Marcos 1 - Bíblia

¹ Kihle piranalu potuko hiwekkaklewatatshri pirana yinuwajikolu Jesus Cristo, Hoyakalu Whene pirana.

João Batista Piranapni

² Wan-rixa yonretatkalu Isaías-ni Hoyakalu tokanu hinkakletatshrini: Wla htshina yonatkaluru mitshi: “Hita yokanatlu ntowreru pixa hnapu. Wale halpokotanru patnu hapote.

³ Kahnete poktshiri saplewaxikatshri tokanu wla tshinatshri: Halpokotanru Tsru Hixikatshriwa hatnu hapote. Hpotukatanru hatnu hapotkaka.”

⁴ João Batista kahnete poktshiri hiphujewniyatka. Runkakletluna yine h-batiza-xikolupna rehchinikanuxyawakna pirana, wla htshina: — Hehchinikanutanu hektunu tshinanu. Wan-hixko h-batiza-xikolupa hiyrunu hektuntshi hiknojiko Hoyakaluya.

⁵ Waneya hyanwakatluna ptowruneko Judeia sreta hajene Jerusalém hajen-koxa João hyijnakoxyawakapna. Waneya ruphujetluna rektunna waneya João batiza-tatkana wanna Jordão wenneya.

⁶ João mkalu camelo pixi kamhikolni, kpixnuru h-cinturão-te couro-mta kamhikolu. Hnijitni tsetseru, wrolha hocha hajeru.

João Hiphujtaxyawaklu Jesus Piranapni

⁷ Runkaklewata. Waneya wla htshina: — Xekoyaka runanu hita yohnik-himukatkalutu. Hita hi Tsru Hixikatshrino nkochpirojyaplu h-sandalha-tetslu.

⁸ Hita halikakni n-batiza-thi honhaya seyni wale batiza-tanhi Hoyakalu Hiwejikaluruya.

Jesus Batiza-xikolu Piranapni

⁹ Waneklu papko Nazaré, Galileia tshijne hajeru poktshi ruchpajya Jesus waneya João Batista batiza-tlu Jordão wenneya.

¹⁰ Waneya honha ruchpajyatka waneklukawa retlu hitpukatshri tenhohne. Retlu Hoyakalu Hiwejikaluru motkokoji pixka rixa hijruklemta, wale hohowaka rapoka.

¹¹ Waneya waneylu tokantshi tenhohneyalutu wan-tshinatshri: — Pixni Noturyi nalukanruyi, wale poyikowkakno.

Jesus Yohnixikolu Piranapni

¹² Waneklukawa potuko Hoyakalu Hiwejikaluru yokanatlu Jesus kahnete poktshiri hyiywakapa.

¹³ Waneya quarenta hohne pchinika kahnete poktshiri rawakanata. Wane Satanás yohnixyalu Jesus. Hocha hajene kmatsyirune tskalaya rawakanata. Hiwejikalune Hoyakalu towrene tenhohne hajene hepixlu Jesus.

Jesus Yinuwaka Kamrurewlexyawaka Galileia Tshijneya Piranapni

¹⁴ Waneya hkachitkoklunutka João, Jesus Galileia hya. Runkaklewata kihle piranalu potuko Hoyakalu pohirewaxyawaka pirana.

¹⁵ Waneya wla htshina: — Rapokpapkolutatka, Hoyakalu pohirewaxyawaka hi howukchinpatkalu. Hehchinikanutanu, halixanru kihle piranalu potuko hiwekkaklewatatshri pirana.

Jesus Nurexyawakna Satkaka Rikamrurewatjenepa Piranapni

¹⁶ Waneya Galileia powha wnaha hyapamxini Jesus retlu Simão repuruyma André. Ruknokamtatkaluna h-tarrafa-tna hipowhaya klu tshinanu wanna mariskatatshine kchimahaklerune.

¹⁷ Waneya wane htshinna Jesus: — Hinanu hwahatjinitanno, yine kmariskahohoklerune nixkakanhi.

¹⁸ Waneya waneklukawa potuko ruknokamtatkaluna h-tarrafa-tna, romkahitatkaluna.

¹⁹ Wane pnutejiji hyapamtatnaka retlu Tiago, Zebedeu whene repuruyma João. Wanna koxa kanawa hwakanata, ripxatluna tarraf-kaka.

²⁰ Waneya Jesus tomhana. Ruknokamtluna rurna Zebedeu kanawaya kkamrurewakleruneyma. Wane hyana, rawhatjinitluna.

Kkamtshiteru Piranapni

²¹ Waneya hjihlokamtatkaluna Cafarnaum poktshi. Waneya hapnanuxikalur-hohne rixinixka hjihlokluna hanjihohnewakapji rasruklewaxyawakapa Jesus.

