Atos 6 - Bíblia

Halixatshine Hapatjetatshine Hepixatshine Hitajikolu Piranapni

¹ Hiyáhoni wale hohnekaka rixolewnatkana Cristo halixatshine. Seyni hejnu hima hakanhatka grego-nerune, hebreu-neruneyma. Klu tshinanu grego hipnahnurutatshrone hi hima hislahka heneksajexikowakaya pa hohne pejnu.

² Hiyáhoni doze nuretkalune rapatjetkana yine waneya wane htshinna: — Hi kihleru wuknojyawakaplu wunkaklexyawaklu Hoyakalu tokanu nikkaluru tshinanu.

³ Hiyáhoni, nomolene, hnuretanna sete jejine hixa tskalaya, jejine kihle piranyehirune, Hoyakalu Hiwejikaluru katsepoyalune, kahchinikanerune. Wanna wutakanu xye kamrurtshi hkamhiywakapna.

⁴ Seyni hixa womkahitanru hanjihohneru hiyrunu Hoyakalu tokanu wunkaklexyawaka.

⁵ Waneya ptowru yineru hikchikhihlenutlu wane htshinyawakna nuretkalune. Hiyáhoni hnuretluna Estêvão, jeji Cristo halixatshri potuka hiyrun-koxa katsepoylu Hoyakalu Hiwejikaluru. Hiyrun-koxa hnuretna Filipe, Prócoro, Nicanor, Timom, Pármenas, Nicolau Antioquia hajerni. Walemka hi judeu-neru seyni judeu halixyawaka homkahitatshrini.

⁶ Nyi jejine nuretkalune hoji sreta hitakka. Waneya nuretkalune hanjihohnetatka, rutakamyotna jejine jiwu hoho.

⁷ Hiyáhoni Hoyakalu tokanu mixkowatatka. Rixolewnatkana Cristo halixatshine Jerusalém poktshiya. Hiyrun-koxa hixo sacerdote-ne homkahitlu halixlewlu.

Estêvão Hapatjehchinikanutatshine Hoji Sreta Hitajikolu Piranapni

⁸ Waneya Estêvão Hoyakalu hamotanru potuko katsepoylu hpixkonu. Xye jeji tsru himyekaklewatatshrikaka tsru hetkalurkaka koxa hkamha yine tskalaya.

⁹ Seyni satkaka yineru hanjihohnewakapji hislahatshine Libertos tshinkalune, Cireneus, Alexandrinos, Cilícia, Ásia hichpajikatshine, ruhjekakna Estêvão-yma.

¹⁰ Seyni hi rumukata halliretlu Estêvão rimatkalnu tshinanu hiyrun-koxa Hiwejikaluru hyanumkakjeru tshinanu.

¹¹ Hiyáhoni Estêvão kamnitjene hyohniyehitluna satkaka jeji wane htshinyawakapluna Estêvão: — Ha hixa wjemlu xye jeji hektutu htshinyehixyawaklu Moisés hiyrun-koxa Hoyakalu yehi.

¹² Estêvão kamnitatshine jihekna hixolune yine, judeu-ne tsrukakalutene koxa hiyrun-koxa kasruklewaklerune hinanchitkaluru pirana hasruklewatatshine. Rapyehitluna Estêvão. Waneya ranikluna jemahchinikanyehixikowakapji.

¹³ Hiyáhoni ranikluna weyawatatshine hweyawyehixyawakapluna Estêvão: — Xye jeji hi hituka hektutu tshinrenwakatlu Hoyakalupji potukalu hiyrunu Moisés yonreru koxa.

¹⁴ Klu tshinanu wjemlu wane htshinyawaklu: Xye Jesus Nazaré hajeru nikatanru Hoyakalupji hiyrun-koxa pnuko rixkakanwu wixjexyawaka Moisés yokanre hixa tshinanu.

¹⁵ Waneya ptowru yineru tuplatatshine jemahchinikankakjexikowakapji yopukhapotutlu. Rethojitluna Estêvão. Hiwejikaluru Hoyakalu towreru tenhohne hichpajikatshri hoji pixka rixhojita Estêvão.