Mateus 1 - Bíblia

Jesus Cristo Hitrsukatenni Piranapni

¹ Twu hinkakletlu Jesus Cristo hitsrukatene. Jesus Cristo, Davi whene, Davi, Abraão whene.

² Abraão wuhenetlu Isaque, Isaque wuhenetlu Jacó, Jacó wuhenetlu Judá hiyrunu Judá molene.

³ Judá wuhenetlu Perez hiyrunu Zerá, wanna hinrokni Tamar tshinkaluro; waneya Perez wuhenetlu Esrom; Esrom wuhenetlu Arão;

⁴ Arão wuhenetlu Aminadabe; Aminadabe wuhenetlu Naassom; Naassom wuhenetlu Salmom;

⁵ Salmom wuhenetlu Boaz, Boaz hinrokni honra Raabe tshinkaluro; waneya Boaz wuhenetlu Obede. Obede hinrokni honra Rute tshinkaluro. Waneya Obede wuhenetlu Jessé;

⁶ Jessé wuhenetlu pohirtshi Davi (Israel pohire); Davi wuhenetlu Salomão pohirtshi. Salomão hinrokni Urias tshinkaluru hnunro.

⁷ Waneya Salomão wuhenetlu Roboão; Roboão wuhenetlu Abias; Abias wuhenetlu Asa.

⁸ Asa wuhenetlu Josafá; Josafá wuhenetlu Jorão; Jorão wuhenetlu Uzias;

⁹ Uzias wuhenetlu Jotão; Jotão wuhenetlu Acaz; Acaz wuhenetlu Ezequias;

¹⁰ Ezequias wuhenetlu Manassés; Manassés wuhenetlu Amom; Amom wuhenetlu Josias;

¹¹ Josias wuhenetlu Jeconias hiyrun-koxa himolene judeu-nerune Babilônia tshijne ranikkoklunna papko.

¹² Judeu-nerune Babilônia tshijne ranikkoklunna papko wkatanu Jeconias wuhenetlu Salatiel; Salatiel wuhenetlu Zorobabel;

¹³ Zorobabel wuhenetlu Abiúde; Abiúde wuhenetlu Eliaquim; Eliaquim wuhenetlu Azor;

¹⁴ Azor wuhenetlu Sadoque; Sadoque wuhenetlu Aquim; Aquim wuhenetlu Eliúde;

¹⁵ Eliúde wuhenetlu Eleazar; Eleazar wuhenetlu Matã; Matã wuhenetlu Jacó.

¹⁶ Waneya Jacó wuhenetlu José, José honra Maria tshinkaluro hnuru, walakni matkaklu Jesus, walekatkani Cristo tshinkaluru.

¹⁷ Hiyáhoni raptowrurna quatorze klopichane Abraão-klukananuko haté Davi-klu papko hiyrunu quatorze klopichanekotnaka Davi-klu papko haté judeu-nerune Babilônia tshijne ranikkoklunna papko hiyrunu quatorze klopichanekotnaka judeu-nerune Babilônia tshijne ranikkoklunna papko haté Cristo hapojinixka.

Jesus Matuxyawaka Piranapni

¹⁸ Waneya wan-rixa matreta Jesus Cristo. Runro, Maria tshinkaluro, José tshinkaluru hnunro tixinripa, seyni hi rapokmanetawalo tmichiwatatka Hoyakalu Hiwejikaluru pixkonuyma.

¹⁹ Seyni thanurupa José kihle hchinikanu rixle tshinanu, hi raluka patewkakletlo yine meyijyawakanuplo, hiyáhoni raluk-hiknoklechamtlo, hike mimaxyawakanuplu.

²⁰ Seyni wane ruchinikanretakanatawa satu hiwejikaluru Tsru Hixikatshriwa Hoyakalu towreru tenhohne hajeru hakanhayehitlu José rupnawleya. Waneya wane htshinru: — José, Davi whene, hi pkojwakahchinikanutanu Maria pipji panijyawakapa, phanunro tixyawakapa. Klu tshinanu Hoyakalu Hiwejikaluru tshinanu tmichiwata.

²¹ Tmatuwhenetanu jejipni. Putakhiwakatanru Jesus, klu tshinanu riwekkakanna rayinetene hkonahektunutanunpatka.

²² Xye ptowruka wan-hixa, hpoyahokajyawakaplu ptowruka htshinyawaka Tsru Hixikatshriwa Hoyakalu, Hoyakalu tokanu hinkakletatshriya Isaías-ni tshinkalurni, wla htshina:

²³ “Suxo, jeji mapokmanetanutowa michiwatanu, twuhenetanru jeji, hhiwakatko Emanuel.” (Emanuel raluka tshinreta “Hoyakalu hixaymalu”.)

²⁴ Waneya ruyojinixka José, hkamhalu htshinyawaklu hiwejikaluru Tsru Hixikatshriwa Hoyakalu towreru tenhohne hajeru. Ranikatkalo Maria hipji wale hnunro tixyawakapa.

²⁵ Seyni tma matuwhenetkanu pchinika Maria hi rapokmanetlo José. Tmatkakatkalu mitshikananu toturu waneya rutakhiwakatlu Jesus.