Hebreus 1 - Bíblia

Cristo-ni Hoyakalu Whene Piranapni

¹ Mitshikawa Hoyakalu hixo kata hiynumatnina judeu hitsrukatenni hiyrun-koxa kakoje hiphujewnale rixa hiynumsaletnina judeu hitsrukatenni Hoyakalu tokanu hinkakletatshinniya.

² Seyni xawakni xye hohnekakatka riynumsatwu Hiwhene tshinanuya. Hiyrun-koxa Hiwhene himukatle tshinanu tshiji hiyrunu tenhohne hajerkaka hkamha Hoyakalu. Hiwhene honukla rutaka ptowru potuka ruru himwaleru yoptotatshripa rixyawaka.

³ Hituru ruru Hoyakalu hoyaknu hatnu hwatshrini hiyrun-koxa Hoyakalu yáholu pixka potuko rixa. Hituru tokanu himukatle tshinanu ptowru potuka hpoyehita. Waneya rali powratlexinixkawu wektunuya, Tsru Hixikatshriwa Hoyakalu, teno hajeru potukle sreta htuplatatka.

Hituru Hiyrunu Hoyakalu Towrene Tenhohne Hajene Piranapni

⁴ Hituru, hiwejikalune Hoyakalu towrene tenhohne hajene yohnikalutni klu tshinanu wanna hi yoptotlu kihleru hiwaka htshinkowakna Hituru hiwaka pixka, ruru Hoyakalu henejyalu.

⁵ Klu tshinanu Hoyakalu hikeklu wane htshinanwakatlu satu htowreru hiwejikaluru tenhohne hajeru: “Pixakni nowhenyi. Xye hohneni purutatkano.” Hi htshina. Ho wla: “Purutno hita ho pixapni Nowhene.” Hi htshina.

⁶ Hoyakalu mitshi xye tshijne yokanaxinri hiwhene mitshikananu wla htshina: “Ptowruneka hiwejikalune Hoyakalu towrene tenhohne hajene himalwutanru.”

⁷ Hiwejikalune Hoyakalu towrene tenhohne hajene pirana wla htshinna Hoyakalu: “Kanniphalu pixkalune hkamhikna htowrene hiwejikalune tenhohne hajene, hkamrurewyehitjene himero pixka rixkakna.”

⁸ Seyni Hituru pirana wla htshina Hoyakalu: “Hoyakalu, ptuplawakle tskihi towuwle hwahohnekanatatshripni. Ppohirewnale towuwlu potukalni, wale ptowuwle himathexikolni.

⁹ Pamotjetlu hixannutshi potukalu seyni pahnanutlu hektuntshi. Wale tshinanukni Hoyakalu, Poyakalute, nuretyi hiyrunu renekyi poyikowlu pyoptoxyawaka pimwalene yohnika, nhihtshiha ruyokjiwreryi Hoyakalu.”

¹⁰ Hiyrun-koxa wla htshina: “Pixa, Tsru Hixikatshriwayi, hyinuwajikolu klu papko, puyakotlu tshiji, hiyrun-koxa tenhohne pkamha pixako pimyoyma.

¹¹ Xyekakapni nikawnanu seyni pixa hike rixiniko mnikawnakatupni. Tenhohne, tshiji hitsruhakananumtanu mkatshri pixka.

¹² Mkatshri satkojruxikowaka pixka rixko hiyrunu hemkatatshri pixka, rixko. Seyni pixa, hwahohnekanatatshriyi hiyrunu hi pimat-hitsruha.”

¹³ Seyni Hoyakalu hikeklu wla htshinanwakatna htowrene hiwejikalune tenhohne hajene: “Ptuplatanu npotukle sreta haté pkamnitjene pijixi hpuko nutakanu.” hi htshinanwakatna.

¹⁴ Hi he wanna ptowruneka hiwejikalunetkani, Hoyakalu towrenni, hyokananrenni repixyawakapna hiweklu heneklewatatshri pirana halixatshinepa? Hehe.