Hebreus 6 - Bíblia

Halixlu Homkahixikolu

¹ Hiyáhoni xawakni Cristo pirana hinkaklexikolu myaprepiranatu wiknohanu. Halikaka Cristo hasrukle wmahaxinritka wkochtshekanu. Hi wehasruklewle pirana tsonu, hixako wkamrure hike kochpakatshri hektuntshi hiknojikolu pirana hi koxa Hoyakalu halixikolu pirana tsonu wkochtshetanu.

² Hi batiz-lu pirana tsonu hi myotshi rutakhohoxikolu nuretkaluru pirana hi hipnatshine hiwekkajikowaka pirana hi rapnokaxikolu hike rixiniko mnikawnakatupa pirana tsonu wkochtshetanu.

³ Seyni pnutetshi wyahimatletanu! Hiyáhoni Hoyakalu halujiniplu wane potuko wixanu.

Jhamle Hiknokko Rixyawaka Halixlu Piranapni

⁴ Klu tshinanu halixlu hiknokatshine hi rumukata hehchinikanretatnakna. Wannamka Hoyakalu hasrukle himrekahchinikankaklewatatshri himatatshinekananni. Hoyakalu henekachale, tenhohne hichpajikatshri yoptotatshinekananni hiyrun-koxa Hoyakalu Hiwejikaluru henekle yoptotatshinekanannimkani.

⁵ Hoyakalu tokanu himatatshinnimkani kihler-potuko rixyawaka htokanu hiyrun-koxa himukatlukaka hinatshripa hohne himathetakanatatshinnimkani.

⁶ Hiyáhoni xye ptowruka himatatshine seyni halixlu ruknojinipna, nyi pixkalune hi pehchinikankakanru hiyrunukotnaka. Klu tshinanu xye pixkalune hatatjewa hepi kata cruz rutakluna Hoyakalu whene hiyrunu hixolune hetanu reyikluna.

⁷ Klu tshinanu tshiji hina yoptojetatshri, tseruwnakaklu hitaklu repixyawakapna wanna hitaklewatatshine. Hoyakalu hihlewahchinikanyehitlu tshiji.

⁸ Seyni tshiji, kona tsonu hiyrunu kawchipiri tsonu hiptshejyawaka rahnanutka. Hyoxijikowaka tsonu kihleylu halikaka.

Hiwekkaklewatatshri Pirana Wepixjetjeru Piranapni

⁹ Wlamka wtshina seyni hi wkahekhi hixa, Cristo tshinanu nmoletanunhi. Wimathi hixa xyekaka yohnik-hihlewahchinikanyehitkalunhi, hiwekkaklewatatshri pirana hepixjetjeru tshinanu.

¹⁰ Klu tshinanu Hoyakalu hi kmayxakahchinikanuklerni. Hi ramtakanru hixa hkamrure hiyrun-koxa hichiniklewle Hoyakalu hiwaka tshinanu, hixa mitshi pimrine Jesus halixatshine potukalune hepixjekanaxini hiyrunu repixjetna haté xawakni tshinanu.

¹¹ Hiyrunu walukpotutlu hixa ptowrunekhi wane pixkalutu potuko hi hituk-kamhaljetanu seyni ptowru Hoyakalu kahwajikolu yoptotatshinephi hmahle potuko.

¹² Hi hma mernuwatan-honuka, seyni halixatshine pixkalune hixanutka halikaka, hakotahchinikanutatshinephi ptowru potuko Hoyakalu hinkakletanru yoptotatshinepa hixyawakapa.

Hoyakalu Hinkakletanru Yoptotatshinepa Piranapni

¹³ Mitshikawako Hoyakalu hinkaklexyaniru Abraão-ni. Runkakletlu rakanhakakanru runkaklexyalu pirana. Hoyakalu waleko hiwaka hkochtshekatka, rimaxikowaka halikaka htshina, klu tshinanu hikeni satuko hiwaktshi yohnik-himukatatshri.

¹⁴ Wla htshininniri mitshi Abraão-ni: “Nunkaklexyayi halikaka nuhlewahchinikanyehitanyi hiyrun-koxa nixolewnakakpotutanyi.”

¹⁵ Waneya Abraão-ni hmachiretannu tshinanu hyoptotlu Hoyakalu hinkaklexyanri.

¹⁶ Klu tshinanu yine hasruhlu wanna pnute himukatatshri hiwaka hkochtshejyawakna ralixpotuxikolupa runkakle piranna. Hiyrun-koxa runkaklexyahi tshinanu hnikatko hikoluklewatatshri.

¹⁷ Hoyakalu haluk-hekhirpotutna runkajya piranna yoptotatshinepa hi hkachrijetanru runkajya piranna. Hiyáhoni runkajya pirannayma waleko hiwaka hkochtshekatka.

¹⁸ Xye hepi pirana mmayxakatu tshinanu, hi rumukata weyawleta Hoyakalu, hiyáhoni wimwalu hixko hchinikanu wixle Hoyakalu tshinanu. Hiyáhoni wumukata hikchikletlu tsru hepixlewlu, hixa Hoyakalu nwaka hasukatshine pixkalunwu, wunkaklexikolu kahwakatshinpotwu.

¹⁹ Xye wkahwakachale waleni wihchinikanu tsatapre munanhakaluru, poyehiru pixkalutu. Wkahwakachale hiknokakwu mkatshri sama himaletlewatatshri yehiya.

²⁰ Wane hjihlokatka Jesus wkosekjeru. Hixa tshinanu Tsru Sacerdote rixnawa hike rixiniko mnikawnakatupa, Melquisedeque tshinkaluru hitajikolu pixka.