João 10 - Bíblia

Jesus Carneiro Suslahakleru Pixka Rixyawaka Piranapni

¹ Jesus wla tshina: — Halikakni, halikakni wla ntshinhi, hanuruktako yineru carneiro himjiywaka hruko hiphaptote hma yapkanuklunu seyni pnuko hyapini, waleni katshowhuru ho ktshowhuwakleru.

² Seyni hiphapto jihlojikatshri halikakni carneiro suslahaklerni.

³ Hiphapto hinotatshri hiphapto hkotpukyehitanru hiyrun-koxa carneiro-ne himat-tokanutlu. Waleko hiprane htomha satkaka thiwakaya. Hkosekna ruchpajyawakna.

⁴ Waleko hiprane hkochpajinixka, hkosekna. Carneiro-ne homkahitlu klu tshinanu rimat-tokanutluna.

⁵ Carneiro-ne hi homkahitanru satuko yineru hmetjejetanutu seyni rasujyaluna wan-hixatshri klu tshinanu hkahimtatokanutluna.

⁶ Jesus-mka hinkakna xye yapkaklu pirana seyni hi rimatjemluna klu pirana raluka tshinreta xye yapkaklu tshinanu.

⁷ Waneya wane pnute htshina hinkakleta Jesus: — Halikakni ntshinhi, Hitni hiphaptono carneiro jihlokawakleno.

⁸ Wanna ptowruneka hita pnute hapokatshine wannani katshowhurune, ktshowhuwaklerune seyni carneiro-ne hi rimatjemtokanutkana wanna.

⁹ Hitni carneiro jihlokawakleno hiyáhoni katukta hita hiknohanu riwekanu, hjihlokanu, ruchpakanu, rukchikanru hnikleru.

¹⁰ Seyni katshowhuru xye tshinanu tsonu runa htshowhuxyawakapna, ruylalewaxyawakapa, hnikaxyawakapna carneiro-ne. Seyni hita hina carneiro-ne jiwekle hixyawakpatka hiyrunu hiweklu hike mmahaxikatutka nenejyawakapna.

¹¹ Hitni carneiro suslahakleru kihlerno; carneiro suslahakleru kihleru hamtaka hiwekletanu pratshine tshinanu.

¹² Seyni pratshine kamrurewyehichatatshri, carneiro suslahakleru potuko hmixkanuklunu, pratshi mpuratkatu rixini, lobo rexini wale nwaka yamtatshri, ruknokachatna pratshine carneiro, rasuka honuka. Waneya lobo hakakna pratshine hiyrunu rupalkakna.

¹³ Pratshine kamrurewyehichatatshri hasukachata klu tshinanu pratshine kamrurewyehichatatshrini wale hiyáhoni hi ramotna pratshine carneiro-ne.

¹⁴ Hitni carneiro suslahaklerno kihleru hiyrunu nimatna noprane carneiro-ne. Hiyrun-koxa noprane himatno hita.

¹⁵ Waneko pixka Nuru Hoyakalu himatno hiyrunu hita himatlu Nuru Hoyakalu. Niwekle namtakanu noprane carneiro-ne tshinanu.

¹⁶ Pimrine pratshine carneiro-ne pixkalune nwiya hi xye carneiro himjiywaka hruko hajenni wanna. Wanna koxa nujha hwapleta. Ntokanu hjemanna. Pa xkehipkapna hiyrun-koxa carneiro-ne suslahakleru satupkaplu.

¹⁷ Wale tshinanu Nuru Hoyakalu hamotno. Klu tshinanu niwekle namtaka numukata kochtshekletatnaklu niwekle.

¹⁸ Hike yineru himukata kochtsheklexyano niwekle seyni namtakanru niwekle hitako nalujyawaka tshinanu. Numukata hamtakletlu niwekle hiyrun-koxa numukatle tshinanu numukata kochtshekletatnaklu niwekle. Nuru Hoyakalu towutno xye nkamhiywaka.

Judeu-ne Kotspalahchinikanuxyawaka Piranapni

¹⁹ Waneya hkotspalahchinikanutatnakna judeu-ne xye pirana hjemakanaxyawakna tshinanu.

²⁰ Waneya yine hixolune wla tshinanwakatlu Jesus: — Wale hetko kkamtshiterni, mahchinikanutni wale. Ha, klu tshinanhe hyijnakjetokanutlu xye?

