João 1 - Bíblia

Tokantshi

¹ Hyinuwajikolu rawa tokantshi. Hoyakaluymatkalu Tokantshi hiyrun-koxa Hoyakalukni wale Tokantshi.

² Hyinuwajikolukananukotka Hoyakaluyma rawatka Tokantshi.

³ Hoyakalu ptowru potuko ruyakota waleyma. Hikepotukni ruyakoleru Hoyakalu wale minje.

⁴ Tokantshi hiwekluni. Xye hiweklu katalni yine nikotyehitatshri.

⁵ Katalu nikotlu mapchahawaka hiyrun-koxa mapchahawaka hi hiwakatkalu katalu.

⁶ Hoyakalu yokanatlu satu jeji João tshinkaluru.

⁷ Xye jeji hapokatka hiphujtatatshri rixyawaka ruphujexyawakaplu katalu katni wale. Wan-rixa ptowru yineru halixatshri rixinripa runkakle tshinanu.

⁸ Xye katalu hi João-kni wale. Seyni runatka João ruphujtaxyawakaplu katalu katni.

⁹ Katalu halikakalutu waleni katalu xye tshijne hapokatshri ptowru yineru hchinikanu nikotatshri.

¹⁰ Xye tshijne rawa hiyrunu xye tshijne hiyakotatshrini wale. Seyni xye tshijne hajene hi himathetatkalu.

¹¹ Runatka waleko rayinetene yehimka seyni rayinetene hi ralukanatkaluna.

¹² Seyni ptowruneko, ralixjene pejnu rutakna Hoyakalu whenene rixyawakapna, ralix-hiwakatjene pejnu tshinanu wan-rixa.

¹³ Wanna ptowruneka hi hrahtshiyma matutatshine tsonni, hi mantshi matuxikatshine tsonni, hi yineru halujyawaka tshinanu matutatshinetkani seyni Hoyakalu tshinanu matutatshinni wanna.

Tokantshi Manewaxyawaka Piranapni

¹⁴ Tokantshi manewata. Hiyrun-koxa hixa tskala rawakanatatka. Wetlu royaknu. Hoyakalu hoyaknu pixka rixatka Hoyakalu whene satupkalutu. Hpoyahokakatkalu ptowru potuka Hoyakalu hihlenu hiyrunu halikakalutu pirana hpoyahokakatka.

¹⁵ João hiphujtatlu xye yineru. Tsru tokantshiyma wla htshina João: — Xyekatkani ntshinjekanatanru: “Hita natjini hapokatshripa hita yohnik-kahwakpiratkaluru klu tshinanu nma matutkanuklunuwa rawakotka wale.”

¹⁶ Klu tshinanu rumukatle tsru potuko hepixlewatatshri yoptotatshinwu hixa ptowrunekwu. Ruhlenu renekachale yoptotatshinwu hiyrunu ruhlenu renekachale wane pnutepa yoptotatshinepwu.

¹⁷ Hiykolu pirana yonatkaluru yokanatatshrini Moisés-ni seyni Jesus Cristo-kni Hoyakalu hihlenu ptowru potuka hiyrunu halikakalutu pirana hiyakotatshrini wale.

¹⁸ Hi satukna yineru hikeklu hetjejetlu Hoyakalu. Halikaka Hoyakalu whene satupkalutu, ruru Hoyakalusko potuko hwatshriko, walekni hiphujtatlu Hoyakalu.

João Batista Tshinkaluru Hinkaklewaxyawaka Piranapni

¹⁹ Xyekni João pirana, judeu-ne mitshi yokanatna sacerdote-ne hiyrunu levita tshinkalune, Jerusalém poktshi hichpajikatshine, João tshinkaluru nwaka repomhiywakapluna João, katnihe wale.

²⁰ Waneya João hiphujexnawa. Hi pnuko htshinatka. Seyni halikaka htshina, wla htshinatka: — Hi Cristo-no hita, htshina.

²¹ Waneya repomhatkaluna: — Katpotyihe pixa? Elias tshinkalurlayihe? Waneya João hihitna, wla htshina: —Hike, hi waleno. Waneya repomhatnakna: — Hoyakalu tokanu hinkakletatshripotuklayhe? Seyni wla htshinatka João: — Hike.

²² Hiyáhoni wane htshinruna: —Punkakanwu katpotyihe pixa? Waluk-himatletlu kathe pikahwajnawa wunkakapyawakapna wyokanatjene, wepomhakjixjene.

²³ Waneya João wla tshina: —“Hitni kahnete poktshiri saplewaxikatshri tokanno, wla tshinatshri: Halpokotanru Tsru Hixikatshriwa hatnu hapotkaka. Hoyakalu tokanu hinkakletatshrini Isaías-ni tshinkalurni tshinyawaka pixka nixa.”

²⁴ Seyni João hepomhapatshine wannani fariseu-ne.

²⁵ Hiyáhoni repomhaluna, waneya wane htshinruna: — Cristo pmixkanuklunu ho Elias pmixkanuklunu ho Hoyakalu tokanu hinkakletatshri koxa pmixkanuklunu kluneru tshinanhe p-batiz-lewjeta?

²⁶ Waneya João hihitna, wla htshina: — Hita honha n-batiz-jexyana. Seyni hixa hanikajite rawa satu yineru hmimatyehitanutu.

²⁷ Walekni hita pnute hapokatshripa hita yohnik-kahwakpiratkaluru. Hita hi tsru hixikatshriwano nkochpirojyawakaplo h-sapato-tetslu.

