Atos 24 - Bíblia

Judeu-nerune Jihyehitlu Paulo Piranapni

¹ Cinco hohne hiknohinixka Cesareia poktshi nwaka hyatka. Tsru sacerdote Ananias tshinkaluru, pimrine tsrukakalune judeu-neyma hiyrunu satu himata yanumsatatshri Tértulo tshinkaluruyma wane hya. Félix hjihyehitluna Paulo.

² Waneya htomhaka Tértulo hiyáhoni hyinuwaka jihyehletlu Paulo, wane htshina: — Kchinikanuru Félix! Hix-hohne nonerune ruhlewahchinikanutna pixa tshinanu haté hixo pirana hihlepokotka yin-yehiya pixa tsru pimatkale tshinanu.

³ Ptowru hohneruka hiyrunu ptowru papkoluka wepixka xye ptowruka pixa tshinanu wepixka hiyáhoni wale tshinanu wpoyahnutjetyi.

⁴ Nma mimalexyawakanyi nanjityi pchini tsonujiji pyijnakoxyawakwu pchinikannu tshinanu.

⁵ Klu tshinanu wukchiklu xye jeji kojwaklewjetatshri rixyawaka, ptowru tshijne hajene judeu-ne hjihekkakjeta. Waleni nazaré-ne mkoje kosekatshri.

⁶ Hiyrun-koxa Hoyakalupji rumtukachtapa. Wale tshinanu wkachitlu. Waluka hikolukletmaklu hixa judeu-nwu hixikowakamka rixko.

⁷ Seyni soldado-ne pohire Lísias tshinkaluru hapyehitwu waneya psol-mixkonuyma wimyo hkonyawu Paulo.

⁸ Waneya Lísias yokanatna hjihyehitjene pix-yehi hyiywakapna hjihyehixyawakapluna. Pix-potuko hepomsaxinri waneya wale namako pimaxinri ptowru pirana wjihyehixyawaklu.

⁹ Waneya judeu-ne pa jihyehitkolu rixluna Paulo hiyrunu wane htshinna wanna, halikakni xye ptowruka.

Paulo Hihitna Hjihyehitjene Piranapni

¹⁰ Waneya Félix-mka hanjitlu Paulo hyanumaxyawakapa. Waneya Paulo wan-tshina: — Nimata hixo mhale pchinika judeu-nerune jemahchinikanyehilewatatshri pixatka. Wale tshinanu npoyikowata pixa hoji sreta numukata hinkakletlexinwa.

¹¹ Klu tshinanu pixa himukata himatletlu doze hohne tsonu hiknohatka Jerusalém nyiywakatka Tsru Hixikatshriwa Hoyakalu nimalwuxyawakapa.

¹² Seyni judeu-ne hi hikchijyano satu yineruyma nuhjekajyawaka Hoyakalupjiya hi koxa rukchijyanona pimrine njihejyawakna hanjihohnewakapjikakaya hi koxa tsru poktshi hajeneko nyotnekanata.

¹³ Hi koxa rumukata hekhiretnona halikakni rixyawaka hjihyehixyanona.

¹⁴ Seyni halikaka xye nuphujtaxnawa pix-yehiya. Hita himalwutlu Wutsrukatenni Hoyakalute, Jesus hatnu hapote homkahitatshri nixjexyawaka tshinanu. Judeu-ne wan-tshina, hi hima halikakni Jesus hatnu hapote. Seyni hita halixlu ptowruka Moisés yonreru pirana hiyrunu Hoyakalu tokanu hinkakletatshine yonre koxa nalixa.

¹⁵ Judeu-ne pixka nixahchinikanuta, Hoyakalu nkahwajyalu hipnatshine riwekkajyawakna Cristo halixatshine haté malixkane koxamka hiwekanu.

¹⁶ Wale tshinanu psol-hohneruka kihleru nyahot-kamhaleta Hoyakalu hetanuya, yine hetanuya koxa.

¹⁷ Hiyáhoni xawakni hixo mhale hiknohatka waneya nsatokanwakatlu Jerusalém tiyiro nenejyawakapna nonerune hiyrunu henekachal-koxa nanijyawakapa.

¹⁸ Xye nkamhakanatawa waneya satkaka judeu-ne Ásia tshijne hichpajikatshine hikchikno npowraxnawakwa Hoyakalupjiya. Seyni hi hixoluneymano hi koxa nkojwakakanatna yine.

¹⁹ Wannamka hewi pix-yehi rapokamkana rumukata jihyehletanmaknona satu pa hixanu nkamhakmaka halikaka.

²⁰ Ho haté nyi judeu-ne pepomhanu ho satu tsru jikolukanuru rukchijyanona judeu-ne njemahchinikanyehixikowakapa yehi nyopkakanu.

²¹ Seyni halikaka wanna hanikajite nyopkajiniklunu satu tokantshi tsonu ntshin-sapletatka: “Hixa jihyehitno xawakni klu tshinanu nalixlu pa hohnepa hipnatshine hiwekanutnaka.”

Paulo, Félix Hiyrunu Drusila Hoji Sreta Rapojikowaka Piranapni

²² Waneya xye pirana hyijnakoxinixka Félix hkahwakjixna klu tshinanu rali himatjemletatkalu Jesus hatnu hapote pirana. Hiyáhoni wane htshina: — Soldado-ne pohire Lísias hapojinipa tsonu hjemahchinikanyehitanyi.

²³ Waneya Félix satu soldado-ne pohire towuta Paulo rinoxyawaka seyni hi rostujixpotutatkalu haté rimatletlene himukata hanikanwakletlu hmahaxinri.

²⁴ Pa hohnetnakni runa Félix hhanunroyma Drusila, judeu-nero. Paulo htomhatka waneya hyijnakyehitatkalu Cristo Jesus halixikolu pirana.

²⁵ Paulo Félix riynumsakanatawa runkakna yineru hiwejinri potukaxikolu pirana, yineru mmunanhinynawakanupwa pirana hiyrunu hapnokaxikolu hinatshripa pirana. Waneya Félix pikatka. Waneya wane htshinru: — Pyanutka xawakni, numukaxinipa pa hohne nepukanyi.

²⁶ Félix kahwakkoxlu tiyiro renejyawakaplu Paulo ruchoxyawakaplu. Hiyáhoni wale tshinanu hix-kata repukatkalu Paulo, riynumsatlu.

²⁷ Waneya hepi mhale hiknohinixka Pórcio Festo tshinkaluru Félix kachrijru hjihlokatka, Cesareia poktshi htowuxyawakatka. Seyni Félix himretawalu Paulo preso-ya klu tshinanu raluka poyikowkakletna judeu-nerune.