Gênesis 1 - Bíblia

Ptowru Potuko Yinuwakle Piranapni

¹ Hyinuwakle Hoyakalu hiyakotlu tenhohne, tshiji koxa.

² Tshiji hi hwapa, male rixapa mapchahalu tsonu hima honha tenohalu hichyatlu tshiji. Waneyakni Hoyakalu hchinikanu honha hohwaka hyapjeta.

³ Waneya wane htshina Hoyakalu: — Katalu hwanu. Waneya rakanhatka katalu.

⁴ Waneya Hoyakalu hetlu katalu hikamtutkalu. Waneya hkotspalatlu katalu, mapchahaluyma.

⁵ Waneya Hoyakalu katalu rutakhiwakata hohi htshinru, mapchahalu hoyetshno htshinru. Waneya kayi sreta hiyrunu yetshpotukawa sreta walekni mitshikananu hohne tshinkatka.

⁶ Waneya Hoyakalu wan-tshina: — Rawanu malehohnephawaka honha kanipretatshripa.

⁷ Waneya Hoyakalu kamhalu malehohnewaka. Waneya psoji honha malehohnewaka hpuko rutaka, psojha wane rohowaka rutaka. Hiyáhoni rakanhatka.

⁸ Waneya Hoyakalu hiwakatlu tenhohne, tenhohne htshinru. Waneya kayi sreta hiyrunu yetshpotukawa sreta walekni hepi hohne rixinritka.

⁹ Waneya wane htshin-koxa Hoyakalu: — Honha tenhohne hpuko hapatjehaxini wane tsonu rawhatanu. Popriwaka hiphujewnanu. Hiyáhoni rakanhatka.

¹⁰ Hoyakalu tshiji tshinru popriwaka. Rapatjehaxyawaka honha hhiwakatlu mar powha. Waneya Hoyakalu hetlu kihle rixyawakatka.

¹¹ Waneya wane htshina Hoyakalu: — Hocha hiptshekanu tshij-hohoya, ptowru hixatshri hitaklu hitataji hiptshejini, hiyrunu wale neru pixkayakako, hixatshri hahmuna hisahi hiptshejikatshri hiyrun-koxa wale neru pixkayakako hixatshri hiptshekanu. Hiyáhoni rakanhatka.

¹² Waneya ruptshekatka tshij-hohoya ptowru hixatshri hitaklu hitataji hiptshejikatshri hiyrunu wale nerukni, hiyrun-koxa ptowru hixatshri hahmuna hisahi hiptshejikatshri hiyrun-koxa wale nerkaka hiptshekatka tshij-hohoya. Waneya Hoyakalu hetlu kihle rixyawakatka.

¹³ Waneya kayi yetshpotukawa hiknohatka map-hohne rixinritkani.

¹⁴ Waneya wane htshin-koxa Hoyakalu: — Katalune hakanhanu tenhohneya, hkotspalaxyawakaplu hohi hoyetshno, hmarkaxyawakaplu kapapkolu rixyawakapa, hohi, hihwalapu,

¹⁵ katalupni tenhohne tshiji rataxyawakapa. Waneya wane rixa.

¹⁶ Waneya Hoyakalu hepi katalu hkamha. Tkatshi hohohne hatatatshripa, ksuru hoyetshno hatatatshripa. Hkamhakoxlo katahiri.

¹⁷ Waneya rutaklu katalu tenhohne tshiji hatatatshripa,

¹⁸ hyokanaxyawakaplu hohi, hoyetshno koxa, hkotspalaxyawakaplu hohi, hoyetshno. Waneya Hoyakalu hetlu hikamtutkalu.

¹⁹ Waneya kayi yetshpotukawa hiknohatka quatro hohne rixinritkani.

²⁰ Waneya wane htshina Hoyakalu: — Ptowru hixatshri honha hajeru tsepotanru honha hiyrunu tenhohne ptowru hixatshri kamejirune tsepotanu.

²¹ Waneya Hoyakalu kamhalu tsrur-potuko honha hajeru, ptowru hixatshri honha hajeru hiyrunu wale klopichapakni, ptowru hixatshri kamejiru hiyrunu wale klopichapakni. Waneya Hoyakalu hetlu hikamtutkalu.

²² Waneya Hoyakalu kihlewaka htshinanwakatna wane htshinna: — Honha hwatshri hwuhenewatanu htsepoxyawakaplu honha, kamejirune hixolewniywakap-koxa.

²³ Waneya kayi yetshpotukawa hiknohatka cinco hohne rixinritkani.

²⁴ Waneya wane htshin-koxa Hoyakalu: — Ptowru hixatshri hiwekatshri tshiji hajeru hiyrunu wale neruko hakanhanu. Ptowru hixatshri kammanruru, ptowru hixatshri kmatsyiru hocha hajeru, ptowru hixatshri yosrolotatshri, mtserutu, tsrur-koxa hiyrun-koxa wale neruko hakanhanu. Wane rix-hakanhaleta.

²⁵ Hiyáhoni Hoyakalu wane hix-kamhaletlu ptowru hixatshri kmatsyiru hocha hajeru, ptowru hixatshri kammanruru, hiyrunu ptowru hixatshri yosrolotatshri mtserutu, tsrur-koxa satkaka waleko hinerupni. Waneya Hoyakalu hetlu kihle rixyawakatka ptowruka.

²⁶ Hiyrun-koxa wane htshina Hoyakalu: — Xawakni yineru wkamhanu, wyáholu wkamhinru hixa pixka rixanu. Yineru towutanro chima, kamejiru koxa, ptowruka pantshi hajeru, ptowru hixatshri hocha hajeru, ptowru hixatshri yosrolotatshri, mtserutu, tsrur-koxa, ptowru hixatshri htowutanu psoltshijyako.

²⁷ Hiyáhoni Hoyakalu kamhalu yineru waleko hyáholuya. Wanna hkamha jeji, suxo.

²⁸ Waneya Hoyakalu kihlewaka htshinanwakatna yine, waneya wane htshina: — Kwuhenpatkahi, hixolewnanu htsepoxyawakaplu tshiji, tsru hixikatshinepwahi tshiji. Yine tshinanu twa chima mar powha hwatshri hixanupa, kamejiru teno hajeru hixanupa hiyrun-koxa ptowru hixatshri hiwekatshri tshiji yanatshri hixanupa htowuxyawakaplu.

²⁹ Waneya Hoyakalu wan-tshinna yine: — Nenekatkahi ptowru hixatshri hitaklu hitataji hiptshejikatshri hiyrunu ptowru hixatshri hejnuji hisahi hiptshejikatshri, nikkalurupa.

³⁰ Peklo hiyrunu ptowru hixatshri hocha ptshe hakanhikatshri nenekatkalu ptowru hocha hajeru, ptowru kamejiru, ptowru yosrolotatshri, tsruru, mtserut-koxa niklerupa. Waneya wane rix-hakanhaleta.

³¹ Waneya Hoyakalu hetlu ptowruka hkamhaleru, retlu ptowruka kihler-potuko. Waneya kayi, yetshpotukawa hiknohatka seis hohne rixinritkani.