²² Waneya rimyekna yine rasruklewle tshinanu. Klu tshinanu Jesus tsru towutatshri pixka rixa hasrukletna, hi kasruklewaklerune hinanchitkaluru pirana hasruklewatatshine pixka rixa hasrukletna.

²³ Waneya hi howukchiniyaka satu jeji kkamtshiteru hanjihohnewakapji hwakanatatshri saplewata. Waneya wla htshina:

²⁴ — Ya! Kluhe pixannatkawu Jesus Nazaré hajeru? Puna pumtukapyawakapwuhe? Nimatyi katyi pixa Potukalyi Hoyakalyi.

²⁵ Seyni Jesus hi hinanchitlu. Waneya wane htshina: — Potshkepyi. Puchpakanutka wale maneya.

²⁶ Waneya kamtshi kowchoklu jejni hipokananu, hsaplewata waneya ruchpakamtatka kamtshi.

²⁷ Waneya ptowrunek-yine himyeka. Hiyáhoni repomhakakna, wane htshinna: — Klunerni xye? Klu herotu hasruklewlutkani xye? Tsru hitakkaluruyma kamtshi ruchpakjixa. Hiyrunu kamtshine jemlu htshinyawakna.

²⁸ Waneya psol-tshijne potuko hpohiwhapkata Jesus pirana Galileia sretaya.

Pedro Himajiro Rutskalajyawaka Jesus Piranapni

²⁹ Waneya hajeyri ruchpakamxinixkana hanjihohnewakapji, wanna Tiago hiyrunu João-yma Simão Pedro hiyrunu himole André-pji nwaka hyatkana.

³⁰ Simão himajiro hikóluha tyeyixa. Waneya runkaksatluna Jesus wala pirana.

³¹ Waneya Jesus yanwakatlo. Waneya hkosemyotlo, hyotunkaklo. Tutuk-patshwalemtatka. Waneya tyomhatna.

Jesus Hitskalajyawakna Katshinomtalune Piranapni

³² Waneya kayi rixinixka rimxijinixka tkatshi ranikyehitluna ptowruneko yeyixatshine hiyrun-koxa kkamtshiterune.

³³ Ptowruneko tsru poktshi hajene pantshi hiphaptote rapatjexyana.

³⁴ Waneya Jesus hitskalakna hixo yeyixatshine ptowru hixatshri hahijewaktshi hwatshine. Maleka hyokanatna hixo kamtshine. Hi ritshi yanumsaletna kamtshine klu tshinanu rimathetluna.

Jesus Galileia Tshijne Yiywaka Piranapni

³⁵ Waneya yetshpotukawa hma mumrerekkanuklunuwa hyotunomta ruchpakamta Jesus. Waneya potshkewaka nwaka hya. Wane ranjihohnexya.

³⁶ Waneya Simão Pedro hiyrun-koxa waleymalune hijhaplu.

³⁷ Rukchijinixkaluna wla htshinruna: — Ptowruneko hijhayi.

³⁸ Waneya wla htshinna Jesus: — Hayewa pimri poktshikaka hwastsitanune yehi wyanu, wane koxa nunkaklewaxyawakapa. Wale tshinanukni nuna.

³⁹ Waneya Galileia tshijne psoluka hyapamtatka. Runkaklewakananumta wanna hanjihohnewakapjikakaya. Maleka hyokanatna kamtshine.

Jesus Hitskalajyawaklu Hijirohitutatshri Piranapni

⁴⁰ Waneya satu jeji hijirohitutatshri yanwakatlu Jesus. Hyoptsojityehitlu waneya ranjipotutlu wla htshinru: — Palujiniplu pumukata hitskalakletno.

⁴¹ Jesus hetwamonutlu waneya romyokanwakatlu. Hyotneklu. Waneya wla htshinru: — Hehe, naluka. Putskalakkatka.

⁴² Waneklukawa potuko rujirhitle ramhiyatka. Rutskalhatka.

^43-44 Waneya Jesus hijretlu wla htshinru: — Petanu. Hike punkakanu seyni pyanutka. Sacerdote pekhimantapinwa putskalhinrixka. Waneya panikanru henekachalu henekawaka nwaka Moisés-ni yonreru tshinyawaka pixka pimrine himaxyawakaplu putskalhiywakatka.

⁴⁵ Seyni jeji hichpakamtatka hyinuwaka kopalpiranretlu hixo pirana potuko. Hiyáhoni wale tshinanu Jesus hi himukata phujewaka tsru poktshikaka jihloklexyawaka seyni kahnete yine mwiywakanu yehi rawjekanatatka Jesus. Wanepnawaka ptowru sretako hichpajikatshine yanwakjekanatlu.