Hebreus 12 - Bíblia

Hoyakalu Hirtshi Rixyawaka Piranapni

¹ Hixa xye papko hiwekatshinetkawu wwiya hixolune potniko hiphujtatatshinni, wsajrukjenni. Hiyáhoni waluk-hicholetanru ptowruko hektuntshi hinolu pixkalutu wimaletjeru. Hiyrun-koxa ptowru hixatshri hektuntshi wkachpotutjeru werutanu honuka, waneya hasuklu kamhatshri pixka wixa hasuklemtanu mkojwakahchinikanuxikanepwu wasukachatanu xye hasuklu Hoyakalu henejyawu pixkalutu.

² Jesus yehi potuko yihatatshinepwu klu tshinanu Jesus walixle yinuwakatshrini hiyrunu walixle poyahokakatshrini. Poyikpotuklu Jesus hinamtatshripa tshinanu. Cruz rupniywakapa rakotachata. Hektuwaka htshinanwakaxikolu reyikachata. Xawakni htuplatatka. Hoyakalu hetamayxaklerewatatshri tuplaxyawaka potukle sreta htuplatatka.

³ Hichinikanretanru hi pa salewaktshikananu hyoptota Jesus hiyrunu hi pa hahkalukananu rixluna malixkane seyni rakotlu. Hiyáhoni hix-koxa hi kaheknanuwatanu hi hma mernuwatanu.

Wuru Hoyakalu Ramotle Tshinanna Hiwhenene Cristo Halixatshine Rapnokatjexyawakna Piranapni

⁴ Klu tshinanu hektuntshi kamnixikolu pirana hi hixako hihraha hkochpakatka hektuntshi hkamnixyawakapa.

⁵ Hiyáhola hamtakatkalu hijrexikolu pirana whentshine hijrexikolu pixkalutu wla tshinatshri: “Noturu, hi peyikanru Tsru Hixikatshriwa salexyayi hiyrun-koxa hi puhrokahchinikanutanu retjexya tshinanyi.

⁶ Klu tshinanu Tsru Hixikatshriwa Hoyakalu saletna ptowruneka ramotanune hiyrunu hkotshipjetna ptowruneka hwuhenene rutakanune.”

⁷ Hakotachatanru ptowru salewaktshi hix-yehi hapokatshri. Hiwhenene pixka rixhi Hoyakalu. Klu tshinanu hanurnihe whentshi ruru msaletanutu?

⁸ Seyni hma saletkonuklunu ptowru whentshi hihlenu salexikolu pixka, waneklu hi whentshine hihlenpothi.

⁹ Klu tshinanu wuru saletkoxwu seyni wanepnawaka wkahwakpiratatkalu. Hiyáhoni wane yohnik-wixa yijnak-tokanretanru Wuru Hoyakalu hiwejikalune kamhatshri, wiwejyawakapa.

¹⁰ Klu tshinanu wuru pchinhohnejiji hsaletwu raluk-hixlexyawaka pixka rixkajyawakapwu. Seyni Hoyakalu saletwu repixyawakapwu kihleruya, Hoyakalu hihlenu potukalu yehi wtsaklawniywakapa.

¹¹ Halikaka hikeni salewaktshi poyikomenuru klu tshinanu katshinru. Seyni wanepnawaka repixna kihle hwachle rixyawakna hiyrunu hiweklu potukalu, saletlewlu tshinanutka.

¹² Hiyáhoni xawakni hmixkotanru himyonota hihrokakanatatshri hiyrunu hisoji hihrokakanatatshri hmixkotanutka.

¹³ Potuk-hapolu hyapanu, hma muwajyawakanupa seyni rutskalajikolupni halikaka myankatu.

Cristo Halixatshine Hijrexikolu Piranapni

¹⁴ Hijhapotutanru kihle hwachle rixyawakapna ptowrunek-yine. Potukalunephi ptowru potuko tshinanuya. Klu tshinanu wane hmixkanuklunupa hi satuknako yineru Tsru Hixikatshriwa Hoyakalu hetanu.

