Atos 25 - Bíblia

Paulo Hanjitlu César Rexyawakapa Piranapni

¹ Hiyáhoni wale tshijne rapokatka Festo tshinkaluru. Waneya map-hohne hiknohinixka Cesareia poktshi ruchpajyatka Jerusalém nwaka hyatka.

² Waneya tsrukakalune sacerdote-ne hiyrunu judeu-ne chefe-tene hinkakletlu Paulo pirana. Hjihyehitluna Paulo.

³ Ranjitluna Festo hyokanaxyawakaplu Paulo Jerusalém nwaka, klu tshinanu wanna hichinikanretlu Paulo ruylaxyawakluna hatnuya.

⁴ Seyni Festo hihitna wane htshinna: — Cesareia poktshi rutukawa Paulo hiyrunu xekoyaka nsatkapanu Cesareia nwaka.

⁵ Waneya wane htshinna Festo: — Hitshitanna satkaka hixa chefe-tene himotsaxyawakapno wjihyehixyawakaplu Paulo Cesareia poktshiya. Wetanu ho rawyahe jikolukanuru ho hike.

⁶ Waneya ho oito ho dez hohne Jerusalém poktshi rutukatka Festo waneya Cesareia nwaka hyatnaka. Wale prika rawapakjixlu Paulo, jemahchinikanyehixikowaka yehi htuplakanata Festo.

⁷ Waneya rapojinixka Paulo, judeu-ne Jerusalém hichpajikatshine sajruklu Paulo waneya hyopkakna hweyawyehitluna seyni hike himukata hekhiretlu halikakni htshinyehixyawakluna.

⁸ Waneya Paulo wan-tshina hihretna: — Hike nmajnakowaxyalu Moisés yonreru, hi koxa Hoyakalupjiko hi koxa ptowru yine towutatshri César yehiya.

⁹ Waneya judeu-ne hpoyikowkajyawakapa tshinanu Festo hepomhalu Paulo: — Pixlahe haluka Jerusalém nwaka pyiywakapa njemahchinikanyehixyawakapyi xyekaka tshinanu?

¹⁰ Waneya Paulo wan-tshina: — Romano-ne hoji sreta nyopkaka hjemahchinikanyehixyawakapnona klu tshinanu numukata hijhahchinikanyehletka hewiya. Seyni hike hektutu nkamhiyna judeu-ne, pix-koxa himatlu halikaka ntshina.

¹¹ Pa hixanu nmajnakowaxikmaklu hinanchitkaluruya hipuktshi hijhatshri hi nanjitlu niwejyawakapa seyni hweyaxiniklunnona hike himukata wannamyo henekletno. Hiyáhoni naluklu César tshinkaluru rujhahchinikanyehixyawakapno ho napnokatjewhe ho hike.

¹² Waneya Festo hiynumsatna ruykotjene waneya wane htshinru Paulo: — Panjitlu César pexyawakapa wale tshinanu César yehi potuko pyanu!

Festo Hinkajyawaklu Agripa Tshinkaluru Paulo Pirana

¹³ Pa hohnetnakni phuru Agripa tshinkaluru hiyrunu hhanunro Berenice tshinkaluro Cesareia poktshi hapoka rapyehixyawakaplu Festo.

¹⁴ Pimri hohnekaka wan-rutukatkana waneya Festo hinkaklu phuru Paulo pirana, wane htshina: — Hewi rawa satu jeji Félix hiknokamtanru hostutkaluru.

¹⁵ Jerusalém poktshi napkapinixka tsru hixikatshinwa sacerdote-ne hiyrunu judeu-ne tsrukakalutene hinkakno Paulo pirana. Hjihyehitluna Paulo. Ranjitnona ruylaxikolupa.

¹⁶ Seyni nuhitna: Romano-ne hi hasruhlu preso rutakhapkaxyawakaplu satu yineru kjihyehrewaklerune jihyehre hma muhitkonuklunuwa.

¹⁷ Waneya nyi judeu-ne hapojinixka Cesareia poktshi hi nkahwakachata seyni wale prikako yine jemahchinikanyehixikowaka yehi ntuplatatka waneya ntomhakjixatkalu xye jeji.

¹⁸ Waneya rapojinixkana hkamnitjene hyopkakna waneya hjihyehitluna Paulo seyni hikeni tsru jikolukanuru pirana rukchijyaluna Paulo, hi nixahchinikanuxyawaka pixka rixa pupjereta.

¹⁹ Seyni satu hjihyehixikolu tsonu rukchijyaluna Paulo wannako royakalutna pirana tshinanu hiyrunu satu hipnatshri Jesus pirana hkochtsheka seyni Paulo wan-tshina xye hipnatshri hima riwekatnaka.

²⁰ Seyni hi nukchikahchinikanuta hanu nixa himatletanru xye pixkalutu pirana hiyáhoni Paulo nepomhatka: Hi he Jerusalém nwaka paluka yaleta pjemahchinikanyehitko xye pjihyehixikolkaka tshinanu?

²¹ Seyni ranjitlu César rujhahchinikanyehixyawakaplu hiyáhoni nimretjixatkalu haté César yehi nyokanaxiniplu hohne.

²² Waneya phuru Agripa wan-tshinatkalu Festo: — Hitamka koxa haluka jemletlu xye jeji. Waneya Festo wan-tshinru: — Haté hehe, yetshikawa pjemanru.

Festo Hinkakatnaklu Agripa Piranapni

²³ Hiyáhoni wale prika Agripa hiyrunu Berenice tsru hpohirewleyma rimapokanna. Jemahchinikanyehixikowakapji hjihlokna soldado-ne chefe-teneyma hiyrunu tsrukakalune poktshi towutatshineyma. Waneya Festo tomhakjixatkalu Paulo.

²⁴ Festo wan-tshina: — Phuru Agripa hiyrun-koxa hixa ptowrunekhi hixayma hapatjetatshine, hetanru xye jeji. Judeu-nerune ptowruneka, hewi hwatshine haté Jerusalém hwatshine koxa wale pirana hinkakatkano. Hsaplewyehitluna ruylaxikowakapa.

²⁵ Seyni nimaxinixkalu hike tsru jikolukanuru hkamhatka ruylaxikolupa hiyrun-koxa waleko hanjitlu César rexyawakapa, nuchinikanuwata nyokanaxyawakaplu.

²⁶ Seyni hi nimata hanhe nixa yonreyehitanru Paulo tshinanu César nwaka nyokanreru. Hiyáhoni hewi nanikatkalu hix-yehiya, pix-yehiya potuko phuru Agripa pepomsaxyawaklu waneya numukata pa pirana yonrexinri.

²⁷ Klu tshinanu nkahwaklu hi kihleru hostutkaluru César yehi hyokanatkoklunu munkaklewyehitkotu klu potu hjihyehixika.