Atos 28 - Bíblia

Malta Tshinikowaka Rapojyawakna Piranapni

¹ Waneya tshiji wapojinixka wimatatka xye mar powha hanikajite hwatshijitatshri Malta tshinikowaka rixyawaka.

² Wane hajene hihle yoptoletwu. Hpawatatkana klu tshinanu hinatkani hiyrunu katshiklerni waneya hyoptotwuna hixa satkakwu.

³ Paulo hapatjetlu kapluru tshitshmero hoho ruknoklu waneya himnu hichpakamta hameru tshinanu Paulo rachkamyotatka.

⁴ Waneya wane hwatshine hexinixkalu himnu Paulo-myo rachtshekayhixyawaka wane htshinna wannakakluko: — Jiylalewakleru hetkoni xye jeji. Seyni hi rupna mar powhaya seyni hapnokatatshri hi haluk-hiwekkakletlu wanepnawaka.

⁵ Seyni Paulo hiwlipatlu himnu tshitshmero hyana hiyáhoni hike rixatka Paulo.

⁶ Seyni wanna kahwaklu ranojiywaka Paulo ho hyawnanuna. Howukchini ruslahluna seyni hike rixa. Hiyáhoni ruprotakahchinikanutatkana waneya wane htshinna: — Hoyakalu hetkoni.

Públio Haniklu Paulo Hipji Rutujyawaklu Piranapni

⁷ Wanestsi rawa psoji tshiji, Públio tshinkaluru tshijneni, waleni tsru poktshi chefe-te. Hyoptohihlenutwu, hipji nwaka ranikatkawu waneya map-hohne pchinika ruslahhihlenutwu.

⁸ Públio hiru yeyixakanata hiyrunu htseruhata. Waneya Paulo jihlokyehitlu, ranjihohneta waneya wale hoho rutakamyota waneya rutskalaklu.

⁹ Waneya ralixinixka Paulo ptowru tshijne hajene yeyixatshine yanwakatlu hiyáhoni wanna koxa rutskalaka.

¹⁰ Waneya wane hajene kahwakpirpotutwu. Waneya wuchpakpiraxinixka renekwuna ptowruka wmahaxinri.

Hyatnaka Paulo Piranapni

¹¹ Waneya mapa ksuru katshikleru papko hiknohinixka tsro kanawa Alexandria hichpajikatshro wpokownatka. Katshikleru papko pchinika hewi tshijne hitspakjekanatatshrotlo. Kanawajri hwa yonhatatshri wane htshina: Hoyakalune hepirune.

¹² Waneya Siracusa poktshi wapoka map-hohne wane wutukatka.

¹³ Waneya wsajrukapa hiyáhoni Régio poktshi wapokatka. Wale prika kanniphalu yinuwakatka sul sreta ruchpajya hiyáhoni wale prika Pozuoli poktshi wapokatka.

¹⁴ Wane wukchijyana pimrine Hoyakalu halixatshine waneya ranjitwuna pa semana wutujyawaka wannayma. Wane pnut-hohne tsonu Roma poktshi wapokatka.

¹⁵ Waneya Hoyakalu halixatshine Roma poktshi hwatshine jempiranyehixinixkawu wunamxyawakatka, hyanwakatwuna Praça de Ápio poktshi hiyrunu Três Vendas poktshi hyoptoxyawuna. Waneya Paulo hexinixkana Hoyakalu halixatshine hpoyahnutlu Hoyakalu hiyrunu hmixkowahchinikanutatka.

Roma Poktshi Rawyawaka Paulo Piranapni

¹⁶ Waneya Roma poktshi wapojinixka Paulo hitshitka papji rawyawakapa walepka seyni satupka soldado hislahlu.

¹⁷ Map-hohne rixinixka Paulo tshanixna judeu chefe-tene. Waneya rapatjexinixkana judeu chefe-tene Paulo wan-tshina: — Nonerune, hike hektutu nkamhiyna wimolene, hiyrun-koxa hi psojikna nmajnakowaxyalu Wutsrukatenni Abraão-ni, Isaque-ni, Jacó-ni hasrujyawu pirana. Seyni wanepnawaka judeu chefe-tene kachikjixno Jerusalém poktshiya waneya nenekkatka romano-myoya.