¹⁵ Xako, hi satukna hicho homkahretanru Hoyakalu hihlenu wuhletjeru. Klu tshinanu wma momkahitkanuklunru rumukata hakanhaletanu hixa hitokoteya katshwu hchinikan-menu hixa kojwakatshripa, hixolunepnimka yinepni himtukahchinikanutatshripa.

¹⁶ Hi rawanu kapoklewakleru. Hix-yehi hi rawanu Esaú pixkalutu, Hoyakalu hikchikhihlenreru pirana heyikatshri. Esaú honukla pa niklupka ripekotlu mitshikananu matutatshri rixle pirana.

¹⁷ Hixa himatlu hanu rixa mitshi Esaú rali hichankalexinixkalu mitshikananu matutatshri rixle pirana waneya wane wkatanu raluka yoptoletmaklu kihlewaka htshinikolumka seyni hiknokalurutkani Esaú. Klu tshinanu hi rumukata hihlerewletanatka hkamhaleru yáholu hiktehaymamka rujhalewatnixka.

Hepi Mriji Yapkakle Piranapni

¹⁸ Hixa hi israel-nerune hinre pixka hixa Sinai tshinkaluru mriji poyaho kamrukletkaluru nwaka hyinna pixka, hi hix-hixa. Tsru tshitshmero halhatshri yehi, mapchahawaka, rutlohle yehi.

¹⁹ Kowi hima, tokantshi hima, hjeminixkana hi wane yohnik-rixakjixatkaluna tokantshi.

²⁰ Klu tshinanu hi rumukata hakotletatkaluna tokantshi, yokanatkaluru tokantshi wla tshinatshri: “Niktshine yotnekamrijixiniplu hsotlujetkona ho katshraluyma runokakna.”

²¹ Tsru piklu potuko retna yine wale hetatshine haté Moisés koxa wla htshinatka: “Npikpotuta. Nutataka.”

²² Seyni hixa Sião tshinkaluru mrijiko hapokatka hiyrunu Hoyakalu hiwekatshri poktshiko Jerusalém tshinikowaka tenhohne hwatshri poktshi hapokatka hixa. Hiyrunu hiwejikalune Hoyakalu towrene tenhohne hajene hixolune potu yehi hapokatka.

²³ Hixa hapokanwakatlu poyikowlu hapatjexikowaka Hoyakalu whenene tsrujrune hapatjere nwaka, tenhohne khiwakayalune yehi. Hoyakalu, ptowru yineru hetamayxakletatshri yehi hapokatshinhi hiyrunu yine hiwejikalune potukalune, hike mmahaxikane yehi, hapokatshinhi.

²⁴ Jesus herotu runkakletlewaxya poyahokakatshri yehi hapokatshinhi. Hrahtshi hitslaptahjetkaluru hektuntshi hiknokawaka yehi hapokatshinhi. Seyni Abel-ni hipnale hapnute hixa wane yohnik-kihlewaka yehi hapokatshinetkahi.

²⁵ Hiyáhoni xawakni hislahinwa hmuknojyawakanuplu yanumatatshri tokanu. Klu tshinanu xye tshijne hajene hijretatshine tokanu hiknokatshine hi rasujyatkaluna rapnokaxikolna, ha wane yohnik-potu wixko hixa, tenhohne hajeru hijretlewle wkatjixini.

²⁶ Waneklu papko Hoyakalu plama hiyolikkaklu tshiji. Seyni xawakni runkaklexyawu, wla htshinatka: “Xekat-patka nuyolikkakanutkalu tshiji. Seyni hi tshiji tsonu seyni tenhohne koxa.”

²⁷ “Xekat-patka” htshinini rekhipotutlu ptowru kamhakalurkaka hiwchokko, rimathexikolupa muwchokkotni wale rawhohnekanaxyawakapni.

²⁸ Hoyakalu wimalwutanu klu tshinanu pohirewaxikowaka muwchokkotu yoptotatshinetkawu. Poyahnuwatatshinepwu hiyrunu Hoyakalu himalwujetatshinepwu Hoyakalu halukleru pixka hixatshinepwu, Hoyakalu kahwakpiratatshinepwu tsru pikluyma.

²⁹ Klu tshinanu halikakni Woyakalute tshitshmero nikatlewaxikatshrini.