²⁸ Xyekaka ptowruka hakanhatka Betânia poktshiya, Jordão wenne pa sreta hwatshri, João batiz-lewjekanaxyawaka.

João Batista Hiphujexyawakatnaklu Katni Jesus Piranapni

²⁹ Waneya wale prika João hetlu Jesus. Runamta Jesus João nwaka. Waneya João wan-tshina: — Hetanu hixa, xyekni Hoyakalu carneiro-te. Xyekni xye tshijne hektunu konatshripa.

³⁰ Xyekatkani nunkakletakanatanru: Satu jeji hita pnute hapokatshripa hita yohnik-hijhakalurni klu tshinanu hi nmatutawa rawatka wale.

³¹ Hit-potuko hi nimathetatkalu katuktani seyni nuna n-batiz-lewajexyawaka honhaya rimaxyawakapluna israel-nerune katuktani wale.

Jesus Batiza-xikolu Piranapni

³² Waneya João xye pirana hinkakletatka: — Netlu Hoyakalu Hiwejikaluru, motkokoji pixka rixmaneta, tenhohne ruchpajya Jesus hoho rapokatka wale hoho rutukatka.

³³ Himka nimathetatkalu katuktani seyni Nyokanatjeru n-batiza-xyawakapa honhaya hinkakhapkatno wane htshina: — Wale jeji honra pexiniplu Hoyakalu Hiwejikaluru hijrukhohotlu walekni batiza-tanna yine Hoyakalu Hiwejikaluruya.

³⁴ Hita hetlu hiyáhoni nunkakletanru, halikakni xye jeji Hoyakalu whenni.

Jesus Mitshikananu Hasruklene Piranapni

³⁵ Waneya wale prikatnaka João wane hwakanata hepi rasrukleneyma.

³⁶ Jesus reta yanamtatshri waneya wla htshina: — Hetanru Hoyakalu carneiro-te.

³⁷ Nyi hepi João hasruklene jemlu htokanu. Waneya romkahitluna Jesus.

³⁸ Waneya Jesus hiprotaka, retna romkahitjene. Waneya wla htshinna: — Kluhe hijhajeta? Wanna wla tshinru: — Hasruklewatatshri (wale Tsru Hixikatshriwa raluka tshinreta). Hanhe pwajeta?

³⁹ Waneya wale wan-tshinna: — Hinanu hetapanru. Wane hyana retluna rawjexyawaka. Wale hohne rutukna wale yehi klu tshinanu kayitkani quatro horas hetkotkani.

⁴⁰ Satu wanna hepi João tokanu yijnakotatshine, Jesus homkahitatshri, André tshinkalurni, Simão Pedro hepuru.

⁴¹ André yahapkata himole potuko Simão tshinkaluru nwaka. Waneya wla htshinatkalu: — Wukchikatkalu Messias. (Yokakkalurutka waleni Cristo.)

⁴² Waneya André hanikatkalu himole Simão Jesus nwaka. Jesus hexiniklunru wla htshinru: — Phiwaka Simão, João tshinkaluru whene. Seyni xawakni pixa hiwakatka Cefas. (Yokakkalurutka waleni sotlu.)

Jesus Nurexyawakna Filipe Hiyrunu Natanael Piranapni

⁴³ Waneya wale prika Jesus hichiniklu Galileia tshijne sreta hyiywakapa. Seyni mitshikananhapka Filipe rukchika waneya wla htshinru: — Pomkahitanno!

⁴⁴ Filipe Betsaida hajerni, André hiyrunu Pedro hwajexyawaka poktshi hajerni wale.

⁴⁵ Filipe hijhatkalu Natanael waneya wla htshinru: — Wukchikatkalu wale yineru Moisés-ni yonyehitanru yonruru piran-yehi hiyrun-koxa Hoyakalu tokanu hinkakletatshine yonyehitanru. Jesus-ni wale, José tshinkaluru whene, Nazaré poktshi hajeru.

⁴⁶ Waneya Natanael hepomhalu: — Rumukathe satu pa hixanu kihleru Nazaré poktshi hakanhalexya? Waneya Filipe wla tshinru: — Punanu, petapanru.

⁴⁷ Waneya Jesus hexinri Natanael wale nwaka hinamta wla htshinanwakatlu: — Hetanru! Tujrapatkani jeji israel-neru halikakalutu. Waleni maylokletu.

⁴⁸ Waneya Natanael wan-tshinru: — Hanhe pix-himathetletno? Waneya Jesus wla tshinru: — Filipe mtomhaknuklunuwayi netyi figueira muna hpuko pwakanaxini.

⁴⁹ Waneya Natanael hihitlu, wla htshina: — Kasruklewakleru, pixni halikaka Hoyakalu Whenyi! Pixni halikaka israel-neru pohireyi!

⁵⁰ Waneya Jesus wan-tshinru: — Figueira muna hpuko pwakanaxini nexyayi ntshinre tshinanrahe, palixno? Xyekaka yohnik-hijhakalurkaka petanu.

⁵¹ Waneya wla htshina: — Halikakni, halikakni wla ntshinhi pa hohne tenhohne hitpukatshri hetanu hiyrunu hiwejikalune Hoyakalu towrene tenhohne hajene hetanu hatskomtatshine, serpikamtatshine Jeji Whene tshinkaluru hohowaka yapamtatshine.