. Pupjetatshinni wanna ptowruneka. Hi satukna kihleru kamhatshri, hi satuknako.”

¹³ Hiplamna hatatjewa yomletshi hihpukatshri. Hinruna hweyawaxyana tokantshi hipnakaklewatatshri. “Himnu kamaklewatatshri pixka rixa hinamna hichpajikatshri.”

¹⁴ “Hinamayna katseplu hektutu htshinrena.”

¹⁵ “Hchiretna yine hsalexyawakna hiyrunu ruylalewaxyawakna.

¹⁶ Hanukta hyapna ranikluna himtuklewlu, tsru saletlewlu.

¹⁷ Hi rimatluna hapnanuhchinikankaklewlu pirana.”

¹⁸ “Hiyrun-koxa hi hpikluna Hoyakalu.”

Moisés Hiykole Yonatkaluru Miwekkaklewatkatu Piranapni

¹⁹ Seyni wimata Moisés yonreru tshinyawaka wan-tshinanwakatna Moisés yonreru pirana homkahitatshine. Wan-rixa klu tshinanu hike yineru himukata powratlexinwa seyni ptowru tshijne hajeneko hikolukanuwnatka Hoyakalu hetanuya.

²⁰ Seyni hike yineru Moisés yonreru kamhatshri powratko Hoyakalu hetanuya. Klu tshinanu Moisés yonreru pirana rimathexikatka muhletu rixyawaka yineru.

Jesus Cristo Halixatshri Tsonu Piranapni

²¹ Seyni Hoyakalu hali hiphujetletatkalu Moisés yonreru mwaknuklunuwa rawapiranatatka hpowraxikowakna yine Hoyakalu hetanuya. Xye pirana rekhita Moisés yonreru pirana hiyrun-koxa Hoyakalu tokanu hinkakletatshine hiphujetlu.

²² Wpowratjerni Hoyakalu walixle Jesus Cristo tshinanuya. Ptowru halixatshri pejnu wan-hixka; klu tshinanu hikewani yineru pnuko hixatshriwa,

²³ seyni ptowru potuko yineru hektuwaka kamhatshrini hiyáhoni Hoyakalu hoyaknu hpupjexyana.

²⁴ Seyni Hoyakalu powratachatlu yineru, hi rujhalu hwenuxikowaka, Hoyakalu henekachalewata klu tshinanu Cristo Jesus wenutatkalu.

²⁵ Hoyakalu heneklu Cristo henekachaluru hiylatkaluru rixyawakapa hiyáhoni cruz rupniywaka tshinanu, yineru hektunu hiknokatshri rixyawakatka Cristo, ptowru yineru munanhalerutkani Cristo. Hoyakalu wan-hixa rekhixyawaklu potukalu rixyawaka. Mitshikananu Hoyakalu hetachatna hektuwaka kamhatshine, hmachiretannu tshinanu; hiyáhoni hi rapnokatna rektunna.

²⁶ Seyni xawakni Hoyakalu henekatkalu Cristo rekhixyawakaplu potukalu rixyawaka. Potukalni Hoyakalu hiyáhoni hpotukatanru Jesus halixatshripa.

²⁷ Hiyáhoni wumukata tserpiranatlexnawhe hix-nanuko? Hike! Kluneru tshinannihe? Moisés yonreru pirana womkahixyawakatka tshinanrahe? Hike, seyni Jesus walixyawaka tshinanni.

²⁸ Hiyáhoni wimatjemlu Hoyakalu powratlu yineru ralixle tshinanu tsonu seyni Moisés yonreru pirana romkahixyawaka hi powratlu yineru.

²⁹ Hkahwakhe judeu Hoyakalute tsonni, hi he judeu mixkane Hoyakalut-koxni wale? Hehe, halikakni, judeu mixkane Hoyakalut-koxni wale.

³⁰ Klu tshinanu Hoyakalu satupkalu. Hiyáhoni wale powratlu judeu-neru hiyrun-koxa judeu mixkane ralixlena tshinanu.

³¹ Ha xawakni, wuknokachatatjerhe Moisés yonreru walixle tshinanu? Hike, hi psojikna wuknojinri seyni wpoyahokakanru Moisés yonreru.