Filipenses 4 - Bíblia

¹ Hiyáhoni nmoletanune Cristo tshinanu, nuchinikanune, namotpotuthi. Hixa poyikowkakjetno. Nalixkowata hixa tshinanu. Hiyáhoni xawakni poyehi yopkaklephi halixlu Tsru Hixikatshriwa Cristo-ya.

Hiykolukaka Piranapni

² Nanjithi hixa Evódia, Síntique tshinkalone pa hchinikanuronephi Tsru Hixikatshriwa Cristo-ya.

³ Hiyrun-koxa nanjityi pixa nepiryi, pepixyawakapna nyi hepi suxone nepixjerone kihle piranalu potuko hiwekkaklewatatshri piranaya. Hiyrun-koxa Clemente hiyrunu pimrine nikamrurewatanune pepixanu, hiweklumta hitakhiwakatkalunetka.

⁴ Himuwhohnekanatanu Tsru Hixikatshriwa Cristo-ya. Hiyrunu wane ntshinanutnaka, himuwatanu.

⁵ Kchinikanurunephi ptowru yine tshinanu. Klu tshinanu chinpotukawa runanu Tsru Hixikatshriwa Cristo.

⁶ Hikeko hkojwakahchinikanuxinwa seyni ptowru potuko hanjihohneru hanjixinriya poyahnutleyma hinkakanru Hoyakalu hanjitanrukaka.

⁷ Waneyakni hapnanuhchinikanru Hoyakalu henekachalewle ptowru potuko yine himatjemle pnuterutu hinothajitanhi, rinotahchinikanutanhi Cristo Jesus tshinanuya.

Rixa Hichinikanuwlexyawaka Yineru Piranapni

⁸ Hiyahokni nmoletanune Cristo tshinanu hanurni halikakalutu, hanurni kahwakpiratkaluru, hanurni wane potuko hixatshri, hanurni powralu, hanurni kihleru, hanurni kihle piranyehimenu, wan-rixini kihleru, himalwutkalurni, xye pirankaka hichinikanretatshri.

⁹ Hyijnakotanrukaka, hetlerkaka, xyekaka nasrujikolkaka nasrujyatkahi hkamhanu. Waneyakni Hoyakalu wapnanuhchinikankakjeru hixaymapa.

Paulo Poyahnuxyawakna Yine Piranapni

¹⁰ Numuwpotuta Tsru Hixikatshriwa tshinanuya hixa hichinijyawakpatnakno xye yrunu. Hix-hohne hixa hi himukatatka seyni xawakni hixa hichinijyawakno pirana pohiwpotutatka.

¹¹ Seyni wla ntshina hi nmahaxinri tshinanni. Klu tshinanu nasruhatkalu npoyahnuxyawaklu kluneruktako nexini.

¹² Nimatlu nmahaxinri, nimatkoxlu npohirewaxinri. Xye hasruklu nasrukka hanuruktako tshinanu ho jinanno ho natshno ho hixoyno ho nmahaxya seyni kihle hchinikanukno.

¹³ Nmixkotjeru tshinanu ptowru potuko numukata.

¹⁴ Seyni kihleru hkamha hepixyawakno nsalewninriya.

¹⁵ Hixa Filipos poktshi hajenhi himatlu mitshikananu kihle piranalu potuko hiwekkaklewatatshri pirana nehinkakletletka Macedônia tshijne nuchpajinixka hike Cristo halixatshine hapatjetatshinkaka hepixno. Seyni hixapka hepixno tiyiroya, henekachaxyakakno.

¹⁶ Klu tshinanu Tessalônica poktshi nwakanaxini hi pa katapka tsonu seyni hepi kata hyokananwakatno nmahaxinrikaka tshinanu.

¹⁷ Himka nujhalu nenejikolu. Seyni naluklu hixa tsru potuko kihleru hapatjehnapuxikowaka, hixa kamrurkaka kihleru tshinanu.

¹⁸ Ptowru potuko waneyno xawakni haté rixeta. Hike nmahaxya klu tshinanu Epafrodito tshinkaluru hanijyano hixa yokanatanru. Hixa henekachale henekachlu pixkalutni, kihlephalu phamluhalo pixkalutni, Hoyakalu hikchikhihlenutlu, poyahnutkalurni Hoyakaluya.

¹⁹ Noyakalute hikchijinhi ptowru hmahaxinri waleko hpohirewnale royaknu yehi hwatshri Cristo Jesus tshinanuya.

²⁰ Hiyáhoni xawakni Woyakalute Hoyakalu, Wuru himalwutkaluru ptowru hohne mnikawnakatupni. Wan-hixkalurupyi.

Hichiniklewlu Piranapni

²¹ Halikanna wanna ptowruneka Hoyakalunerune Cristo Jesus tshinanuya. Cristo tshinanu wmoletanune, hitaymalune hichinikhi.

²² Ptowruneka hewi hajene Hoyakalunerune ralikanwakathina. Hiyrun-koxa César-pji hajene halixatshine halikanwakathi.

²³ Nanjitlu Wutsrukate Jesus Cristo henekachle hihlenu hixa ptowrunekhi tshinanupa.