Atos 5 - Bíblia

Ananias Hiyrunu Safira Piranapni

¹ Satu jeji Ananias hiwakatletatshri hhanunro Safira-yma hichankatkalu psoji tshiji.

² Seyni psoji tshiji wenru Ananias himutuka hhanunro koxa himatyehitatkalu. Seyni tshiji wenru psojite tsonu ranikatka Ananias waneya renekna nuretkalune.

³ Waneya Pedro wan-tshinru: — Ananias, haklu tshinanhe pitshitlu Satanás htowuxyawakyi pihchinikanuya pweyawyehixyawaklu Hoyakalu Hiwejikaluru pumutujyawaklu psoji tshiji wenru?

⁴ Pma muchankakanuklunuwalu tshiji, hi he pixanu rixapa? Haté pali hichankalexinixkalu tshiji, hi he pixanni tiyiro? Haklu tshinanhe paluka wan-hixletatka? Hi yineru pweyawyehita seyni halikaka Hoyakaluko pweyawyehita.

⁵ Xye tokantshi hjeminixka Ananias waneya waneklukawa hyawnanatka rupnanatka. Hiyáhoni tsru piklu rixna jempiranyehitatshine ptowruneka.

⁶ Hiyáhoni rapokna maklujine hpoyitatkaluna himanni waneya maleka ranikluna hkapnatatkaluna.

⁷ Waneya mapa hora rixini tjihlokatka Ananias-ni hnunro seyni hi timatakanata wan-rixyawakanatka Ananias-ni.

⁸ Waneya Pedro hepomhalo: — Punkakanno, wla pso wenrurhe pyoptoxyalu tshiji? Waneya tuhitlu: — Hehe, wane pso wenru wyoptota.

⁹ Hiyáhoni Pedro wan-tshinatkalo: — Haklu tshinanhe pixa phanuruyma pa hchinikanurutu hixa yahotletlu Hoyakalu Hiwejikaluru? Petanna! Hiphaptostsitkana maklujine phanurni kapnatapatshine hiyrunu pix-koxa hkochpakanna.

¹⁰ Waneklukawa Pedro jixistsi tyawnamtanatka. Tupnanatka. Waneya hjihlojinixkana maklujine, hipnatshroni rukchijyalona waneya hkochpaklona thanurnistsi hkapnatanatkalona.

¹¹ Hiyáhoni Cristo halixatshine hapatjetatshine hiyrunu ptowru jempiranyehitatshine koxa pikpotutatka.

Hixo Himyekaklewatatshrikaka Hkamhana Nuretkalune Piranapni

¹² Nuretkalune kamhalu hixo hetkalurkaka, himyekaklewatatshrikaka koxa yine tskalaya hiyrunu rapatjejetna Hoyakalupji psojite Salomão tshinikowaka.

¹³ Pimrineko pika hepiretletna seyni wanepnawaka yine kahwakpirpotutna nuretkalune.

¹⁴ Híxona jejine, suxon-koxa halixlu Tsru Hixikatshriwa Cristo hiyáhoni rixolewnamtatkana Jesus halixatshinetka.

¹⁵ Haté yine koxa hanikna yeyixatshine hatnu tnumne rutakkana. Hijekoymana ho rukwereyma rutakkana pa katako Pedro wane hyapamxinipa wale mayawle katshpokanna.

¹⁶ Hixolune yine Jerusalém poktshistsi satkaka wane hwajetatshine hina. Ranikna yeyixatshine, hiwejikaluru hektutu himwatshine koxa ranikna waneya wanna ptowruneka hitskalakkatka.

Nuretkalune Kachixikowaka Piranapni

¹⁷ Waneya hpalnatka tsru sacerdote hiyrunu waleymalune saduceu-ne mkoje hajenni, wanna ptowruneka hahxatna nuretkalune.

¹⁸ Hkachitna nuretkalune waneya preso rutakkatkana.

¹⁹ Seyni wale yetshno potuko satu hiwejikaluru Hoyakalu towreru tenhohne hajeru kotpukatkalu preso hiphaptotkaka waneya ranikna nuretkalune maleka waneya wane htshina:

²⁰ — Hyanutka, Hoyakalupji hyopkakanu waneya hinkakanna xye herotu hiweklu pirana.

²¹ Xye tokantshi hyijnakoxinixkana, yetshpotukawa rixini hjihlokatkaluna Hoyakalupji waneya runkaklewatna. Seyni tsru sacerdote hiyrunu waleymalune hapatjejixatkana tsrukakalune judeu-ne hiyrunu tsrune judeu-ne ptowruneka. Wane pnute rawapjixatkana nuretkalune preso hwatshine.