²¹ Seyni pimrine wla tshina: — Htokanu, hi kkamtshiteru tshinyawaka pixka, htshina xye. Hiyrun-koxa rumukathe kamtshi rumrekhakajyawaklu mayhaletu?

Jesus Hoyakalu Rutajnawa Piranapni

²² Jerusalém poktshi tsru niklu hohneni, Nurexikolu hohne tshinkaluru hohneni. Katshikleru klu papko.

²³ Waneya Jesus Hoyakalupji psojite, Salomão tshinikowaka hyapamta.

²⁴ Waneya judeu-ne sajruklu Jesus waneya wla htshinruna: — Hi pchini hohnehe pkojwakahchinikankakanwu hixni? Cristo tshinkaluru pixini halikaka, punkakpotutanwu.

²⁵ Jesus wla tshinna: — Nunkakamkatkahi seyni hi halixa. Kamrurtshi, nkamhaleru Nuru Hoyakalu towuwle tshinanu, wale hiphujtatno.

²⁶ Seyni hixa hi halixa klu tshinanu hixa hi n-carneiro-tene hwawakle hajenhi.

²⁷ Noprane carneiro-ne pixkalune jemtokanutno, nimatna hiyrunu romkahitnona.

²⁸ Nenekanna hiweklu hike rixiniko mnikawnakatu. Hikeklu rupnanna hiyrun-koxa hi satuknako yineru himukata ninotle yehi kochpaklexyana.

²⁹ Nuru Hoyakalu pratshine carneiro-ne pixkalune nenekjeru, ptowru potuko tsru potni wale. Hi satuknako yineru himukata Nuru Hoyakalu hinotle yehi kochpaklexyana.

³⁰ Hita hiyrunu Nuru Hoyakalu satupkalunwu.

³¹ Waneya judeu-ne sotlumka hkochtshekatnakna hsotlujexyawakamkapluna.

³² Waneya Jesus wla tshina: — Hixo kamrurtshi kihleru, Nuru Hoyakalu kamhakjixleru, nekhithi. Hiyáhoni hanuru kamrurtshi xyekaka nkamhaleru tshinanu hsotlujetanmakno?

³³ Waneya judeu-ne kosekatshine hihitlu, wla htshinruna: — Ha, hi satu kamrurtshi kihleru pkamhaleru tshinanu wsotlujetyi seyni hektuwaka ptshinanwakaxyawaklu Hoyakalu tshinanni. Klu tshinanu pixa yineruchayi seyni putajnawa Hoyakalu pixka pixnawa.

³⁴ Jesus hihitna, wla tshinna: — Yonatkaluru homkahjereru pirana, wla htshin-yonhata, “Hita wane ntshinhi, Hixni hoyakalunhi.”

³⁵ Hoyakalu tokanu yonatkaluru hi hiknokko hiyrunu htokanu henekkalune hoyakalune htshinna.

³⁶ Seyni wanepnawaka hixa wan-tshinanwakatno hita Hoyakalu Nurrerno, Hoyakalu yokanreno xye tshiji napojyawaka seyni wanepnawaka hektuwaka ptshinanwakatlu Hoyakalu, htshinjetno. Seyni wane htshina klu tshinanu wla ntshinnawa Hoyakalu Whenno, ntshina.

³⁷ Nuru Hoyakalu kamrure nma kamhaknumka waneya hi halixanno halikaka.

³⁸ Seyni Hoyakalu kamrure nkamhini halikaka, yáholu hi hita halixini seyni kamrurtshi nkamhaleru halixanu. Himaxyawaklu hiyrunu halixyawaklu Nuru Hoyakalu himwano hita hiyrunu hita himwalu wale.

³⁹ Hiyáhoni wannamka hiyrunukotnaka haluka kachretlu Jesus seyni wanna rasujyatka.

⁴⁰ Waneya Jordão wenne pa sreta wnahlu, João mitshi batiz-jekanaxyawaka yehi hyatnaka Jesus. Waneya wan-rutukatka.

⁴¹ Hixolune yine hapatjeyehitlu Jesus waneya wla htshinkakna: — João tshinkaluru hikeklu hiyákolu hkamha seyni ptowru xye jeji pirana runkakletahnapuxyalu mitshi halikakni.

⁴² Waneya wane hajene hixolune yine halixatkalu.