Hebreus 10 - Bíblia

Cristo Pa Katapka Renekmanexnawa Ptowru Papkoko Himukatatshripni Piranapni

¹ Moisés yonre hi ruphujetpotutlu ptowru pirana kihleru halikakalutu, hinatshripa pirana. Hiyrunu Moisés yonreru pirana hi Hoyakalu yehi hwatshri potuk-piranni seyni wale mayawle pixkalutu tsonutkani. Klu tshinanu ptowru mhal-kakako wale pixkalutu henekachlukaka hiylatkaluru renekjeta yine tshinanu. Hi rutuka henekachalu kamhaljetna seyni wanepnawaka hi hpotukatkatkana wanna yine Hoyakalu hijhatshinemka.

² Henekachalu hiylaxikolu potukatkamkana yine, hi hemka rutuka kamhaletanutkaluna henekachlu? Klu tshinanu Hoyakalu homkahitatshine renekachalna powratkamkana waneyamka hi rujhanutkaluna satuko rektunna hiknokatshripa.

³ Seyni ptowru mhaleko xye pixkalutu henekachlukaka hichinikkakjetlu yineru hektunu pirana.

⁴ Klu tshinanu hejnune, ho boi ho bode hraha hi himukata hiknokletlu hektuntshi.

⁵ Hiyáhoni Cristo hapojiniklunutkalu xye tshijne wla htshinanwakatlu Hoyakalu: “Henekachlu hiylaxikolu hiyrunu henekachlukaka hi pujha pixa. Seyni satu mantshi palpokohnaputno.

⁶ Henekachlu yoxikalurkaka, hiylatkaluru hektuntshi wenrumka, hi poyikotyi.

⁷ Waneya wla ntshinatka: — Ha, Hoyakalu, hewino hita. Nuna palujyawaka nkamhiywakapa Moisés papel-te steno nyonpiranyehixika ptowru pirana potuka nkamhiywakapa.”

⁸ Mitshikananhapka wla htshina: “Hi paluklu hiyrunu hi hpoyikotyi henekachlukaka hiylatkaluru hi hejnune henekachalkaka poyikotyi hi henekachlu yoxikkaluruko poyikotyi hi henekachlukaka hektuntshi wenrumkako poyikotyi.” Wale wan-tshinru xye pirana yáholu xyekaka henekachalkaka renekjetmakna Moisés yonreru tshinyawaka pixka.

⁹ Waneya wane wkatanu wla htshin-koxa: “Ha, Hoyakalu hewino hita. Nuna palujyawaka nkamhiywakapa”. Hiyáhoni mitshikananu rixjekanaxyawakna hnikatatka hepi rixinri rutakatka.

¹⁰ Jesus Cristo, Hoyakalu halujyawaka hkamhiywaka tshinanu, hpowratwu hixa ptowruka wektunuya renekachale tshinanu. Pa katapka renekmanexnawa ptowru papkoko himukatatshripni.

¹¹ Hiyrun-koxa judeu-ne sacerdote-te ptowru hohnekananuko hyotunotna sacerdote kamrure hkamhiywakapna henekachlukaka renekjexyawakapna. Hiyrunu hixo kata wale pixkalut-kaka henekachlu rixjetna. Seyni xye pixkalutu henekachlu hikeklu hohne rumukata konretlu hektuntshi.

¹² Seyni Jesus Cristo rali heneklexinixkalu renekachale satupkalutu hektuntshi hkonyawakapa hike rixiniko mnikawnakatupni waneya Hoyakalu potukle sreta htuplatatka.

¹³ Wane hkahwajyalu haté hkamnitjene hijixi hpuko rutakkoklunpatkana.

¹⁴ Klu tshinanu renekachle satupkalutu tshinanu hike mmahaxikane rixkakhohnekanatna yine hnurrene, walenu tsonuko rixyawakapna.

¹⁵ Hiyrun-koxa Hoyakalu Hiwejikaluru xye pirana ruphujetanwakjetwu. Hiyáhoni wla htshina mitshi:

¹⁶ “Xye ntshinyana wale hohnekakni wkatanu, — htshinrerutkani Tsru Hixikatshriwa Hoyakalu. — Ntokanu ntowuxyana rajna nutakanru hiyrun-koxa hihchinikanna nyonaxinri.”

¹⁷ “Rektunna hiyrunu pnuko rixlenna hikeklu hohne nuchinikanretanutnaklu.” — htshina.

¹⁸ Klu tshinanu xyekaka hektuntshi hiknojikatka hiyáhoni wan-hixatshri hi hijhalu henekachlu hiylatkaluru wane wkatanu.

