Atos 26 - Bíblia

Paulo Hinkaklexnawa Agripa Yehiya Piranapni

¹ Hiyáhoni Agripa wan-tshinatkalu Paulo: — Pumukata hinkakletlexnawa. Waneya Paulo romukamyota hyinuwaka yanumletatka.

² Wane htshina: — Phuru Agripa, npoyikowata pihoji sreta nyopkajyawaka nunkaklexinwa ptowru pirana judeu-ne jihyehixyano.

³ Klu tshinanu pixa himatyehpotutlu judeu-ne hixannu hiyrun-koxa klu pirana rimaletkakjetna hiyáhoni nanjityi puhle yijnakoleyehixyawakno.

⁴ Judeu-ne ptowruneka himatyehitno nmatureyakawa. Rimatna nmatureyakawakananuko ntshijne potuko Jerusalém poktshi nwajekanata.

⁵ Wanna himatakanatatkalu hiyáhoni ralujinipna rumukata hinkakletyina neyinuwaklekananuko fariseu-ne kihleru nixapa, hiyrunu fariseu-ne homkahpotutlu judeu hoyakalute.

⁶ Hiyáhoni hewi nyopkaka klu tshinanu nkahwakjetlu Hoyakalu hixa kojiretlexyawaknina wutsrukatenni mitshikawni.

⁷ Ptowru nonerunkaka hohi hoyetshno Hoyakalu hichinikanretatshine hiyrun-koxa hkahwakjetluna hyoptoxyawakapluna xye hkojirexikolna. Phuru Agripa, xye kahwakaluru pirana tshinanu judeu-ne jihyehjetno.

⁸ Haklu tshinanhe hixa, judeu-nhi, kahwaklu kyapreru rixyawaka halixyawaklu Hoyakalu himukata hiwekkakletna hipnatshine? Waneya wane pnute htshinatkana Paulo:

⁹ — Hit-koxa wane nixahchinikantapatka ptowruka nyahot-kamhaleta nkamnixyawaklu Jesus Nazaré hajeru.

¹⁰ Hiyáhoni wane potuko nixpatka Jerusalém poktshiya. Tsru hixikatshinwa sacerdote-ne hitshitno preso nutajyawakna hixolune potukalune Jesus halixatshine. Waneya ruylatkoklunutkana hit-koxa hikchikhihlenutlu wan-rixikowakanna.

¹¹ Hix-hohne potuko napnokatatkana ptowru hanjihohnewakapjikakaya haté nyapretakatkana ralixlena ruchoxyawakna. Nahkatkana haté pa poktshikaka napkapa napnokaxyawakapna.

¹² Wale tshinanukni pa kata Damasco nwaka nyatka, tsru hixikatshinwa sacerdote-ne yokanatno tsru hitakkaluru rixkaknona.

¹³ Waneya, Phuru, hanikaj-hohnetkani hatnu hapo nyapamtawa netlu katalu tenhohne hichpajikatshri. Tkatshi mero pnute hatajniru. Xye katalu hatawnayehitno nimotsatanune koxa ratawnayehita.

¹⁴ Waneya hixa ptowruneka tshiji yawnamtatka. Waneya tokantshi njema, judeu tokanu riynumaxyano, wla-tshinatshri: “Saulo, Saulo, haklu tshinanhe pkamnitno? Pkamnijetno seyni halikaka pumtukachaxnawa.”

¹⁵ — Waneya hita Paulo-no hihitlu: “Katyihe pixa Tsru Hixikatshriwayi?” — Waneya ruhitatka Tsru Hixikatshriwa: “Hita Jesus-no pkamnijetanruno.”

¹⁶ Ppalnanu pyotunotanu xako! Nnuretyi ntowreru pixyawaka hiyrunu ptowru yineru puphujtaxinri ptowruka petanru haté ptowruka nekhixyapyi. Wale tshinanu nyanwakatatkayi xye hohne.

¹⁷ Nkochpakanyi pa hohne judeu-myoya hiyrun-koxa judeu mixkanemyoya. Wanna yehi nyokanatanyi

¹⁸ pumrekhakajyawakna rumukata hichpaklexyawakna mapchahawakaya katalu romkahixyawakapna hiyrunu Satanás towre ruchpajyawakna Hoyakalu romkahixyawakapna. Waneya ralixlena tshinanu rektunna ruknojikona hiyrunu Hoyakalu nuretanune rixyawakapna.”

¹⁹ — Hiyáhoni, Phuru Agripa, hi nmajnakowaxyalu hetkaluru tenhohne hichpajikatshri.

²⁰ Seyni Damasco poktshi hajene hapka nunkaklexyalu xye pirana waneya Jerusalém poktshiya wane pnute Judeia tshijne psoluyaka haté judeu mixkane tskalaya nunkaklexyalu. Nunkakna rehchinikanuxinripna rektunna tshinanu Hoyakalu yehi hsatojinripna hiyrunu hkamhiywakapluna kamrurtshikaka rekhixnawakapwana rehchinikanutatkana.

²¹ Wale tshinanukni judeu-ne kachitno Hoyakalupjiya hiyáhoni raluk-hiylaletnona.

²² Seyni Hoyakalu hepixatkano hiyáhoni hewi nyopkaka xawakni nunkajyawakapna ptowru yineruka, tsrukakalune yanachalune koxa, netanru pirana psoluka. Seyni Moisés-ni hiyrunu tokantshi hinkakletatshinni tshinyawakna hinatshripa tokanu tsonu ntshina hita:

²³ Cristo haluka salewnaleta hiyrunu walepni mitshikananu yotunotatshripa hipnatshine tskalaya, katalu pixkalutu rekhixyawakapna judeu-ne hiyrunu judeu mixkane.

Festo Hiynumaxyalu Paulo Piranapni

²⁴ Waneya Paulo hinkaklexnawa seyni Festo tsru htokanu wane htshinyalu: — Paulo, pixlahe hipukalewatatka? Tsru pimatkallahe himtukatkayi?

²⁵ Seyni Paulo wan-tshinru: — Kchinikanuru Festo, hi nupukalewata. Ntokanu halikakni hiyrunu hpoyaho himatjemletlu.

²⁶ Klu tshinanu Phuru Agripa, pimatlu xyekaka hiyáhoni numukata phujewaka hiynumsaletyi. Hita nkahwaklu pimatyehitlu xyekaka klu tshinanu hi kahnete poktshi kamhikalurni xye.

²⁷ Phuru Agripa, palixluhe Hoyakalu tokanu hinkakletatshinni tokanu? Nimatyi palixyawaklu.

²⁸ Waneya Phuru Agripa wan-tshinatkalu Paulo: — Psokakno puykoxyano tshinanu halixatshrino.

²⁹ Waneya wane htshina Paulo: — Nanjitlu Hoyakalu ho xawakni ho howukchinipa pixa hiyrun-koxa xawakni nyijnakotjene ptowruneka hita pixka rixyawakapna Jesus Cristo halixatshinepni seyni corrente mostutkonepni.

Paulo Ruchotkamka Seyni Ranjitlu César Rexyawakapa Piranapni

³⁰ Waneya rali wan-tshinrexinixkalu xye pirana, Phuru Agripa, Festo, Berenice hiyrunu wannaymalune ptowruneka palnatka.

³¹ Waneya ruchpajinixkaluna wanna riynumsakakna wannakakluko waneya wane htshinna: — Hike hkamha xye jeji ruylaxikowakapa hi koxa hkachixikowakapa.

³² Waneya Phuru Agripa wan-tshinatkalu Festo: — Xye jeji ruchotkamka seyni ranjitlu César hjemahchinikanyehixyawakaplu.