Mateus 13 - Bíblia

Hitaklu Tataji Jiplaljekleru Piranapni

¹ Wale hohne potuko Jesus hipji ruchpajyatka waneya Galileia powhastsi hyatka. Waneya htuplatatka.

² Seyni hixolune yine hapatjeyehitlu Jesus hiyáhoni sato kanawa hpokownatka htuplaxyawakapa. Waneya hixolune yine ksatuko yopkaka.

³ Waneya hi heppika pirana rasrukna Jesus yapkaklu piranayma. Waneya Jesus wan-tshinna: — Satu jitaklewakleru hichpakamta rutaklewaxyawakapa.

⁴ Waneya ruplaljetatajixinri, pimriji hatnu hapostsi hapoktatajita waneya kochitshine nikloktatajitanruna.

⁵ Pimriji sotlu hoho mteno tshijiwaka rapoktatajita. Waneya ruptshekhapkatamka klu tshinanu mteno tshijiwaka ruptshejya.

⁶ Hiyáhoni ruchpajinixka tkatshi, hjimanatkalu, riprihanatka hitaklukaka hma matskinu tshinanu.

⁷ Pimriji kona yehi hapoktatajita. Waneya konaymakananuko htseruwna hiyáhoni hkakmokanatkalu.

⁸ Seyni hitataji kihle tshijiwaka hapokatshinetka hixolewnatka hiyáhoni satkakaji pejnu tshinanu cem-ji rawatka ho sessenta-ji ho trinta-ji rawatka.

⁹ Waneya Jesus wan-tshinna: — Kajnakopnahi hyijnakoxyawakapa, hyijnakotanu.

Jesus Hasrujyawaklu Klu Hyapkakleta Jiplaljekleru Pirana

¹⁰ Waneya Jesus hasruklene Jesus-stsi hapoka waneya repomhaluna: — Klu tshinanhe yapkaklu piranayma punkakletna wanna?

¹¹ Waneya Jesus wan-tshinatkana: — Hixamka henekka himaxyawakaplu mimatyehitkotu pirana tenhohne pohirewaxyawaka pirana seyni wanna hike.

¹² Klu tshinanu katukta himatjemlu, Hoyakalu pnute rimatjemkakanru wale haté rimatjempotuxyawakaplu. Seyni mimatjemkatu haté rimatjemlejiji hkonanu Hoyakalu.

¹³ Wale tshinanukni yapkaklu piranayma nasrukna. Klu tshinanu halikaka retmakna seyni hi rapkathojitna; hjemmakna seyni hi hyijnakopiratna hiyrun-koxa hi rimatjempiratna.

¹⁴ Hoyakalu tokanu hinkaklewatatshri Isaías-ni wane pixka hixatshine yonyehijekanata, wane htshina: “Hyijnakotmaklu seyni hi himatjemanru; hetmaklu seyni hi himathetanru.

¹⁵ Hoyakalu wan-tshina: Klu tshinanu xye yine hchinikanu hi himatjempirata; ruchyajnakotna hiyrunu ruchyayhaletna. Wane hmixkanuklunumkana, rumukata hetletmakna hiyrun-koxa rumukata yijnakoletmakna. Wanna hchinikanu himukata himatjemletamka hiyáhoni rehchinikanutanumkana numukata hitskalakletmakna.”

¹⁶ Waneya pnuteko htshina Jesus: — Seyni hihlewahchinikanyehitka hixa! Klu tshinanu hiyhale hapkathojita hiyrun-koxa hijnako yijnakota.

¹⁷ Hichinikanru xako xye: Híxona Hoyakalu tokanu hinkakletatshinni hiyrun-koxa pimrine potukalunni haluk-hetletmaklu hixa hetanru seyni hi rumukatatkana; hiyrun-koxa raluka yijnakoletmaklu hixa yijnakotanru seyni hi hyijnakotluna.

¹⁸ — Hyijnakotanu himatjemyawakaplu yapkaklu jiplaljekleru pirana.

¹⁹ Hatnu hapostsi hapoktatajitatshri yaholni Hoyakalu pohirewaxyawaka pirana jematshri. Hjemmaka seyni hi rimatjemlu. Waneya runa Satanás kamtshi hkonyawakaplu Hoyakalu tokanu raji hitakkaluru.

