Hebreus 8 - Bíblia

Jesus W- sacerdote -te Tsru Potuko Piranapni

¹ Xye pirana ptowruka wtshinakanatanru haptowruxikolni xye. Waneywu xye pixkalutu Tsru Sacerdote. Ptowru Potuko Himukatatshri tenhohne hajeru tuplawakle, hpotukle sreta hwatshrini wale.

² Hoyakalu yehi kotspalaxikowaka kamrurewaxikatshrini, Hoyakalupji potu kamrurewyehixikatshri. Hoyakalu kamhapjitanru yehi. Hi yineru kamhapjitanruni.

³ Klu tshinanu ptowru tsru sacerdote hitakka henekachalkaka hiyrunu niktshi hiylatkalurkaka renekjexyawaka. Hiyáhoni hijhakalurni xye W-sacerdote-te Tsru Potuko himukatatshri rixyawaka henekachalu pirana tshinan-koxa.

⁴ Hewi, xye tshijne hajeru rixkamka Jesus, himka sacerdote-pni, klu tshinanu rawna sacerdote-ne xye tshijne hajene henekachlukaka heneklewatatshine, Moisés yonreru towre kamhatshine.

⁵ Sacerdote-ne kamrure halikaka tenhohne hwatshri yaperechani hiyrunu tenhohne hwatshri kamrure yapkaklechani. Hiyáhoni wale tshinanu Hoyakalu wan-tshinru Moisés, Hoyakalupji nikalumta kamhikolu hkamhakjixlu Moisés mitshikananu, wla htshininri: “Xako puslahanru pekhixikolu, teno mriji petakanaxinri potuko mayawle, pkamhanu xako ptowru potuko. Hi psojikna pmayxajinri.”

⁶ Seyni halikaka Jesus yoptotlu satu kamrurtshi sacerdote-ne kamhajekanatanru yohnik-hijhakaluru kamrurtshipa. Hiyrun-koxa Hoyakalu yine runkajya pirana Jesus-ya, wale hijhakalur-potni klu tshinanu Hoyakalu hinkajya piranwu, kochpakatshri pirana potukni.

⁷ Klu tshinanu mitshikananu Hoyakalu hinkakletlewaxya pirana hike hma mahaxiknumka waneyamka hi rujhanutkalu hepi rixinri.

⁸ Seyni Hoyakalu hetna hinerune jikolukanuru hkamhiywakna hiyáhoni wla htshina mitshi: Tsru Hixikatshriwa Hoyakalu wla htshina: “Hetanu, rapokhohnetanu herotu pirana nunkaklexyana israel-nerune, Hiyrunu wale piranako nunkaklexyana judá-nerune.

⁹ Hi rutsrukatennina nunkaklexinri pixkalutu nunkaklexyanna, wannani Egito tshijne nkosemyoxinnina nkochpajinnixkana mitshi. Klu tshinanu wannani hi homkahitlu nunkajya piranna. Hiyáhoni nuknokatkana — htshina Tsru Hixikatshriwa Hoyakalu.

¹⁰ Hinatshripa hohne nunkaklexinna israel-nerune, wla ntshinanna — htshina Tsru Hixikatshriwa Hoyakalu: Nyonreru pirana wanna hchinikanu nutakanru, hiyrun-koxa wanna hajkaka nyonaxinri. Hitapni Royakalutnona, hiyrun-koxa wannapni, nayinetene.

¹¹ Waneklupa hike yineru hijretanru rimwastsireru ho himole wla tshinreymapa: “Pimathetanru Tsru Hixikatshriwa Hoyakalu,” hi htshina. Klu tshinanu ptowru neruka himatanutkano, mujhakone himatanutkano haté tsru hijhakaluru potuko himatanutkano.

¹² Waneya netwamonreyma namtakahchinikanuxinna rektunna. Hiyrun-koxa hi nuchinikanretanutnaklu hmajnakonuna.”

¹³ Hiyáhoni Hoyakalu herotu runkakletlewaxya pirana hkochtshekle tshinanu, wimatlu mitshikawlurutkani mitshikananu htshinyawu pirana. Hiyrun-koxa mitshikawluru htshinyawu pirana psotsonu hnikawnakastsitkani.