Mateus 14 - Bíblia

João Batista Hipninri Piranapni

¹ Waneya phuru Herodes, Galileia tshijne pohire, hjemyehitlu Jesus kamhajekanatanru pirana,

² waneya wla htshinatkana htowrene: — Xyekni hetko João Batista-ni; hipuktshi riwekkajikatka! Wale tshinanu tsru kpixkonru xawakni.

³ Wane htshina klu tshinanu Herodes preso rutakjixniru João-ni, rostukjixniri waneya preso rutakniru Herodes repuru Filipe hnunrotakanatanro Herodias tshinkaluro tshinanu.

⁴ Klu tshinanu João-ni mitshi wan-tshinatkalu Herodes hinanchitkalurni pimwiywaklo.

⁵ Herodes-mka haluk-hiylaletniru João-ni seyni hpikna yine klu tshinanu yine kahwakniru satu Hoyakalu tokanu hinkakletatshrini.

⁶ Seyni Herodes hohneru tshinanu Herodias tshinkaluro hchitsho hahsata wanna hanikajite waneya Herodes hikchikhihlenupotutlo.

⁷ Tpoyikoxyawaklu tshinanu runkaklexyalo kluneruktako tanjitanu renekanro.

⁸ Waneya tunro hanjijixlo wla ttshinyawaka: — Xawakni potuko hewi penekanno prato-tlo João Batista jiwu.

⁹ Waneya phuru wamonuwahchinikanuta tanjixyawaklu tshinanu. Seyni runkaklexyalo htshanixlene hetanu tshinanu, renekjixatkalo.

¹⁰ Htowrene hyokanata hkastaknojixyawakapluna João-ni preso yehiya.

¹¹ Waneya makloji nwaka João-ni jiwu prato-tlo ranijyana waneya tunro yehi taniklu.

¹² Waneya João-ni hasruklene hapoka ranikmanetatkaluna. Hkapnatatkaluna. Waneya runkakapatkaluna Jesus.

Jesus Hixolune Yine Rohluxyawaka Piranapni

¹³ Waneya xye pirana hjemini, kanawa hpokowna kahnete poktshiri hya rapaluchaxyawakapa. Seyni hixolune yine jempiranyehitlu wane hyiywakapa hiyáhoni poktshikaka ruchpajyatkana, tshijiko romkahixyaluna.

¹⁴ Waneya ruptejinixka Jesus, retna hixolune. Retwamonutatkana rutskalakna ptowruneko yeyixatshine.

¹⁵ Waneya kayi rixinixka Jesus hasruklene hapyehitlu. Wane htshinruna: — Kayixkani hiyrunu hewi wwiywaka kahnete poktshirni. Pyokanatanna yine hixolune poktshikaka nwaka hyiywakapna rukchijyawakapluna hnikanrupna.

¹⁶ Waneya Jesus wla tshinna: — Hi rujhaluna hyiywakapna, hixa henekanna hnikanrupna.

¹⁷ Waneya ruhitna: — Nijittshi wimwalerutka cinco pão hepi chima tsonu.

¹⁸ Waneya wane htshinna rasruklene: — Hita nwakatshi hanikanru.

¹⁹ Waneya htuplakjixna ptowruneka peklomta hoho. Waneya Jesus kochtsheklu cinco pão, hepi chim-koxa. Tenhohne hyihata hpoyahnutlu Hoyakalu. Waneya hjiknajrotlu pão. Rasruklene reneklu waneya hixolune yine rapsatna rasruklene.

²⁰ Waneya ptowruneko nikatka. Jinanutkana. Waneya hkochtshekluna pão-ni hixetatshrini, chim-koxni, doze chiwatu htsepotana.

²¹ Nikatshine pejnu cinco mil jejine, suxone mturune hi hitakyahokka.

Jesus Honha Hoho Hyanamxyawaka Piranapni

²² Waneya Jesus hixolune yokanatka pchinika hkosekjixna rasruklene pa sreta powha hkopruhaxyawakapna kanawaya.

²³ Hixolune rali yokanrexinixka Jesus, walepka himriji hya ranjihohnexyawakapa. Kayi rixinixka wale tsonu wane hwakanata,

²⁴ seyni kanawa hownahatkalo hiyrunu tsru kanniphalu satkajyawaklo tshinanu tenoplojhalu yotkajimtlo kanawa.

²⁵ Waneya hoprikako Jesus yanwakatna rasruklene, tsru powha honha hoho hyanamta.

²⁶ Rexiniklunruna Jesus honha hoho hyanamxyawaka, hpikpotuthonukna. Tsru pikluyma wla htshin-saplewletna: — Samentshitkani!

²⁷ Seyni waneklukawa potuko Jesus wan-tshinna: — Hixkohchinikanuphi, Hitni! Hi hpikanu.

²⁸ Waneya Pedro wla tshinru: — Tsru Hixikatshriwa, pixa rixini halikaka, ptomhanno pixa nwaka nyiywakapa tsru powha honhamta hoho pyanakjixanno.

²⁹ Waneya Jesus wan-tshinru: — Punanu. Hiyáhoni Pedro honha hoho yinuwaka yanwaklexyalu Jesus.

³⁰ Seyni hixko nniphalu hjeminixka, hpikatka, hyinuwaka himxiklemtanatka waneya wla htshin-saplewleta: — Tsru Hixikatshriwa, pepixanno nmahyejyawakanupa!

³¹ Waneklukawa potuko Jesus homyokanwakatlu Pedro, hkachitlu. Waneya Jesus wla tshinru: — Pixa pso halixle jijiryi! Klu tshinanhe putuk-munanhaletno?

³² Waneya kanawa hyohrejinixkana, kanniphalu hitukamtatka.

³³ Waneya rasruklene kanawa hwakanatatshine yoptsojityehitlu Jesus. Wla htshina himalwuretluna: — Pixni halikaka Hoyakalu Whenyi!

Genesaré Tshijne Rawyawaka Jesus Piranapni

³⁴ Waneya rali kopruhalexinixkana, Genesaré tshijne rapokna.

³⁵ Waneya wale tshijne hajene himathetatkalu Jesus hiyáhoni hpohitatkaluna Jesus hapojyawaka pirana wale sreta psoluka. Yeyixatshine ptowruneko ranikanwakatluna

³⁶ hiyrunu ranjipotutluna yeyixatshine hyotnejyawakluna Jesus mkalustsipto waneya katukta yotneklu rutskalhatka.