Hebreus 11 - Bíblia

Halixlu Piranapni

¹ Halixlu waleni hinatshripa kahwajikolu hiyrun-koxa waleni metkotkaka halixikolu.

² Halixlu tshinanu honukla judeu hitsrukatenni hikchikhihlenutka Hoyakalu hetanuya.

³ Halixlu tshinanu wimatlu ptowru tshijnekananuka hakanhatka, kihle poklu ptowruka, Hoyakalu tokanu tshinanu. Halixlu tshinan-koxa wimatlu hetkaluru ptowruka, metkotu hkamhika.

Abel, Enoque, Noé Tshinkalune Halixle Piranapni

⁴ Halixlu tshinanu, Abel henekachlu halukkaluru potu, reneklu Hoyakalu, Caim henekachle pnute hihlenurutu. Wale tshinanu Hoyakalu himatjemkaklu potukalu rixyawakatka Abel. Ruphujetlu potukalu rixyawaka Abel renekachlekaka Hoyakalu yoptoxyawaka tshinanu. Hiyáhoni haté xawakni runkakletkawa Abel-ni yáholu mitshikawako rupnanimkatka Abel-ni.

⁵ Halixlu tshinanu Enoque tshinkaluru tenhohne ranikkatka hiwekatshriko hipuktshi hma kayaxyawakanupa. Hewi tshijne hi rukchijika klu tshinanu Hoyakalu kochtshekaplu tenhohne rawyawakapa. Wan-rixa Enoque klu tshinanu hmanikkonuklunuwa, rimathetka Hoyakalu hpoyikotjexyawaka.

⁶ Klu tshinanu halixlu minjeyma hike himukata poyikotletlu Hoyakalu. Seyni katukta haluka yanwakletlu Hoyakalu raluk-halixletlu rawa Hoyakalu. Hiyrun-koxa Hoyakalu hijhatshine hkahwakan-koxluna renejikolna heneklewatatshri Hoyakalu.

⁷ Halixlu tshinanu Noé tshinkaluru jemlu jhamleru hinatshripa pirana Hoyakalu hinkajyalu. Hoyakalu tokanu hkahwakpiratatka Noé hiyáhoni tsro kanawa ralpokohnaputlu hhanunro hiyrunu hiwhenene riwekkajyawakapa. Xye pirana ptowruka romkahita Noé yahmaklu mapokatuwa pirana runkakka. Xye pirana romkahle tshinanu xye tshijne rukolukanuwnakakatka. Hiyrun-koxa Noé yoptotatkalu Hoyakalu potukatlewle halixlu tshinanu.

Abraão Hiyrunu Sara Halixle Piranapni

⁸ Kajnaklu mitshi Abraão, Hoyakalu towuxinri pa tshijne nwaka hyiywakapa, pa hohnepa wale tshijne renejikolupa. Ralixle tshinanu, wane hyatka hma metanutu tshijne nwaka.

⁹ Halixlu tshinanu runkaklexikolu tshijne rawjeta Abraão, hma metjejexyawakanu tshijne rawjeta. Pantshi nikalumta kamhikolupjikaka rawjeta Abraão, Isaque hiyrunu Jacó-yma. Wale tshijne yoptotatshinepa Abraão-yma Hoyakalu hinkajya pirana tshinanna.

¹⁰ Klu tshinanu Abraão hichinikanretakananreru poktshi hihlepokotkaluru mimat-nikawnakatu, Hoyakalu kamhaleru poktshi rukchijyawakapa.

¹¹ Halixlu tshinan-koxa Sara yoptotlu tumukata michiwlexyawakapa whentshi tkayaxyawakapa yáholu tsrotsolejimkatkani seyni tmatuwhenetatka klu tshinanu talixatkalu hinkaklewatatshri himukatatshri koxni wale.

¹² Hiyáhoni Abraão tsonu mwuhenetuko hipnahotkaluru tshinanu, yine mlejikananu hakanhiylu katahiri tenhohne hajene pejnu hiyrunu ksatuji mar powha wnahlu hajeru mpoyaho hitakyahokletkotu pejnu.

¹³ Nyi yinni ptowrunnika halixatshinni htshinikowaknina pirana metkanniko, hipnanatka. Seyni halikaka howuka tsonu rexyatkaluna runkaklexikolumkana mitshi. Rimathetluna halikaka pirana rixyawakatka, hmunanhatkaluna htshinikowakna pirana. Ruphujexnawana xye tshijne hajeru hma mixyawakanutkana seyni pa nerunekotkani. Hewi tshijne rawachakanatkalukonina.

¹⁴ Klu tshinanu xye pirana pixka tshinatshine rekhixnawana ruchinikanretler-potnina pa tshijneko.

¹⁵ Halikaka rawjekanaxyawakna tshijne ramotkamkana waneyamka pa katako rumukata satkapletanumkana.

¹⁶ Seyni hike, wanna halukatkalu pa tshijneko kihlewaka potuko, tenhohne hwatshri tshijne. Hiyáhoni Hoyakalu hi patewata Royakalutna htshinikowaka. Klu tshinanu Hoyakalu halpokohnaputna satu poktshi wanna tshinanupa.

¹⁷ Ralixle tshinanu mitshi, hyahotkoklunutka Abraão, hiwhene Isaque henekachalu hiylatkaluru rixakjixkoklunutka Abraão htshinikowaka pirana yoptotatshrini, hiwhene satupkalutu henekachalu hiylatkaluru hkamhiyamkatka.

¹⁸ Hiyrunu mitshi Hoyakalu wan-tshinru Abraão: “Piklopichanepa Isaque-nerune tshinkalunepa.”