²² Seyni preso yehi rapojinixkana soldado-ne, hi wane rukchijikatkana hiyáhoni hsatokatkana waneya runkaklewatna,

²³ wane htshinna: — Preso yehi wapoka wetlu hihle hichyaletatshri hiyrunu hinotatshine soldado-ne hiphapto hinaple hyopkakakanatna. Seyni wkotpujinixkalu preso hike yineru wane wukchijyatka.

²⁴ Waneya xye pirana hjeminiklunu Hoyakalupji kosekatshri hiyrunu tsru hixikatshinwa sacerdote-ne, hi rimat-hichinikanuwatatkana klukta rixatkana nuretkalune.

²⁵ Waneya pchini tsonu satuko hapoka, runkakna wane htshina: — Hjemanu! Preso hitakanune jejine Hoyakalupji hyopkakna runkakna yine.

²⁶ Hiyáhoni soldado-ne pohire h-soldado-teneyma Hoyakalupji nwaka hyana. Rawapna nuretkalune seyni hi hipokananu hkachitna klu tshinanu hpikna hixolune sotlujexyawakna wanna soldado-ne.

²⁷ Waneya soldado-ne hjemahchinikanyehitjene hoji sreta hitakna nuretkalune waneya tsru sacerdote wan-tshina:

²⁸ — Hi he wuykothi xye hiwaktshi pirana hmasruklewaxyawakanu? Seyni hetanu Jerusalém psoluyaka hyapiranata xye hasruklewlu hiyrunu hixa haluka hikolukletwu xye jeji hiylaxikowaka tshinanu.

²⁹ Pedro hiyrunu pimrine nuretkalune wan-tshin-hihretatkana: — Hoyakalu halujyawak-potu wujha homkahretanu seyni yine halujyawaka hike.

³⁰ Wutsrukatenni Hoyakalute hiwekkakatkalu Jesus hixa hiylaleru hahmuna skita hixpaleru.

³¹ Seyni Hoyakalu hitaklu Jesus hpotukle sreta Tsru Hixikatshriwa rixyawakapa yine hiwekkakatshri rixyawakapa. Renejyawakna judeu-ne rehchinikanuxyawakapna hiyrunu rektunna ruknojyawakapna.

³² Hixa hiyrunu Hoyakalu Hiwejikaluru koxa hiphujtatatshinwu xye pirana tshinanu. Hoyakalu henekna ralixjene Hiwejikaluru Potukalu.

Gamaliel Hiykole Piranapni

³³ Waneya hjemahchinikanyehitjene jeminiklunru xye pirana hjihekanuwatna hiyáhoni raluk-hiylaletna nuretkalune.

³⁴ Seyni satu fariseu-ne, Gamaliel hiwakatletatshri, yopkaka wanna hanikajite. Wale, hinanchitkaluru pirana hasruklewatatshrini, ptowru yineru kahwakpirpotutlu. Wale maleka hkochpakjixna nuretkalune pchini tsonu.

³⁵ Waneya Gamaliel wan-tshina: — Israel-nerune! Xakoka kluhe hkamhinna nyi jejine.

³⁶ Klu tshinanu mitshikawa ruphujewnatka Teudas tshinkaluru. Tsru rutajnawa hiyáhoni psokaklu quatrocentos jejine hepiretlu seyni ruylatkatka waneya ralixjene ptowruneka hipalatatka hiyáhoni hike hkamhatkana wanna.

³⁷ Waneya wane pnute rutakyahojikolhohnena yine rixinixka ruphujewnatka Judas tshinkaluru, Galileia hajeru. Hixo yineru homkahitlu waneya wale koxa hipnana waneya romkahitjene ptowruneka hipalatatka.

³⁸ Hiyáhoni xawakni nunkakhi: Hetachatanutkana nyi jejine hichochatanutkana klu tshinanu yinenu rixini xye chinikantshi, xye kamrurtshi pa hohne nikawnachatanu.

³⁹ Seyni Hoyakalunu rixinipa, hixa hi himukata himaletletanru. Pa katako haté Hoyakalu wyahota hixa. Waneya wanna halixlu Gamaliel tokanu.

⁴⁰ Hiyáhoni htomhatkana nuretkalune waneya rali kotshipjerexinna ruykotna Jesus hiwaka hma munkaklexyawakanpatkana waneya ruchotatkana.

⁴¹ Hiyáhoni nuretkalune hjemahchinikanyehixikowakna yehi ruchpajyana. Rumuwamtna klu tshinanu rutakyahokkana rumukata salewnalexyawakna haté reyikkana Jesus hiwaka tshinanu.

⁴² Ptowru hohneruka Hoyakalupjiya haté pa pjikakaya hi rutuk-hinkakletletluna Jesus Cristo pirana hi rutuk-hasrukletna yine.