Efésios 4 - Bíblia

Cristo Mane Psojitenwu Hiyrunu Pa Hchinikanurunwu Wixyawaka Piranapni

¹ Wale tshinanu, hita Paulo-no, kachitkalurno klu tshinanu Nutsrukate Jesus Cristo nomkahita, nanjithi hiwekan-xako Hoyakalu halujyawak-potuko homkahitanu htshanixikowaka.

² Ptowruko hi halixkoxinwa, mayohonephi, hwachatanu xako. Hichinikkakanu hekhikakanu hixkakluko. Hiyáhoni hixkakluko hepixkakanu.

³ Ptowru potuko himukaxyawaka hixanu pa hchinikanurune hixyawaka, pa neru rixkakanwu Hoyakalu Hiwejikaluru pa hchinikanurune wixini.

⁴ Cristo mane satupkalu hiyrun-koxa Hoyakalu Hiwejikaluru satupkalu. Wkahwakleru hiwejikaluru hike rixiniko mnikawnakatupa Hoyakalu tshanixlewle satupkalutu.

⁵ Wutsrukate satupkalu, halixlewlu koxa satupka, h-batiza-xikowak-koxa satupka.

⁶ Hiyrun-koxa Hoyakalu satupkalu hixa halixatshinwu hiru, ptowru potuko towutatshrini, ptowru halixatshri pnute hya kamrurewlexyalu, ptowru halixatshri hitokote hwatshritkani.

⁷ Hixa satkaka yoptotlu himatkalnutshi renekachale hiwekkaklewatatshri psolukatka reneksaxyawakatkawu satkakwu Cristo henejyawu psolukatka.

⁸ Wane htshina yonatkaluru halikakalutu mitshikawlur-pirana: “Teno potu ratskotatka. Kachitkalune hkosekamta, Yine reneka renekachaxikolna.”

⁹ Kluhe raluk-tshinreta “ratskoxyawakatka”? Wla raluk-tshinreta mitshikananhapka hserpika tshiji nwaka, tshiji hitokot-potuko rapkapa.

¹⁰ Hiyáhoni serpikatshri, walekatkani tenhohne potuko yatshritka, tenhohne pnut-potu hwatshri hyatka, psoluka mal-hohnewak-potuko htsepota.

¹¹ Walekatkani henekachalkaka reneksatna yine. Reneksatkatkana nuretkalune rixyawakna, pimrine reneksata Hoyakalu tokanu hinkakletatshine rixyawakna, pimrine reneksatna Hoyakalu tokanu jinkakletaklerune rixyawakna hiyrun-koxa reneksatna halixatshine hinotatshine rixyawakna hiyrunu pimrine reneksatna hapatjetatshine kosekatshine rixyawakna.

¹² Xye hkamha ralpokoxyawakna hinerune ptowruneka Cristo halukanru hkamhiywakna. Wan-rixna, Cristo mane hkamhapotuxyawakapna htserutahchinikanuxikowakapna Cristo piranaya.

¹³ Hiyáhoni hixa ptowrunekwu wan-hixatshinwu wapkapanru pa hchinikanurutu wixyawaka walixle Jesus Cristo-ya hiyrun-koxa wimatjempiranyehitanru Hoyakalu whene pirana. Wan-hixatshine tsrune hixinwa Cristo piranaya klu tshinanu wtseruwnanu haté Cristo yáholu potuko wixinwa.

¹⁴ Hiyáhoni hi mturune pixka wixanu walixinpatkalu Hoyakalu pirana. Mtser-halixlene ruwchiwchikak-honuka hiyrunu pnuko hanikkalunetkani hihchinikanuyna weytshi hasruklewatatshineya. Nyi yokwirewlu hasruklewatatshine walekni hitseklu pixkalutu mtser-halixlene hpupjehapokajyawakapna.

¹⁵ Hi wan-hixahchinikanutanu seyni halikaka pirana wunkakletanu wekhixyawakapna wamotlene. Hiyáhoni wujhanru wtseruwna halixlexyawaka ptowru piranako Cristo tshinanuya. Cristo honukla jiwtshi. Walekni Cristo halixatshine hapatjetatshine kosekatshri.