Hoyakalu Kayehikatshine Piranapni

¹⁹ Hiyáhoni Cristo tshinanu nmoletanune hike wpikanu Hoyakalu tsonuko hwiywak-potuko yehi wjihlojyawakapa. Jesus hraha hiyokkalurutka tshinanu wumukatlu.

²⁰ Mkatshri sama hipekole, Hoyakalupji hwakanatatshri sama Cristo manekni wale. Cristo mane hiweklu heneklewatatshri wyapanu hihlepokoxikowaka wjihlojyawakapa Hoyakalu tsonuko hwiywak-potuko yehi.

²¹ Hiyáhoni waneywu satu Tsru Sacerdote Hoyakalupji towutatshri.

²² Xye tshinanu wkayehikanru Hoyakalu potuka hchinikanurunepwu, halixpotutatshinepwu, wajkaka hitslaptahjexikowakatka ptowru hektutu chinikantshiya hiyrun-koxa herkamanetkalune pixkalunepwu powrahalu katkalunepwu.

²³ Chiko halixlerunepwu walixleya. Hi pnu pejnu hixahchinikanutatshinepwu. Klu tshinanu Hoyakalu htshinyawaka poyahokakatshrini.

²⁴ Hichinikanretkakatshinepwu. Wepixkakanu wuchiniklewaxyawakapa hiyrunu kihleru tsonu wkamhanu.

²⁵ Hi wucho hapatjeretanu pimrine hixjexyawaka pixka hi wixanu. Seyni henekahchinikankakatshinepwu pnut-potu klu tshinanu wetlu hi howukatkalu hinatshri hohnepa.

²⁶ Klu tshinanu wimatjeminri halikakalutu pirana seyni wpaklu majnakowlexini wanepnawaka waneya wane wkatanu hi rawanutka henekachlu hiylatkalurupa hektuntshi tshinanu.

²⁷ Seyni hapnokatlewlu kahwakatshripni tsru hpikleyma. Jhekantshi tshitshmero pa hamnurutu nikatanuna yinepni Hoyakalu kamnitatshinepni.

²⁸ Moisés yonreru majnakowaxikatshri hiylatko, hike hetwamonutanru, hepi ho mapa ruphujtatjene tshinanu.

²⁹ Hiyáhoni hi pso salewnalukananu rujha yineru Hoyakalu Whene heyikatshri, hrahtshi runkaklexikolna hpowratjerumkana malukkotu hikahwakatshine? Hiyrunu hi pa salewaktshikananu rapnokaxikna Hoyakalu Hiwejikaluru henekachale hihlenu heyikatshine?

³⁰ Klu tshinanu wimatlu wla tshinatshri: “Napnuyehixinwa. Hita hapnurewatanu.” Hiyrun-koxa wla htshina: “Tsru Hixikatshriwa Hoyakalu hikolukanuwnayehjixanna rayinetene.”

³¹ Tsru jhamleru potuko Hoyakalu hiwekatshri hapnokatle hapokatshripa.

³² Seyni hichinikanretanru hiknohatshri hohnekaka hanu rixatka. Waneklu hali kotpukahchinikanretkatka waneya tsru kamnirewlu, hsaletakanatjeru hakotachatanutka.

³³ Satkakhi hixa hixolune hetanu heyikkatka hiyrunu hapnokatka. Hiyrun-koxa satkakhi hixa hepiretakanatna wan-hixa saletletkalune.

³⁴ Waneklu papko hixa hijha hepixlejekanatna kachitkalune. Hi htshipexyana hejnunkate seyni hsaletjekanatlu tsru poyikonutshiyma, klu tshinanu himathetlu jejnunkathi yohnikalutu mimat-nikawnakatu tenhohneya.

³⁵ Hiyáhoni xawakni hi hiknokanru xye hmunanhaleru klu tshinanu wale tshinanu waneyaphi tsru himlujikolu.

³⁶ Seyni hijhalu hmachiretannu waneya Hoyakalu halujyawaka hali kamhalexinipa hyoptotanru runkaklexya piranhi.

³⁷ Klu tshinanu wla htshina Hoyakalu pirana yonatkaluru: “Pchini tsonujiji mahatawa hinatshripa rapojyawakapa. Hi ramhanu. Hi hohamokaplu.

³⁸ Hoyakalu potukatlene hiwekanu halixlu tshinanu. Halikaka piklewtapatshinepni hi poyikotanru nohchinikanu.”

³⁹ Halikaka hixa hi satkapatshine pixka wixanu, wamtajyawakaplu hiweklu. Seyni hixa Cristo halixatshinwu hiwejikowaka wwiya.