Mateus 28 - Bíblia

Jesus Hiwejyawakatnaka Piranapni

¹ Waneya hyinuwakle seman-hohne, yetshpotukawa, Maria Madalena tshinkaluro hiyrunu sato Maria tshinkaluro yomletshi retapna.

² Chinpotukawa tshiji hiyolikpotutatka, satu hiwejikaluru Hoyakalu towreru, tenhohne hichpajikatshri hapokle tshinanu waneya rerutlu sotlu yomletshi hajeru waneya htuplahohotlu.

³ Rawrakle pixka rixhojita hiyrunu himkalu klat-potu neve pixka.

⁴ Waneya yomletshi hislahatshine soldado-ne, rutatakna waneya hipnatshine pixka rixanatkana, tsru hpiklena tshinanu.

⁵ Waneya hiwejikaluru Hoyakalu towreru tenhohne hajeru wla tshinna suxone: — Hi hpikanu, nimatlu Jesus, cruz hipnapikatshri hijha.

⁶ Hi hewitkalu seyni riwekatnaka halikaka, htshinyawaka potuko pixka. Wkata hina, hetapyawakaplu rukoluhakanaxyawaka.

⁷ Waneya chinpotukawa hyanu, rasruklene hinkajyawakapa, wla htshinanna: “Hipuktshi riwekkajikatka. Wale kosekamtanhi hixa Galileia tshijne. Wane hexinri.” Xawakni hichinikanru ntshinyahi.

⁸ Waneya yomletsh-yehi ruchpajyana suxone, hchiretna. Hpikmakna seyni rumuwahchinikanupotutkoxna. Rasukamtna rasruklerune runkakapyawakapna.

⁹ Waneya chinpotukawa Jesus yoptotna. Wla htshinna: — Kihlehchinikanuphi. Waneya suxone hapokanwakatlu, hsaprikjixitluna, rimalwuxyawakapluna.

¹⁰ Waneya Jesus wla tshinna: — Hi hpikanu. Hajewa, nomolene hinkakapanu Galileia tshijne hyiywakapna. Waneko rexinnona.

Yomletshi Hislahatshine Hinkakle Piranapni

¹¹ Rasruklene nwaka hyaka pchinikna suxone, satkaka yomletshi hislahatshri poktshi yatka runkaklewaxyawakapna tsru hixikatshinwa sacerdote-ne ptowru hakanhatshritka.

¹² Waneya tsru hixikatshinwa sacerdote-ne hiyrunu tsrukakalune judeu-ne hapatjeta hjemahchinikankajyawakapna hanu rixanna. Waneya tsru tiyiro renekatkana soldado-ne yomletshi hislahatshine.

¹³ Hiyrunu wanna wla tshinna soldado-ne: — Wla htshinanu: “Hoyetshno wumkakanaxinixka rasruklene tshowhutaplu himanni.”

¹⁴ Seyni xye pirana hjeminipa phuru Pilatos, wiynumsatanru hma kojwakahchinikanuxyawakanupa.

¹⁵ Hiyáhoni soldado-ne yoptotlo tiyiro waneya tsru hixikatshinwa sacerdote-ne tshinakjixyawakna potuko htshinatkana. Hiyáhoni xye pirana soldado-ne hinkakle hipalapiranatatka judeu-ne tskalaya haté xawakni.

Jesus Hakanhiywaka Galileia Tshijneya Piranapni

¹⁶ Waneya onze rasruklene Galileia tshijne hyatkana, himriji Jesus tshinyawak-potukna.

¹⁷ Jesus rexinixkana, rimalwutluna seyni pimrine satkaka hi halixlu.

Tsru Towutlu Piranapni

¹⁸ Waneya Jesus hapyehitna rasruklene waneya wane htshinna: — Hita henekka psol-potuko tsru hitakkaluru tenhohneya tshij-koxa.

¹⁹ Wale tshinanu hyanu. Hasrukanna ptowru tshijne hajene. H-batiza-tanna Hoyakalu Hirtshi hiwakaya, Hoyakalu Whene hiwakaya, Hoyakalu Hiwejikaluru hiwakaya.

²⁰ Hasrukanna kajnako rixyawakapna wale pirana psoluka ntowuthi hinkaklexyawaka. Hiyrun-koxa hixayma nwanu psol-hohneko hikeklu hohne mnikawnakatupa.