Gênesis 7 - Bíblia

Noé Koxa Tsro Kanawa Jihlojyawaka Piranapni

¹ Waneya Hoyakalu wan-tshinru Noé: — Pjihlokanro tsro kanawa pixa hiyrun-koxa payinetene klu tshinanu netyi pixa potukyi hita hetanuya xye papko.

² Ptowru nikalu Hoyakalu hitshi nikkotanru sete pa nerkaka ppokoxini pixayma, sete jeji, sete suxo; seyni ptowru pejnu nikalu mnikkotu hepkaka ppokotanu sat-jeji, sato suxo.

³ Kamejirun-koxa teno yapatshine pejnu setekaka, jeji suxo; hma nikawniywakanupna tshijiya.

⁴ Waneya sete hohne hiknohinpatka nkamhanru rinnewaxyawakapa tshij-hoho quarenta hohne quarenta yetshno koxa; hiyáhoni nnikatpotutanhonuklu ptowru pejnu hiwekatshri nkamhalene xye tshij-hoho hma wiywakpatkana.

⁵ Waneya Noé wane potuko hixa ptowru Hoyakalu towuxyalu rixa.

⁶ Hiyáhoni Noé seiscentos mhaletkalu honha hahyekachalu hapokatka tshij-hoho ruchyahatatka.

⁷ Hiyáhoni Noé, hiwhenene, hhanunro hiyrunu hiwhenene hanunrokaka hjihlokna tsro kanawa hahyekachalu tshinanu.

⁸ Nikalu hitshinikletkaluru, nikalu mnikole, kamejirune hiyrunu ptowru hixatshri tshij-hoho yosrolotatshri hpokota.

⁹ Nikalune jihlokyehitlu Noé hepkaka, jeji, suxo hanukta rixa towutletlu Hoyakalu Noé.

¹⁰ Wane rixa hiphujewnaleta sete hohne pnutetka, tshiji ruchpakhaxya honha rinnewat-koxa.

¹¹ Seiscentos mhale hiyrunu pa ksuru hiyrunu dezessete hohne rixinixka Noé. Waneklu hohne potukotkani rupcheka honha tshijiya hitokha hwatshri hiyrun-koxa tenhohne kohpukkatka. Rujruka tsru hina.

¹² Hiyáhoni hinatkani tsru nek-potuko quarenta hohne quarenta yetshno tshij-hoho rapokhaxyatka.

¹³ Wale hohneko tsro kanawa hjihlokna Noé hiwhenene Sem, Cão, Jafé hiyrun-koxa Noé hnunro, Noé whenene hnunron-koxa.

¹⁴ Wanna hiyrunu ptowru nikalu satkaka neru, ptowru hixatshri campo hajeru, wale nerkaka mkoje, ptowru hixatshri tshij-hoho yosrolotatshri wale nerkaka; ptowru hixatshri kamejiru nerkaka; ptowru kochitshin-koxa.

¹⁵ Ptowru nikalu hinniphatatshri jihlokyehitlu Noé hepkaka tsro kanawatlo hya.

¹⁶ Ptowru nikalu jeji, suxo jihloka hanukta rix-towutletlu Hoyakalu wane rixa. Waneya Tsru Hixikatshriwa Hoyakalu wanna hatjini hichyatlu tsro kanawa hiphaptote.

Hahyekachalu Piranapni

¹⁷ Quarenta hohne pejnu rawhata hahyekachalu tshij-hoho. Rapohamta honha hiyáhoni timlikatka tsro kanawa tshij-hoho tmawyawakanupa.

¹⁸ Rapohamta honha, tsruh-potuko rixa tshij-hoho. Hiyáhoni tsro kanawa honra honha hoho twatka. Waneya tusurokamta.

¹⁹ Rapohamta honha tshij-hoho tsruh-potuko haté ruchyatlu ptowru hipjitkaka tenolu ptowruchaka.

²⁰ Teno pjitalu haté sete metros pnute ruchyata hiyáhoni hipjitkaka hahyekatka.

²¹ Ptowru hiyolikatshri nikalu tshij-hoho hwatshri hipnanatka; kamejiru hiyrun-koxa campo hajeru, hocha hajer-koxa hiyrunu ptowru hixatshri tshij-hoho yosrolotatshri hiyrunu ptowru yineru hipnanatka.

²² Ptowru hixatshri hinnipha hiwejikatshri hijripnaya, tshiji popriwaka yapjekanatatshrini hipnanatka.

²³ Hiyahokni wane rixa nikawnaletna ptowru hiwekatshri tshij-hoho hwakanatatshri, yineru, nikalu, tshij-hoho yosrolotatshri, kamejirune tenhohne yapatshine koxa nikawna tshij-hoho rawyawakna; rutukatka Noé tsonu hiyrunu tsro kanawatlo yatshine.

²⁴ Hiyáhoni honha hichyatlu tshiji cento e cinquenta hohne.