²⁰ Sotlu yehi hapoktatajitatshine wannani Hoyakalu tokanu jematshine, waneklukawa potuko tsru poyikowluyma yoptotatshinetkani

²¹ seyni pchini tsonu hwatshinepni klu tshinanu matskitni wale. Runini yahtaletlewlu ho salewaktshi Hoyakalu pirana tshinanu, ramtakanruna tokantshi hjemlerna.

²² Waneya hitataji kona yehi hapoktatajitatshine wanna Hoyakalu tokanu jematshine pixkalune seyni kojwawaktshi xye hohne hajeru tshinanu ho pohirewnalu yokwire hakanhinipa, hkakmokannatkalu hiyáhoni hi hjiwatanatkana.

²³ Seyni kihle tshijiwaka hapoktatajitatshine wannani Hoyakalu tokanu jematshine, rimatjemluna hiyrun-koxa hjiwatanutkana: satu trinta, satu sessenta, satu cem kata pnute hjiwatna.

Kchana Yapkaklu Piranapni

²⁴ Jesus satu yapkaklu rutakatnaka, wla htshina: — Tenhohne pohirewaxyawaka satu jeji kihleru tataji hsana jitaklewakleru pixkalutni.

²⁵ Seyni ptowru yineru himkakako pchinika, hkamnitjeru hsana hapoka waneya kchanatataji rutaka trigo-tataji hanikajiteya waneya hyatka.

²⁶ Waneya trigo hiptshejinixka, kaji rixinixka, kchana koxa hiphujewnatka.

²⁷ Waneya susanateru htowrene yanwakatlu waneya wla htshinruna: “Tsru Hixikatshriwa, hi he kihletatajiru putaka pusanateya? Ha hanhe ruchpajya xye kchana?”

²⁸ — Waneya ruhita: “Satu jeji nkamnitjeru wan-hixlu.” — Waneya htowrene hepomhalu: “Palukluhe wopliptshexyawakaplu?”

²⁹ — Waneya ruhitna: “Hike klu tshinanu kchanaptshe hoplixini, trigo koxa hoplitanu.”

³⁰ Hetacha tseruwnaletanna wanna hepi haté ramikolu papkopa. Waneya waneklu papko nunkakanna hamatshinepa: Mitshikananhapka, hapatjetanru kchana waneya hostuptajetanru tshitshipawa hiknokanru. Wane pnute hapatjetanru trigo, rimrexikowakapji hitakanru.”

Mostarda-tataji Piranapni

³¹ Jesus satu yapkaklu rutakatnaka, wla htshina: — Tenhohne pohirewaxyawaka mostarda-tataji pixkalutni. satu jeji haniklo, rusanate rutaklo.

³² Mostarda-tataji honukla pimri tataji kayaho mtsernurut-potu. Seyni ttseruwniniklunu wala pot-tseruwnatshroni ptowru hejnuji munaya. Hahmuna tixnawa waneya kochitshine teno yapatshine hina toplukaka hkamhachalexyawakna.

Chitshponatshri Piranapni

³³ Satu yapkaklu hkamhatnaka Jesus, wla htshina: — Tenhohne pohirewaxyawaka tserutatshri pixka rixa. Sato suxo hwalu. Mapa chiwatupso trigo pahi tyapjetlu haté psolujpako chitshponatka.

Klu Tshinanhe Jesus Yapkaklewaxyawaka Piranapni

³⁴ Xyekaka Jesus yapkakluyma hinkakna hixolune yine. Yapkaklu minjeyma hi runkakna.

³⁵ Wan-rixa hakanhaleta hpoyahokajyawakapa Hoyakalu tokanu hinkakletatshrini tokanu, wla htshina mitshi: “Yapkakluyma nyanumatanu, xye tshijne hiyakotkoklunukawa yohimakanatkaluru pirana nunkakletanu.”

Jesus Hasrujyawaklu Klu Hyapkakleta Kchana Pirana

³⁶ Waneya hixolune yehi ruchpajya, pantshi hjihlokatka. Waneya rasruklene yanwakatlu, wla htshinruna: — Puhle hinkakletanwu kchana hsana hajeru yapkakle pirana.

³⁷ Waneya wla htshinna: — Kihletatajiru jitakakleru walekatkani Jeji Whene.

³⁸ Hsanni xye tshijne. Kihletatajiru wannakatkani Hoyakalu pohirewaxyawaka hayinetene. Kchana walekatkani Hoyakalu kamnitjeru hayinetene,

³⁹ hiyrunu hkamnitjeru walekni Satanás. Ramikowaka walekni xye tshijne nikawninri hohnepa hiyrunu hamatshine wannakni hiwejikalune Hoyakalu towrerune tenhohne hajene.

