Efésios 1 - Bíblia

¹ Hita, Paulo-no, Jesus Cristo nurrerno, Hoyakalu halujyawakako tshinanu, nyonatlo twu yonawahlo, Hoyakalu hayinetene tshinanu. Hixa Éfeso hajenhi, Cristo Jesus munanhahohnekanatatshinhi tshinanu nyonatlo.

² Hoyakalu henekachale hihlenu yoptotatshinephi, kihlehchinikanurunephi Wuru Hoyakaluya hiyrunu Wutsrukate Jesus Cristo tshinanuya.

Jesus Cristo Tshinanu Wimwaleru Wiwejinri Piranapni

³ Himalwutkalurni Wutsrukate Jesus Cristo Hoyakalute, himalwutkalurni Wutsrukate Jesus Cristo Hiru. Hoyakalu honra ptowru hixatshri kihleru wiwejinri tshinanupa tenhohne hwatshri heneklewatatshri, hixa Cristo-ymalunwu tshinanu.

⁴ Wan-rixa Hoyakalu. Xye tshiji hmuyakotkanuklunuwa hnuretlu Cristo himwatshinepwu wixyawaka. Hnuretna, yine potukalune rixyawakapna hike mixkanepni Hoyakalu yhaleya, klu tshinanu ruchinikwu Hoyakalu.

⁵ Xye tshiji hiyakotkoklunu pnutekananuko Hoyakalu nurehchinikanuxnawa wale hiturune rixkajyawakapwu Jesus Cristo-ya, walenuko wixyawakapa. Wan-rixa klu tshinanu Hoyakalu haluklu wan-rixahchinikanuxyawaka.

⁶ Wimalwutanru Hoyakalu renekachale renejya tshinanwu. Ruhlenu renekachale tsru potuko hixa nwaka ruchinikanrexinri wan-rixachata wuchinikanretjeru Jesus tshinanu.

⁷ Wuchinikanretjeru Jesus hiwekkakwu waleko hihraha tshinanu rupnale tshinanu. Rupnale hiknokatkalu wektunu, Hoyakalu hihlenu henekachale tsrur-potuko tshinanu.

⁸ Hi psokananru himatkalewlu hiyrun-koxa rimatjemle renekanru hixa tshinanu.

⁹ Rimatkakwu Hoyakalu hihchinikanu pirana, mitshikananu yohimakanatkaluru pirana. Waleko ralujyawaka tshinanu wan-rixa klu tshinanu wan-rixahchinikanuta Hoyakalu, Cristo-yma kamrurewatatshrini.

¹⁰ Rapokpapkoluxinixka Hoyakalu heneklu Cristo htowuxyawakaplu ptowru potuko. Ptowru potuko tenhohne hwatshri hiyrun-koxa ptowru potuko tshiji hwatshri htowuxyawakapa.

¹¹ Hoyakalu ptowru potuko rixahchinikanuxyawaka kamhatshrini. Hiyáhoni Cristo-ymalunwu wixyawaka tshinanu wnuretka, xye tshiji hiyakotkoklunu pnutekananuko, Hoyakalu halujyawaka tshinanu, Hoyakalunerune wixyawakapa.

¹² Hiyáhoni hixa mitshikananu Cristo halixatshinwu himalwutanru Hoyakalu ruhlenu tsrur-potuko tshinanu.

¹³ Wale tshinanu hix-koxa halikak-potukananu tokantshi yijnakotatshinhi, munanhatkalu Cristo, kihle piranalu potuko hiwekkaklewatatshri pirana yijnakotatshinhi. Waneya hixa halixatshinhi rutakamta rimaxikolu Hoyakalu waleko Hiwejikaluru, runkakletleru.

¹⁴ Hoyakalu Hiwejikaluru renekna rayinetene hmunanhiynawa ptowru potuko Hoyakalu hinkakletakanatanru hyoptoxyawakapna rayinetene, haté wali yoptoletanru psol-potuko wyoptotanrupa. Hiyáhoni rimalwutko Hoyakalu hiyrunu rimathetko ruhlenu.

Paulo Hanjihohneyehitna Cristo Halixatshine Twu Yonawahlo Yoptotatshinepa Piranapni

¹⁵ Wale tshinan-koxa hixa Wutsrukate Jesus halixyawaka njempiranyehita hiyrun-koxa hixa pimrine potukalune Cristo halixatshine hichinijyawaka pirana njemini,

¹⁶ hi nutuk-poyahnutletlu Hoyakalu hixa tshinanu. Nanjihohnexini nuchinikhi nanjihohneyehjexyawakhi.

¹⁷ Nanjijetlu Wutsrukate Jesus Cristo Hoyakalute, waleni Hirtshi ptowru potuko royaknu, renejyawakaphi himatkaltshi Hoyakalu Hiwejikaluru henekanwu hiphujetlewatatshri rimathexikolupa halikakalutu pirana Hoyakalu yehiya.

¹⁸ Hoyakalu nanjijeta hkotpukahchinikanuxyawakaphi waneya hixa himukata himatletlu hma mahijeruxyawakanupa Hoyakalu nurexyawakhi tshinanupa. Hiyrun-koxa himaxyawakaplu hi psokananru wyoptotanrupa wiwejinri pirana halixatshine tshinanu, potukalune Jesus halixatshine tshinanupa.

¹⁹ Hiyrun-koxa wimaxyawakaplu hi psokananru hpixkonu, wmixkotjeru, hixa Cristo halixatshinwu hwatshinetkawu tshinanu. Wan-rixa kamrureta Hoyakalu hpixkonuyma.

²⁰ Hoyakalu hekhitlu hpixkonu Cristo hipuktshi riwekkajinixkalu waneya Hoyakalu hituplatlu Jesus hpotukle sreta tenhohne hpixkonuyma.

²¹ Ten-hajene ptowruneko tsrukakalune pnute, tsru hitakkalurkaka pnute, ptowru hixkolkaka pnute tsru potni wale, Jesus Cristo. Hi xye hohnepka ptowru potuka yokanatatshripni seyni ptowru hinatshri hohnepa koxa pnuterutni Jesus Cristo.

²² Hiyrun-koxa Hoyakalu hitaklu Cristo ptowru potuko towutatshri rixyawaka hiyrun-koxa reneklu Cristo ptowru potuko Cristo halixatshine hapatjetatshine tskala hwatshri rutsrukateknin-wale.

²³ Cristo halixatshine hapatjetatshine Cristo mane yaholukni wanna. Satkaka halixatshri Cristo mane psojitekni wale. Cristo-ni ptowru potuko nikat-kamruretatshri psol-potuko.