¹⁶ Walekni haptowru mankaklewatatshri. Himane psojitkaka rapatjeta pa manepka hkamhiyatkalu. Hiyáhoni Cristo mane psojitkaka yokakkalunwu. Satkaka psojite hepixka. Cristo pixkonu tshinanu. Hiyáhoni satkaka mantshi psojite Cristo halukanru hkamhini htserutlu Cristo mane. Wuchinikle tshinanu wtserutlu Cristo mane.

Herotu Wiwejinri Cristo Pixkonu Tshinanu Piranapni

¹⁷ Hiyáhoni Wutsrukate Jesus hiwaka tshinanu wane ntshina hiykolethi: Hi malixkane pixka hixa hiwekletanu, klu tshinanu wanna mahijeru hichinikanuwleta.

¹⁸ Halikakalutu tokantshi hi rimatjemna. Hi rawyana hiwejikaluru Hoyakalu henejyamkana klu tshinanu mimatjemkan-potukni hiyrun-koxa hchikohajiwatna.

¹⁹ Hi rimat-patewatna. Wannako henejnawa ptowru hektutu hkamhiywakna hiyrun-koxa ptowru mpowratu romkahitna.

²⁰ Seyni hi xye pirana pixka hixa himatjemletanutkalu Cristo pirana.

²¹ Halikaka hjempiranyehreru Cristo hasruklewle wane potuko hixa hasrukletka halikakalutu tokantshi Jesus-ya.

²² Hiknokanru xako mitshikananu hixjekanaxyawaka hixako halujyawaka, walekni himtukjekanathi sotanuhonutshi yokwire tshinanu.

²³ Hihchinikanu hiyrunu hiwejinri koxa herotexiko.

²⁴ Herotu yineru hitajinwa, xye herotu yineru Hoyakalu yáholutkani. Rekhitka satu hiwejikaluru halikakalutu potukalu hiyrunu Hoyakalu halukanruko rekhitka.

²⁵ Hiyáhoni xawakni hi hweyawatanu. Seyni hixa satkaka hijhalu halikakalutu pirana hinkajyawakna Cristo tshinanu hmoletanune. Klu tshinanu hixa ptowrunekwu Cristo mane psojitenwu.

²⁶ Hjihekanuwaxini hi hitshitanru jhekantshi himtujyawakaphi. Hiyrunu hi jihekanuwatatshinekhi rimxijini tkatshi.

²⁷ Hi pchinhohnejijiko henekanru tsru kamtshi hixa hyokwijexyawaka.

²⁸ Katshowhurukananu hi wane pnuteko htshowhuwatanutka seyni hkamrurewatanu. Waleko himyoya kihler-kamrurtshi hkamhanu hkayaxyawakapa. Wan-hixatshri himukata hapikletanna mahaxikatshine.

²⁹ Hi satukna tokantshi hektutu himtuklewatatshri hyanumaxini seyni kihleru tokantshi halukkaluru, tseruwaka hchinikanrewatatshripa tokantshi tsonu hyanumaxini. Yijnakotatshine hepixatshri tokantshi yanumaxiko.

³⁰ Hi hwamontakanru Hoyakalu Hiwejikaluru. Klu tshinanu Hoyakalu Hiwejikaluru himaxikolexikalunhi. Hoyakalununhi hi ruknokanhi haté rapojinipa hiweklu hohne potuko Hoyakaluyma.

³¹ Hiknokanru ptowru hchikohajiwaxinri, ptowru himtuwnalu jhekantshi, ptowru sapletshkaka, ptowru heyiklewlu, ptowru hixatshri hahnantshi hiknokanu.

³² Seyni hichinikanuwyehkakanu. Hetwamonkakanu. Hixkakluko hamtakahchinikankakyehitanu hektutuya Hoyakalu hiknokhektunuxyawakhi Cristo tshinanu pixka.