⁴⁰ Kchanaptshe hoplikkaluru yoxijikolu pixka rixanna xye tshijne nikawninri hohnepa.

⁴¹ Jeji Whene yokanatanna hiwejikalune htowrerune tenhohne hajene rapatjexyawakapluna ptowru hitspekaklewatatshri hiyrunu hektutu kamhatshine Jeji Whene pohirewaxyawakaya.

⁴² Waneya tshitshmero ruknokanna wane rawanu tsru tshiyahlu haskiyhiru koxa.

⁴³ Hiyáhoni potukalunetka hatajiwnanu tkatshi pixka Rurna pohirewaxyawakaya. Katukta kajnakopnapa hyijnakoxyawaka, hyijnakotanru.

Halukkaluru Yohimatkaluru Piranapni

⁴⁴ — Tenhohne pohirewaxyawaka satu halukkaluru yohimatkaluru campo-ya pixkalutni. Waneya satu jeji hikchijiniklunru hyohimatatnaklu. Waneya hpoyiknu tshinanu, hyatka, rimwaleru psoluka ruchankatka, wale campo ranjixyawakapa.

Pérola Piranapni

⁴⁵ — Hiyrunuko tenhohne pohirewaxyawaka satu kmaronewakleru tuwutu kwenuru pérola tshinkaluru hijhatshri pixkalutni.

⁴⁶ Satu pérola kwenur-potuko rukchijiniklunu, hyatka, rimwaleru psoluka ruchankatka wale pérola ranjixyawakapa.

Tarrafa Piranapni

⁴⁷ — Hiyrunukotnaka, tenhohne pohirewaxyawaka satu tarrafa pixkalutni. Hipowha ruknokkoklunutka waneya ptowru hixatshro chima hkachita.

⁴⁸ Katsepo rixinixka, kchimahaklerune hwanha hkochpaxyatkalona. Waneya htuplatna, hkotspalatlona. Chima kihlero chiwatu rutakanna seyni chima muhleto ruknokachatna.

⁴⁹ Waneko pixka rixanu xye tshijne nikawninri papko. Hiwejikalune Hoyakalu towrerune tenhohne hajene hapokanu hkotspalaxyawakapna hektutu kamhatshine potukaluneya.

⁵⁰ Waneya tshitshmero ruknokanna hektutu kamhatshine tsru tshiyahluyma raskiyhixyawakna koxa.

Jesus Hasruklewle Herotu Hiyrunu Rasruklewakanaxyawaka Piranapni

⁵¹ Hiyáhoni Jesus hepomhana rasruklene, wla htshinna: — Xye piranakaklahe himatjematka? Waneya ruhitluna: — Hehe.

⁵² Waneya Jesus wan-tshinna: — Ptowru Moisés hiykole yonatkaluru hasruklewatatshri tenhohne pohirewaxyawaka himatyehitatshri satu kapjiru pixkalutni. Kapjiru pantshi hejnu herotu hiyrun-koxa hejnu tsrutsoleji himretawaka hkochpajyalu.

Jesus Nazaré Poktshi Rawyawaka Piranapni

⁵³ Xyekaka yapkaklu pirana rali hinkaklexinixka, pnute hya.

⁵⁴ Waneya Jesus htseruwniywaka poktshi Nazaré tshinikowaka rapokatka. Hyinuwaka hasruklewleta hanjihohnewakapjiya. Waneya ptowruneka himyekahchinikanuta. Waneya repomhakakna: — Hanhe ruchpajya rimatkalnu hiyrunu pixkontshi hetkalurkaka hkamhiywaka?

⁵⁵ Hi he hahmuna chpatako kamruretakleru José tshinkaluru whenni wale? Hi he Maria tshinkalurokni runro hiyrunu repurune Tiago, José, Simão hiyrunu Judas tshinkalune?

⁵⁶ Hi he hewi wimwana repurone? Hiyáhoni hanhe rukchijyalu xyekaka himatkalewlu hiyrunu pixkontshi?

⁵⁷ Wale tshinanu hike hijhatkalu Jesus. Seyni Jesus wla tshinatkana: — Satu muphujewnakatuwa pirana hinkakletatshri kahwakpiratka ptowruchayaka seyni waleko htshijneya ho waleko himolene tsonuyma hi hkahwakpiratka.

⁵⁸ Hiyáhoni hi hixo hetkalurkaka hkamha Jesus wale poktshiya hmalixlenna tshinanu.