Filemom 1 - Bíblia

Haliklu Piranapni

¹ Hita Paulo-no, Cristo Jesus tshinanu kachitkalurno hiyrunu Cristo tshinanu wmoletanru, Timóteo tshinkaluru, wyonatlo twu yonawahlo pixa Filemom tshinanupa wuchinikanru potuko, wimotsluyi kamrurtshi tshinanuya.

² Wmoletanro Cristo tshinanu nwaka Áfia tshinkaluro koxa wyonatlu hiyrun-koxa Arquipo tshinkaluru, wepire yahotkaklu Cristo tshinanu nwaka wyonawahlewata. Hiyrun-koxa Cristo halixatshine pixapji hapatjexikatshine nwakkaka.

³ Wuru Hoyakalu hiyrunu Wutsrukate Jesus Cristo hepixle hiyrunu hapnanuhchinikanru reneklewle hixaymapa.

Paulo, Filemom Hichinikanrexyawaka Piranapni

⁴ Filemom nunkakanyi, ptowru katako nanjihohnexini, pixa hiwaka nkochtshekanu. Npoyahnutlu Noyakalute pixa tshinanu.

⁵ Tsru Hixikatshriwa Jesus puchinikanrexyawaka hiyrunu palixle hiyrunu ptowruneka Jesus halixatshine potukalune puchinikanrexyawaka njempiranyehita.

⁶ Hiyáhoni nanjijetlu Hoyakalu palixle hepixlewatatshri, himukatatshri rixyawakapa. Rimaxikowakapa ptowru potuko kihleru pixa hwatshri, Cristo Jesus hikchijikolni wale.

⁷ Klu tshinanu wumuwpotuta hiyrunu wapnanuhchinikanuta pimrine puchinikanrexyawaka tshinanu. Klu tshinanu Jesus halixatshine potukalune, repixahchinikanutkana, pepixle tshinanna, pixa Cristo tshinanu nmoletanru.

Paulo, Filemom Ranjixyawaka Kihle Yoptole Rixyawakaplu Onésimo Tshinkaluru Piranapni

⁸ Hiyáhoni yahmaklu numukata towuwleta Cristo hitshre tshinanno, pkamhiywakaplu halukkalurutka,

⁹ Seyni hichiniklewlu tshinanu nanjityi kajnako pixinno, hita Paulo-no tsrutsolejno hiyrun-koxa Jesus Cristo tshinanu kachitkalurno hanjityi.

¹⁰ Noturu pixkalutu Onésimo tshinkaluru tshinanu nanjityi. Wale honukla nkachikanaxikowaka nmatkajinri, Cristo piranaya.

¹¹ Hike mkochpakkatukananu rixapa mitshikananu pixa tshinanu. Seyni xawakni hijhakalurni pixa tshinanu hiyrun-koxa hita tshinanu.

¹² Xawakni nsatkakanru pixa nwaka. Hiyáhoni xawakni nanjityi pyoptoxyawakaplu wale namotanru potuko.

¹³ Ntshipetpiratmaklu hitayma rutujyawakapa, hita repixyawakamkapa, pixa kachrijru nkachixikoluya kihle piranalu potuko hiwekkaklewatatshri pirana tshinanu.

¹⁴ Seyni pihchinikanu nmimatkanu tshinanu hi nutukkakpiratlu. Klu tshinanu pepixinipno nalukatkalu ntowreru hma kahwajikotupa seyni pixa halujini tsonu numutukanru.

¹⁵ Onésimo hetko wane ruchpajyatka pchinhohnejiji tshinanu tsonu xawakni klanu hyamtanutka pimwahohnekanaxyawakaplu.

¹⁶ Seyni xawakni hi towrertshi pixkalutupatkani seyni towrertshi yohnik-halukkaluru, moltshi hamotkaluru pixkalutupatkani. Hita tshinanu halikaka hamotkalurni hiyáhoni halikaka pixayma wane yohnik-hamotkalurni wale. Himane tshinanu hamotkalurni hiyrun-koxa Tsru Hixikatshriwa Jesus tshinanu.

¹⁷ Pepire pkahwajinipno Onésimo pyoptotanu, hatatjewa pyoptoleru hitni.

¹⁸ Pa hixanu rumtujinixkayi ho h-deve-xinyi, hita conta-te putakanru wale ptowruka.

¹⁹ Hita Paulo-no nyonatlo twu, hitako nomyoyma. Halikaka h-deve-lerumka nwenutanu seyni hi nujhalu nuchinkapkajyawakyi hi psokananu p-deve-tno pixa haté piwejinriko p-deve-tno.

²⁰ Cristo tshinanu nmoletanru, wane pixanno halikaka numuxyawakapyi Tsru Hixikatshriwa Jesus-ya. Nohchinikanu poyikowkakanu Tsru Hixikatshriwa Jesus-ya.

Haliklewlu Piranapni

²¹ Nyonanwakatyi klu tshinanu nmunanhayi pixa kajnako pixyawakapa ntokanu tshinanu. Hiyrun-koxa nimatlu nanjixyawakyi pirana wane yohnikapa pkamhanu.

²² Hiyrun-koxa wane pchinika palpokotanru nohrukolupa. Klu tshinanu nalixlu panjihohnere tshinanu hewi nkochpajiko, pixa nwaka nsatkakko.

²³ Epafras tshinkaluru, hitayma kachitkaluru Cristo Jesus pirana tshinanu, halikyi.

²⁴ Nepirene Marcos tshinkaluru, Aristarco tshinkaluru, Demas tshinkaluru hiyrunu Lucas tshinkaluru halikyi.

²⁵ Wutsrukate Jesus Cristo hihlenu hepixlewatatshri piwejinriymalutupa.