¹⁸ Waneya romano-ne hepomsatno hiyáhoni raluka hicholetno klu tshinanu hike nkamha nuylaxikowakapa.

¹⁹ Seyni wane hajene judeu-ne hi haluklu ruchoxyawakapnona romano-ne. Wale tshinanu nanjitlu Roma poktshi nyiywakapa César tshinkaluru rujhahchinikanyehixyawakapno. Seyni wanepnawaka hike ntshinanwakatna nonerune.

²⁰ Wale tshinanu naluk-hetlethi niynumsaxyawakaphi. Xye corrente-kaka nostuxikolu israel-nerune kahwakleru nalixyawaka tshinanu.

²¹ Waneya ruhitluna Paulo: — Hike yonawahlo wyoptota Judeia tshijne hichpajikatshri pixa pirana. Hiyrun-koxa hi satukna wimole wane hichpajikatshri hanikpiranyehityi, hi koxa pnu pejnu htshinanwakatyina.

²² Seyni waluka jemletlu pihchinikanu klu tshinanu wimata ptowru sreta hajene pnu pejnu htshinanwakatyina pixa hiyrunu pixa pixka hixatshine.

Paulo Hinkaklewata Roma Poktshiya Piranapni

²³ Waneya Paulo hiyrunu judeu-nerune marca-hohnetlu hapatjeru hkamhiywakapna. Wale hohne rixinixka hix-potuko judeu-ne hapatjeyehitlu Paulo hwiywaka. Psol-hohneruka Paulo hiynumsatna. Hkochtsheklu Moisés yonreru pirana hiyrunu Hoyakalu tokanu hinkakletatshinni tshinre yonatkaluru runkajyawakapna Hoyakalu pohirewaxyawaka pirana. Waneya htowutna Jesus pirana ralixyawakapna.

²⁴ Satkaka halixlu Paulo tshinyawaka seyni pimrine hi halixlu.

²⁵ Wale tshinanu malixkane yinuwaka hihjekakleta wannakakluko hiyáhoni hyinuwaka hichpakletna. Seyni hma muchpajyawakanupna wanna, Paulo wan-tshinna: — Hoyakalu Hiwejikaluru hinkakna hixa hitsrukatenni Hoyakalu tokanu hinkakletatshriniya, Isaías tshinkalurni tokanu tshinanu, wla htshina:

^26-27 “Pyanwakatanna nyi yine waneya wla ptshinanna: Hixa yijnakochatanu seyni hi himatjemanu. Hixa hijha himatjemletanru seyni hikeklu himatanru, klu tshinanu nyi yine chiko hchinikanna. Hike hjemna hijnakopnaya hiyrunu ruchyayhalexnawana. Wane hma mixkanumkana pa katako rapkathojitna hiyhaleya, pa katako hijnakopna tshinanu hyijnakotanna hiyrunu rimatjemanna hihchinikanuya waneya rehchinikanutanna nutskalakanna.”

²⁸ Waneya Paulo wan-tshina: — Himatanu, Hoyakalu yokananwakat-koxna judeu mixkane hiwekkaklewatatshri pirana hiyáhoni wanna yijnakotanru hyoptotanruna wale pirana.

²⁹ Waneya rali wan-tshinretatkalu Paulo, judeu-nerune hichpakamta ruhjekakna wannakakluko.

Hepi Mhale Hostutkaluru Rixatka Paulo Piranapni

³⁰ Waneya wan-rutuka Paulo hepi mhale. Pantshi wenutkaluru rawakanata. Katukta hapyehitlu Paulo hyoptohihlenutlu.

³¹ Tsru hihchinikanuyma runkaklewata Hoyakalu pohirewaxyawaka pirana, Jesus Cristo pirana koxa hiyrunu hike himaletpiranatlu.