Filipenses 3 - Bíblia

Mantshi Tsonu Mmunanhikowakanu Piranapni

¹ Hiyáhoni nmoletanune Cristo tshinanu himuwatanu Tsru Hixikatshriwa Cristo tshinanu. Halikakni hi nayoklu xye pirana nyonanwakaxyapatnakhi. Klu tshinanu hixa hihlenu hepixatshripni.

Cristo Pirana Minje Hasruklewatatshine Hislahinwa

² Hislahinwa wanna hektutu kamhatshine tshinanu. Hislahinwa wanna kawene hektune pixkalune tshinanu. Hislahinwa sustajmaneklerune tshinanu.

³ Klu tshinanu halikak-potu jiprojhikatshinwahi hixa seyni hi judeu-nni. Seyni hixakni Hoyakalu kahwakpiratatshinwu Hoyakalu Hiwejikaluruya. Cristo Jesus munanhatshinwu tsru poyikowluyma hixni. Mantshi pirankaka tsonu mmunanhakanwu hixa.

⁴ Seynimka hit-koxa himukata munanhaletlu nomane tsonu. Pimrinemka kahwajinwa rimwiywakluna satu pa hixanu hmunanhamanexnawakwa ha hitamka wane yohnik-hixa munanhalmanexinwa.

⁵ Oito hohne rixinixka nmatuxinri njiprojhaptojimtatkatka. Israel-neru klopichno. Benjamim-nerno. Hebreu-potno hebreu-ne yehiya. Moisés yonreru piranaya fariseu-ne nixapa.

⁶ Mixkotahchinikanrewlu pirana Cristo halixatshine hapatjetatshine nsaletjejekanatatka. Ha Moisés yonreru pirana potukalu hixkaklewatatshri pirana, hikemka nmayxajyatka.

⁷ Seyni xye ptowruka nkaylerumkapa waleni nuknokachatatka Cristo tshinanu.

⁸ Seyni halikak-potu Cristo nkayaxyawakapa tshinanu ptowru potuko hiknokachatkaluru nikahwakatka wale kachrijrutkani kihler-potuko Nutsrukate Cristo Jesus himatyehixikolu. Wale tshinanu namtaklu ptowruka hektutu, malukkotu nikahwaklu Cristo numukata yoptolexyawakapa.

⁹ Cristo-ymalutu nixyawakapa hi hitako npotuknupni Moisés yonreru pirana homkahlu nma momkahixyawakanupa. Seyni npotukatjerni Cristo nalixle tshinanu, Hoyakalu potukaxyawaklu yineru halixlu tshinanu tsonu.

¹⁰ Naluklu Cristo tsonu nimaxyawaka, Cristo yotunoxinri himukatle naluk-himatleta hiyrun-koxa hsalewnale yimatshri naluk-hixleta. Hiyrunu wale hipnale pixka nixikolupa.

¹¹ Waneyakni nkahwaklu hipuktshi tskala niwekkajikowaka.

Wumlujikolu Yoptotatshine Pixka Hixatshinepwu Piranapni

¹² Hi naluka wla tshinreta nalixatka ho nali potukatletkatka seyni nkosekakananumta, hanuktako numukata hwalexinri numlujikolu. Walekni Cristo Jesus hichinikanretanru hita hkayaxyawaka walenuko nixyawakapa.

¹³ Cristo tshinanu nmoletanune, hi nkahwaklu nali yoptolexyawakatkalu numlujikolu. Seyni xye tsonu nkamhajeta. Natjiniyaka sreta nutaklu ptowruka niknohjerutka seyni nyapretaka hwapletanruni nkosekamxijeru.

¹⁴ Nasukakananumta numukata hapoklexyawakaplu hasuklu hichinixyawaka numlujikolu nkayaxyawakapa. Waleni Hoyakalu tshanixle hiwekle hikeklu hohne mnikawnakatupni Cristo Jesus tshinanu.

¹⁵ Hiyáhoni hixa ptowrunekwu tsru yinerunetkawu halixluya wujhatkalu xye chinikantshi. Seyni satkaka pnuko hixahchinikanuxini, xye chinikantshi mayxakle rimatjemkakanhi Hoyakalu.

¹⁶ Seyni wapkapanrutka pixkalutu tshinanu wane potuko wya homkahretanru.

Cristo Cruz Rupniywaka Pirana Kamnitatshine Piranapni

¹⁷ Nmoletanune Cristo tshinanu hixa mkoje yimanno. Hislahanunna pimrinni hixa Paulo-nwu pixka hixatshine. Wane pixkalune homkahitanu.

¹⁸ Seyni rawna pimrine pnuko hixatshine. Hixo kata xye pirana nunkakatkahi. Xawakni xye pirana ntshinatnakhi ntshiyahleyma. Hiyáhoni wla pixka hixa hiwekletatshine Cristo cruz rupniywaka pirana kamnirewaxikatshinni.

¹⁹ Nyini hamhikowaka yatshinepa. Royakalutnuna wannako himanna het-sotanuxyawaka. Kapatmenuruko ralixkojetna. Wannani xye tshiji hajeru tsonu hichinikanretatshine.

²⁰ Klu tshinanu hixapni tenhohne tshijne hajenepwu. Hiyrun-koxa wkahwakpotutlu wiwekkakjeru Jesus Cristo tenhohne hichpajikatshripa.

²¹ Wale kachrijewnakakanru wimane hihrokakanatatshri, himat-nikawnatshri waleko himane hoyaknu pixka rixyawakapa. Wan-rixanu rumukatleyma hiyahokni rumukata ptowru potuko htowuxyawaka.