Filipenses 2 - Bíblia

Cristo Jeji Pixka Rixnawa Seyni Ptowru Potuko Pnute Tsruyni Wale Piranapni

¹ Hiyáhoni hapnanuhchinikanru hwini Cristo tshinanu hiyrun-koxa hepixikolu ruchinikle tshinanu, hiyrun-koxa pa hchinikanurutu Cristo Hiwejikaluruyma hiyrun-koxa hichinikkaklu, hetwamonrewlu hixkakluko hwini,

² numuwle hpoyahokakanu, walerutu hchinikanu hixa hichinikanretleru hiyrunu walerutu hichiniklewlu himwatshinephi pa hchinikanurune hixini. Satupka chinikantshi himwatshinephi.

³ Hike hkamhanu hixako halujyawakacha. Hike hkamhanu halixkotachaxikatshinwa hixyawakapa. Seyni malixkoxikatshinepwahi. Satkaka kahwakanru pimrine wale yohnik-hijhakalune rixyawakna.

⁴ Satkakhi hixa hi hixa halukleru tsonu hislahanu seyni pimrine halukanru koxa hislahanu.

Cristo Pixka Wixa Masatlexinwa Piranapni

⁵ Waneyaphi walerutu chinikantshi Cristo Jesus himwaleru chinikantshi pixka.

⁶ Ptowru hohnekananuko Hoyakalu pixka potuko rixatka seyni hi ruchinikanretlu Hoyakalu pso tsru hixikatshriwa rixyawaka muchotkotmakni.

⁷ Seyni wale nanwaka hichokajnawa. Towutlu hyoptokajnawa. Yineru yáholu rixnawa.

⁸ Yineru yáholu rakanhiyatka waneya hmasaxnawa. Kajnaklu Hoyakalu halujyawaka haté cruz rupniyatka.

⁹ Hiyáhoni xye tshinanu Hoyakalu tsru potu rutaklu. Hiyrun-koxa renekhiwakatlu ptowru potuko hhiwaka tsrurutka.

¹⁰ Hiyáhoni Jesus hiwaka tshinanu ptowruneko himathet-hitsrukateta waneya hyoptsojityehitluna, tenhohne hajenkaka, xye tshiji hajenkaka, tshij-hitok-hajenkaka koxa.

¹¹ Ptowru yinerunru pejnu hiphujetanru Tsru Hixikatshriwani Jesus Cristo. Hoyakalu Hirtshi himalwuxikolupa.

Cristo Hayinetene Katalu Pixkalune Piranapni

¹² Hiyáhoni nuchinikanune potuko, hita hyijnakjekanata hix-yehi nwakanaxini pixka. Xawakni hijhakalur-potu hyijnakoxyawakno namoka pchinik-koxa. Hiyáhoni pnute hya kamhaletanru Hoyakalu halukanru tsru hislahleyma kahwakpirlu koxa haté hpoyahokakanru hiwekle.

¹³ Klu tshinanu Hoyakalukni hix-yehi kamrurewaxikatshri, halujyawakaplu hiyrun-koxa hkamhiywakaplu wale halujyawakako.

¹⁴ Ptowru potuko hkamhanu muhjekkakanunephi myanhakakanunephi.

¹⁵ Waneya wan-hixinipa, hike mixkanephi, powrahchinikanunephi, Hoyakalu whenenhi potukalunephi hewi tshijne hajene mpotukane, pupjetatshine tskalaya. Wanna tskala katahirine hatawnatshine pixka hixatshinephi, tenhohne hajene pixkalunephi.

¹⁶ Hiweklu pirana himretatshinephi waneyakni numukata halixkotletanhi Cristo hapojini hohnepa tshinanu. Klu tshinanu ruphujetanru nma mahijeru kamrurewlexyawakanpatka.

¹⁷ Pa katako nuylatko nohraha hiyokanu henekachalu pixkalutupni, hixa halixle tshinan-koxa Hoyakalu renekachatko. Waneya wan-rixinipa numuwatanu hiyrun-koxa numumuwatanhi.

¹⁸ Waneko pixka hixanu hixa. Himuwatanu hiyrunu himumuwatanno.

Timóteo Hiyrun-koxa Epafrodito Tshinkalune Piranapni

¹⁹ Tsru Hixikatshriwa Jesus halujinipa Timóteo tshinkaluru chinpotukawa nyokananwakatanhi, hixa pirana nimaxyawakapa kihle hchinikanu nixyawakapa.

²⁰ Klu tshinanu hewi hi rawa satu yineru hita pixka hixahchinikanutatshri seyni wale tsonni. Hixa ruslahyawakpotu ruchinikanretatka halikaka.

²¹ Klu tshinanu pimrine ptowruneka wannako ralujyawaka tsonu ruchinikanretatkana seyni Jesus Cristo halujyawaka hi ruchinikanretatkana.

²² Seyni hixa himathexyawakaplu halikak-potu rixyawaka. Satu whentshi ruruyma kamrurewatatshri pixka rixa kamrurewleta hitayma kihle piranalu potuko hiwekkaklewatatshri piranaya.

²³ Hiyáhoni xye naluka yokanrenwakatanhi nexinwatshi hanu nixko hita.

²⁴ Tsru Hixikatshriwa Hoyakalu napohchinikanuta hixa nwaka nyiywakapa xekoyaka hit-koxa.

²⁵ Hiyrun-koxa nukchikhihlenutlu Epafrodito tshinkaluru nsatkakanwakaxyawakaphi. Waleni nmoletanru Cristo tshinanu, nepire nkamrureya Cristo tshinanu hiyrun-koxa niyahotkakjetanruni Cristo piranaya. Hixa yokanatanruni wale hita nmahaxinri tshinanu repixyawakapno.

²⁶ Klu tshinanu ralukpotutlu hixa ptowruneka rexyawakapa. Hiyrun-koxa hkojwakahchinikanutatka klu tshinanu hix-hima jempiranyehitatkalu hyeyixyawakatka.

²⁷ Halikaka hyeyixakanatakmaka, psokaklu rupniywakatka. Seyni Hoyakalu hetwamonutlu hiyrunu hi wale tsonu retwamonuta seyni hit-koxa. Hiyáhoni tsru wamontshi potuko hi raluk-hekhiretno.

²⁸ Hiyahokni nyokanpirahapkatlu Epafrodito hixa nwaka, hixa hexinpatkalu hpoyikowatanutnaka hiyrunu hit-koxa nutuk-wamonuwletanutka.

²⁹ Hiyáhoni Tsru Hixikatshriwa Cristo tshinanu hyoptotanru tsru poyikowluyma. Xye jeji pixkalune hkahwakpiratanu.

³⁰ Klu tshinanu Cristo tshinanu hkamrurewaxyawaka tshinanu psokaklu rupniywaka. Kyowikowaka rutajnawa hita repixyawaka hixa mumukatanutu tshinanu.