Romanos 2 - Bíblia

Hoyakalu Hapnokatlewle Piranapni

¹ Hiyáhoni hi pkahwakanru powra pixyawaka wane ptshininri satu hektutu kamhatshri. Klu tshinanu peyijinri satu hektutu kamhatshri, wane potuko pixa heyiklexnawa. Klu tshinanu waneko pixka hixatshri koxyi pixa, pixa wan-tshina rukolukanuwninripa.

² Seyni wimatlu potukalni Hoyakalu wan-rixa hikoluklexnawana xyekaka kamhatshine.

³ Ha pixa, yineryi, rukolukanuwnana ptshinanwakatnahe xyekaka kamhatshine seyni waneko pixkalutu pkamhajeta. Pkahwakluhe pasujyalu Hoyakalu hapnokatlewle?

⁴ Ho peyikluhe xawaka Hoyakalu potshwanu, wale hchinikanu, hkahwakhohnekanaxyawakyi? Hi he puchiniklu Hoyakalu hihlenu kosejyawakyi pehchinikanuxyawakapa?

⁵ Seyni chiko haji pixini, pma mehchinikanhajitkanu tshinanu papatjeyehixnawa tsru jhekantshi hapnokaxikolu hohne tshinanu Hoyakalu hekhitlu hchinikannu potukal-potuko.

⁶ Klu tshinanu Hoyakalu henekanru satkaka yineru waleko hkamrure wenru kihleru ho hektutu.

⁷ Hoyakalu heneklewatanu riwejinri hikeklu hohne mnikawnakatupa hanunektako hi hituka kihleru kamhaleta hiyrunu Hoyakalu hpoyikoxyawakna hijhatshine. Hoyakalu honra rumuwkakpiratna hiyrunu riwejinrina mnikawnakatuko hijhatshine.

⁸ Seyni halixkoxikatshinwa, halikakalutu tokantshi majnakowyehitatshinewa hektutu romkahixyawakna, wanna hoho rapokanu Hoyakalu jhekanu hiyrun-koxa rapnokaxikolna.

⁹ Tsru salewaktshipni hiyrun-koxa wamontshi hapokhohotanru satkaka yineru riwejinri hektutu kamhatshriwa. Mitshikananhapka judeu-nerunepni waneya wane pnute judeu mixkane wan-hixko.

¹⁰ Waneya himalwutkalurupni, kahwakpiratkalurupni, kihlehchinikanrupni satkaka yineru kihleru kamhatshri wan-hixkomka, mitshikananhapka judeu-nerunemkapni waneya wane pnute judeu mixkane wan-hixkomka.

¹¹ Klu tshinanu Hoyakalu hike yineru hkahwakpirata.

¹² Hiyáhoni ptowruneka hektune Moisés yonreru mwikane wan-hixatshinepniko, Moisés yonreru mwikanepniko hamhanuna. Hiyrunu ptowruneka Moisés yonreru majnakowaxikatshine rukolukanuwnanna Moisés yonreru tshinanu.

¹³ Klu tshinanu Moisés yonreru yijnakochatatshine hi ruhletkana Hoyakalu hetanuya seyni Moisés yonreru homkahitatshinepa hihletko.

¹⁴ Klu tshinanu judeu mixkane, Moisés yonreru mwikanemkani, seyni wane potuko rixinna ruphujetluna wannako rimwalerna htowutjerna yáholu Moisés yonrerumka hi rimwana.

¹⁵ Wan-hixatshinekni hekhitlu wan-rixna yáholu Moisés yonrerumka hi rimwana seyni rajiyna hiyrunu hihchinikanuyna rawa wale yonreru pixkalut-potuko. Hiyáhoni rimat-hichinikanuwatna ho kihlerahe hkamhana ho hike.

¹⁶ Waneklu hohnepa Hoyakalu hapnokatanru ptowru yine hchinikanu mimatyehikanatkotu ntshinyawaka kihle piranalu potuko hiwekkaklewatatshri pirana tshinanu Jesus Cristo tshinanuya.

Rapnokaxikowakna Judeu-ne Wannako Htshinanu Piranapni

¹⁷ Ha pixa xawaka? Judeu-neru ptshininwa, Moisés yonreru munanhatshriyi hiyrunu palixkoxnawa Hoyakaluneru ptshininwa.

¹⁸ Pixamka judeu himatlu Hoyakalu halujyawaka. Hiyrunu Moisés yonreru tshinanu ppoyaho himatletmaklu kihleru pnurexyawaka.

¹⁹ Pkahwajnawa mayhalene kosekatshriyi hiyrunu mapchahawaka hwatshine tshinanu, katalu pikahwajnawa pixa, judeu

²⁰ mahchinikanune hasrukatshriyi pkahwajnawa, mturune yimanruyi ptshinnawa. Pkahwaklu Moisés yonreru tshinanu pimwalu ptowru potuko himatkaltshi hiyrunu halikakalutu pirana.

²¹ Pimrine pasruka, haklu tshinanhe hi pasrujinwa? Punkakna hi htshowhuwatanu seyni pixa xawaka ptshowhuwatewhe?

²² Pixa wan-tshina: Hi himopatlewatanu, seyni pixa xawaka pimopatlewathe? Peyikjetlu mayawletshichakaka seyni wanepnawaka hinkaklewawakapjikaka hajeru ptshowhuxini.

²³ Palixkoxnawa Hoyakalu pirana pimwiywaka seyni pma mimretkanuklunru yonruru pirana hi he ppatetjetlu Hoyakalu?

²⁴ Hoyakalu tokanu yonatkaluru wan-tshina: “Hixa judeu-nhi hektunu tshinanu judeu mixkane hektuwaka htshinanwakatluna Hoyakalu.”

Judeu Halikakalune Piranapni

²⁵ Moisés yonreru pirana pomkahixini, pujhalu judeu jiprojhiynawakwa pixka pixyawaka hijhakalurni wale. Seyni yokanruru pmajnakowaxini, hi psojikna repixatkayi pjiprojhikolu.

²⁶ Klu tshinanu judeu mixkatu hi jiprojhiynawa seyni Moisés yonreru pirana potukalu romkahixini, hi he xawaka Hoyakalu kahwaklu hatatjewa hjiprojhiynatkawa?

²⁷ Hiyáhoni hixa judeu-nerunhi heyikanwakatko judeu mixkaneya klu tshinanu hixa himwalu yonatkaluru hiyrunu hjiprojhajexnawa wanepnawaka hixa majnakowaxyalu yonruru pirana seyni judeu mixkane homkahitlu Hoyakalu hiykole pirana yáholu hi hjiprojhiynawana.

²⁸ Hiyáhoni hanu pothe rixa judeu? Roho mane hi judeu hixkaklu yineru. Hiyrun-koxa hi jiprojhaptojimtaluko judeu hixkaklu yineru.

²⁹ Seyni judeu pixkalut-potni yineru hitokote hwatshri, waleni hihchinikanu histakkaluru seyni hi kotshiroyni, xyekni Hoyakalu kamrure hi yineru mixkonuyni yonatkaluru homkahitatshri tshinanni. Wan-hixatshri yineru Hoyakalu rimalwuxiko, hi yineruyapni.