Hebreus 13 - Bíblia

Cristo Halixatshine Kamrure Piranapni

¹ Hi hituk-hichiniklekakanu seyni Cristo moletanune pixka hixa hichiniklekakanu.

² Hi hichochatanunna hma metjejetanunni yanachalune, hipji hitakanunna. Klu tshinanu haté satkaka hiwejikalune Hoyakalu towrene tenhohne hajene hipji hitukkakatka hma metjejetanunekmaka.

³ Hichinikanna kachitkalune. Wannayma kachitkalune pixka hixahoxinwa. Hichinikanna salewnatshine klu tshinanu hix-koxa honra kamanerunhi.

⁴ Ptowruneka hetanu hnunrowlu kihleruni, meyikotni. Hi hma hnunrotanuto, hi hma hnurutanutu hapokletanu. Klu tshinanu hektutu kamhatshine hiyrunu hapoklewatatshine rukolujinwana Hoyakalu hetanu.

⁵ Hi tiyiro halukpotukanatatshinephi. Kihle hchinikanurunephi hejnu himwaleru tshinanu. Klu tshinanu Hoyakalu wla htshina: “Hikeklu nuchotanhi hikeklu nuknokanhi.”

⁶ Hiyáhoni kihle hchinikanurunwu wumukata wla tshinreta, hike wpikanu: “Nepixjerni Tsru Hixikatshriwa Hoyakalu, hiyáhoni hi npikanu hanuktako rixinipno yineru.”

Hi Wuchotanu Kihleru Wkamhajexyawaka Hiyrunu Wepixkajyawaka Piranapni

⁷ Hichinikanna mitshikananu hkosekjene Hoyakalu tokanu hinkakjene. Ralixlena homkahitanu hiyrunu hetjepotutanru rixjexyawakna kamle.

⁸ Jesus Cristo rixhohnekanaxyawakni hiknohatshri hohneni, xawakni hohne hiyrunu hinatshri hohnepa mnikawnakatupa.

⁹ Hi pupjekakkalunephi ptowru hasruklewlu pejnu wma masrujyahi tshinanu. Halikakni hixa kihleylu wihchinikanu mixkoxikowaka ptowru hihlentshi Hoyakalu henekachaleyma. Hi hkahwakpiratanru nikkalurkaka hiykoyehitkaluru klu tshinanu hi repixna yine xyekaka pirana homkahitatshine.

¹⁰ Sacerdote-ne judeu-ne Hoyakalupji kamrurewaxikatshine hi ritshitkana hnijyawakapluna henekachalu hiylatkaluru hixa henejyana kapajir-hoho hiylaxikalurni.

¹¹ Judeu-ne tsru sacerdote-te hanikjetlu nikalu hraha Hoyakalu tsonu hwiywaka yehi, henekachlu rixikowakapa hektuntshi hwenuxyawakapa tshinanu. Seyni poktshi kahnete hyoxikmanexikana nikalni.

¹² Wale tshinan-koxa poktshi hiphaptote hichpakawaka sreta kahnete rupniyatka Jesus. Wan-rixa hpowraxyawakapna yine waleko hihrahayma.

¹³ Hiyáhoni xawakni wyanwakatanru Jesus poktshi malekateya. Jesus malujikowakanu pirana pixkalutu yoptotatshinepwu hix-koxa.

¹⁴ Klu tshinanu hewi xye tshijneya hi wimwalu satu poktshi hwahohnekanatatshripa. Seyni wkahwakanru poktshi hwahohnekanatatshri pnu hichpajikatshri.

¹⁵ Hiyáhoni Jesus Cristo kamrure tshinanu hi wutuk-himalwuretanru Hoyakalu henekachale wenekjexikolu pixkalutu. Hiyáhoni winamayma wuphujethiwakatlu wpoyahnuxinri Hoyakalu.

¹⁶ Seyni kihleru hkamhajexyawaka hiyrunu hepixkajyawaka hi hichotanu. Klu tshinanu Hoyakalu hikchikhihlenutlu wane pixkalutu, henekachalu pixkalutu rikahwaklu.

¹⁷ Hyijnakotanna hkosekjene. Halixanna. Klu tshinanu wanna hixa hiwekle hislahjetatshinni. Hinoxikolu pirana hepomhakalunpakni wanna. Wan-rixinipa rumuwatanna. Hi hotshhitatshinepni klu tshinanu hixa tshinanu hwamonuwaxinipna, wale hi hepixanhi.

Hanjihohneru Haliklu Piranapni

¹⁸ Hoyakalu hanjitanu hixa tshinanu. Hixa hike hektutu wexnawa seyni kihle hchinikanwu ptowru pirana tshinanu. Hiyrun-koxa wujhalu kihleru kamhatshine wixyawaka ptowru potuko tshinanu.

¹⁹ Seyni halikaka hita hixko hanjire hixhi Hoyakalu hanjitanu hita tshinanu, chinpotukawa hix-yehi nsatkajikolupa.

²⁰ Hoyakalu hihlehchinikanru heneklewatatshri, Wutsrukate Jesus hipuktshi hiwekkajikatshri, carneiro pixkalune hinotatshri potukni, hihraha renekachale runkakletleru pirana mnikawnakatu mixkotatshri.

²¹ Nanjitlu Hoyakalu hike mmahaxikane rixkajyawakaphi ptowru kamrurtshi tshinanu. Wale halujyawaka tsonu kamhatshinephi hiyrunu ptowru potuko rukchikhihlenreru, hix-yehi kamrurewaxikatshri rixyawaka, Jesus Cristo tshinanu. Himalwutkalurupni wale, hikeklu hohne mnikawnakatupa. Seyoka.

²² Hiyáhoni xawakni Cristo tshinanu nmoletanune, hakotanru tokantshi nujrexyahi. Klu tshinanu yonawahlo nyonanwakaxyahi hi ho piranru.

²³ Himatanru Cristo tshinanu wmoletanru Timóteo tshinkaluru preso yehi ruchpajyatka. Hiyáhoni runhapkaxinipa Timóteo waneya waleyma netapanhi.

²⁴ Nalikanna hixa hkosekjene ptowruneka hiyrunu ptowruneka Cristo tshinanu potukalune nalikanu. Itália tshijne hajene halikhi.

²⁵ Nanjitlu Hoyakalu ruhlenu renekachale hixa ptowrunekhiyma. Wale tsonu.