¹⁹ Seyni Abraão munanhalu Hoyakalu himukatatshri riwekkajyawakaplu Isaque-ni yahmaklu rupninipa. Halikakni Isaque hipuktshi hiwekkajikaluru pixkalutu hyoptota Abraão. Yapkakluni wale.

²⁰ Halixlu tshinanu Isaque mitshi kihlewaka htshinanwakatlu Jacó hiyrunu Esaú. Hinatshripa pirana runkaklexyana.

²¹ Halixlu tshinan-koxa rupnakastsitka mitshi Jacó kihlewaka htshinanwakatna José whenene hepi. Hyotmikleyma hkanojere ripoyehixnawa waneya wan-hixatshritka himalwutlu Hoyakalu.

²² Halixlu tshinanu José mitshi rupnakastsitka hkochtsheklu israel-nerune Egito tshijne ruchpajyawakapna pirana. Hiyrun-koxa ranikjixlu himanni hapu.

Moisés Halixle Piranapni

²³ Moisés hirune halixle tshinanu hyohimatluna Moisés mapa ksuru pejnu hmatuxiniklunutka Moisés, klu tshinanu retluna mturujiji kihle potuklu hiyrunu hi hpikluna pohirtshi hiykole.

²⁴ Moisés tsru rixinixka, ralixle tshinanu, hi ritshitlu Faraó hchitsho whene htshinikolupa.

²⁵ Seyni hnurexnawa hsalewniywaka Hoyakalu nurreneyma. Hi ralukatkalu hektuntshi poyikowle phuta hi pchinhohnejijiko.

²⁶ Cristo heyijikolu pixkalutu rukchikhihlenuta Moisés ptowru pohirewlu Egito tshijne hwatshri pnute. Wan-rixahchinikanuta Moisés klu tshinanu rapnutepa Hoyakalu henejyaplu hijhakalur-potu rikahwaka.

²⁷ Halixlu tshinanu Egito tshijne ruknokatka Moisés mitshi. Hi hpiklu pohirtshi hahjiywaklu. Hi ruhrokatka seyni ptowruka rakotachata klu tshinanu Hoyakalu metkotu reta hihchinikanu.

²⁸ Ralixle tshinanu Moisés kahwakpiratatkalu Páscoa hohne. Hrahtshi rutslaptahjekjixa, jejine mitshikananu matutatshine hiylatatshri, muylaxyawakanupna wanna koxa.

²⁹ Halixlu tshinanu mar powha serolu hanikajite hyapna hatatjewa popri tshijiwaka yapatshine pixka rixna. Seyni egito-nerunnimka koxa yahot-yaplerewatni rahyekanatkana.

Hixolunni Halixatshinni Piranapni

³⁰ Halixlu tshinanu sete hohne pejnu hsajrurutka cerca tenolu sotlu kamhikolu tsru poktshi Jericó tshinikowaka cerca-te waneya hyawnatamatana.

³¹ Halixlu tshinanu kapoklewaklero Raabe tshinkaluro hi tupna malixkaneyma klu tshinanu kihle yoptole tixna tshiji hetapatshine.

³² Kluhe pnute numukata tshinretatka hixolune halixle pirana tshinanu? Hi kapapkolno xyekaka pirana nunkaklexyawakapa Gideão-ni pirana, Baraque-ni pirana, Sansão-ni pirana, Jefté-ni pirana, Davi-ni pirana, Samuel-ni pirana hiyrun-koxa pimrinni Hoyakalu tokanu hinkakletatshinni pirana nunkaklexyawakapa.

³³ Nyikaka halixle tshinanu pimrikaka tshijne pohirewaxyawaka yotkakka, Hoyakalu halujyawaka hkamhajekanatna hiyrunu Hoyakalu hinkaklexyana pirana hyoptotna halixlu tshinanu. Halixlu tshinanu ruchyanamatna mhenokane.

³⁴ Tsru tshitshmero ruwakamtna hiyrunu rasukna hma muylaxikowakanupna yohlolewapiyma halixlu tshinanu. Hihrokatshinemkani seyni hixkolune pixka rixna. Hiylakaklu yehi himat-yahotkajikatshine pixka rixna hiyrunu pnu tshijne hichpajikatshine yahotkakatshine rakakna halixlu tshinanu.

³⁵ Suxone ralixle tshinanna hiwuhenene hipnatshine hyoptotatnakna hiwekatshinetnaka. Pimrinni salewnakakkanna seyni wan-hixatshinni hi rujhaluna hipuktshi rasujyawakapna ralixlena tshinanu. Wan-rixna klu tshinanu hkahwakatkaluna riwejinritnakna xye riweklena pnute hihlenurutu.

³⁶ Pimrinetnaka mturune hixkakka, hkotshipjetkatkana hiyrunu wane pnute rostutkana hiyrunu preso rutakkana.

³⁷ Pimrineko sotlujetka, pimrinniko hanikaji mane serra-xikana hepi tshraji ruchpajyanatkana, pimrinniko yohlolewapiyma hiylatkana. Rawkoxna yanachalune carneiro-mta ho bode-mta tsonu hmakatna. Hike mwikanni, salewnatshinni, saletkalunni.

³⁸ Xye tshijne hajene yohnik-hijhakalunemkanni. Seyni popriwaka yehi hiyrunu teno mrijiwak-yehi yapachatatshinni pupjetatshine pixkalune. Hitawakapnakaka hiyrunu kapnakaka hwajetatshinni.

³⁹ Nyi ptowruneka Hoyakalu hikchikhihlenrenni ralixlena tshinanu seyni halikaka hi retlewamtanatkana Hoyakalu mitshi hinkaklexyanna.

⁴⁰ Wan-rixa Hoyakalu klu tshinanu Hoyakalu hihlepokohnaprewata tsru hepixlewlu potuko hixa tshinanupa. Wumukata wannayma hike mmahaxikane hixletanu.