Mateus 15 - Bíblia

Judeu Hitsrukatenni Hasruklewle Piranapni

¹ Waneya satkaka fariseu-ne hiyrunu satkaka kasruklewaklerune hinanchitkaluru pirana hasruklewatatshine Jerusalém hiyakaxikatshine yanwakatlu Jesus. Waneya repomhaluna:

² — Haklu tshinanhe pasruklene majnakowaxyalu tsrunni hasruklewle pirana? Klu tshinanu merojikanekwa nika!

³ Waneya Jesus hihitna, wla htshinna: — Klu tshinan-koxhe hixa majnakowaxyalu Hoyakalu tokanu tsrunni hasruklewle pirana homkahixyawaka?

⁴ Klu tshinanu Hoyakalu wan-tshina: “Pkahwakpiratanru puru, punro.” Hiyrun-koxa Hoyakalu wan-tshina: “Katukta hektuwaka tshinanwakatlu ruru, runro, walepni hiylatkona.”

⁵ Seyni hixa wan-tshina: Satu jeji himwinri pa hixanu repixyawakaplu ruru, runro seyni wale wan-tshina rimwaleru henekachlu Hoyakalunupa,

⁶ hi rujhalu ruru runro repixyawakapa. Hiyáhoni hiknokachatlu Hoyakalu tokanu tsrunni hasruklewle pirana hkamhiywakapa.

⁷ Hixachatatshinhi! Hoyakalu tokanu hinkakletatshri Isaías-ni hinkakletpotuthi hixa. Wla htshina yonatkaluru:

⁸ “Nyi yine himalwutno hinama tsonuyma seyni hihchinikanuyna howukayno.

⁹ Hmahijeru himalwuretnona; klu tshinanu rasrujikolna yineru hinanchireru tsonu.”

¹⁰ Waneya Jesus tomhana hixolune yine. Wane htshinna: — Hyijnakotanno himatjemyawakapa.

¹¹ Hinama jihlojikatshri hi pitshotlu yineru Hoyakalu hetanuya seyni yineru pitshotjeru halikaka namtshi hichpakhimaxikatshri.

¹² Waneya rasruklene Jesus yehistsi hyana wla htshinruna: — Pimathe fariseu-ne hima rumtuwnahchinikanutna ptshinyawaka tshinanu?

¹³ Waneya Jesus wla tshin-hihretna: — Ptowru hitaklu Nuru tenhohne hajeru mutakanutu hitskihi potuko roplijiko.

¹⁴ Hi hkojwakahchinikanutanu wanna tshinanu; wannakni mayhalene kosekatshine. Mayhaletu kosejinri mayhaletu waneya wanna hepi mayhalene kapna rujrukanna.

¹⁵ Waneya Pedro wan-tshina: — Punkakanwu klu htshina xye yapkaklu pirana.

¹⁶ Waneya Jesus hepomhana, wla htshina: — Wanepnawaka hi he himatjemawa?

¹⁷ Hi he himatjemlu xye? Yineru nikleru mitshikananu hinama hyapa, wane pnute hisatu hya waneya himane ruchpajya.

¹⁸ Seyni tokantshi hinama hichpajikatshri hihchinikanu ruchpajya walekni pitshotlu yineru.

¹⁹ Klu tshinanu hihchinikanu hichpajikatshri hektutu chinikantshikaka, hiylalewlu, himopatlewlu, hapoklewlu, tshowhuwlu, yokwijrewlu, hiyrun-koxa hektuwaka htshinanwakaxyawaklu Hoyakalu.

²⁰ Walekaka halikaka pitshotlu yineru seyni merojikatukwa hnijini yineru hike.

Canaã Hajero Halixlewle Piranapni

²¹ Waneya Jesus wane hichpajya, Tiro hiyrunu Sidom tshinikowakastsi hyamta.

²² Waneya sato suxo Canaã-nero wanestsi hajero yanwakatlu Jesus, wla ttshin-saplewleta: — Tsru Hixikatshriwa, Davi-ni klopicha tshinkaluru, petwamonutanunno! Nchitsho salewnapotuta kamtshi tomane hajeru tshinanu.

²³ Seyni Jesus hike tshina. Hiyáhoni rasruklene hyehistsi rapokna waneya hipokananu ranjitluna, wla htshinna: — Psatkakamtanro xako klu tshinanu hixa hatjini hi tutuka saplewjeremxya.

²⁴ Waneya ruhitna, wla htshinna: — Nyokanatka carneiro-ne hamhatshine israel-nerune tsonu tshinanu.

²⁵ Waneya tunatka suxo, tyoptsojityehitlu Jesus, waneya wla ttshinru: — Tsru Hixikatshriwa, pepixanunno.

²⁶ Waneya ruhitlo, wla htshinro: — Hi kihleru hkonikowakna mturune hnikanruna kawene nwaka ruknojikowakapa.

²⁷ Waneya wla ttshinru: — Wanekni, Tsru Hixikatshriwa, seyni haté kawe whenen-koxa niklu nijittshi hpuratjeru mesa-te hijrujikatshri.

²⁸ Waneya Jesus wan-tshinro: — Suxo, palixle tsru potuko. Panijitanru penekko. Waneklukawa potuko tutskalhatka tchitsho.

Hixolune Rutskalajyawaka Jesus Galileia Powha Sretaya Piranapni

²⁹ Waneya Jesus wane ruchpajya, Galileia powhastsi hyapakananumta. Waneya satu himriji ratskotatka, wane htuplaxya.

³⁰ Hixolune yine hanikanwakatlu satkaka myape, satkaka mayhaletu, satkaka myanumatkatu, satkaka myankatu hiyrunu hixo pimrinkaka yeyixatshine ranikna waneya Jesus jixi yehistsi rutakna. Waneya Jesus ptowruneka hitskalakatka.

³¹ Hixolune hetlu myanumatkanekananu yanumaxyawaka, hiyrunu myapenekananu kihletka, retna myankanekananu yanyawakatka hiyrun-koxa mayhalenekananu hetatka. Waneya xye rexinna, rimyekahchinikanutna, rimalwutatkaluna Israel Hoyakalute.

Jesus Quatro Mil Yine Hohluxyawaka Piranapni

³² Waneya Jesus tomhana rasruklene, wla htshinna: — Netwamonutna nyi yine. Map-hohne hitaymana hiyrunu malechayna hnikanruna. Hi naluka yokanretna mnikkane hma muhrojyawakanupna hatnu hapoya.

³³ Waneya rasruklene wan-tshinru: — Hanhe wixa hikchikletanru pão hewi kahnete poktshiri hixolune yine wohluxyawaka?

³⁴ Waneya Jesus hepomhana: — Hi pejnu pão-pro himwa hixa? Ruhitluna, wla htshinruna: — Sete pão-pro wimwa hiyrunu satkaka chima mtseroto.

³⁵ Waneya Jesus tshiji tuplakjixna hixolune yine.

³⁶ Waneya hkochtsheklu sete pão hiyrunu chimane. Rali poyahnutlexini, hjiknajrotlu, rasruklene reneklu waneya rasruklene heneksatna hixolune yine.

³⁷ Waneya ptowru yineru nikatka, jinanutkana. Waneya rasruklene tsepotlu sete chiwatu nijittshi hixetatshrini.

³⁸ Nikatshine pejnu quatro mil jejine, suxone mturune hi hitakyahokka.

³⁹ Jesus hali yokanrexinixkana hixolune, kanawa hpokowna, Magadã sreta hya.