Atos 22 - Bíblia

Paulo Hihitna Hjihyehitjene Piranapni

¹ — Jejine, nomolene, tsrune koxa hyijnakotanunno xawakni nunkaklexinwa hix-yehiya.

² Hjeminixkaluna judeu tokanu riynumaxyana, potshkepotukna. Wane htshina Paulo:

³ — Hita judeu-no Tarso poktshi Cilícia tshijne hwatshri hajerno seyni halikaka hewi Jerusalém poktshiya ntseruwniya Gamaliel hasrukanruno. Wale hasrukatkano ptowru pirana wutsrukatenni yonreru pirana hiyrunu nomkahpotutlu Hoyakalu hixa pixka ptowrunekhi hewi hwatshinhi.

⁴ Hita, Paulo-no, kamnijekanatna Cristo halixatshine ruylaxikowakapna. Nkachitna jejine, suxon-koxa waneya kapna nyochmakna.

⁵ Tsru sacerdote hiyrunu judeu-ne tsrukakalutene ptowruneka himukata hiphujtaletlu halikaka pirana ntshinyawaka klu tshinanu wanna yonawahlotekaka nyoptotatka Damasco poktshi hajene judeu-ne yokananwakaxikolu. Wane nixa hapoklexyalu Damasco wane hajene nkachixyawakapa Jerusalém nwaka nanijyawakna hostutkalune rapnokatkonna.

⁶ Waneya hanikaj-hohnetkani hatnu hapo nyapamtawa Damasco-stsitkano. Waneklukawa potuko tsru katalu tenhohne hichpajikatshri hatawnayehitno.

⁷ Nyawnatka tshiji, nyijnakotlu satu tokantshi wla-tshinatshri: “Saulo, Saulo, haklu tshinanhe pkamnitno?”

⁸ Waneya nepomhalu: “Katyihe pixa Tsru Hixikatshriwayi? Ruhitatkano: “Hita Jesus-no pkamnijetanruno.”

⁹ Nimotsatanune koxa hetlu katalu hiyáhoni hpikna seyni hi hjemluna niynumsatjeru tokantshi.

¹⁰ Waneya nepomhalu: “Klu pothe nkamhanu, Tsru Hixikatshriwa?” — Waneya Tsru Hixikatshriwa wan-tshinno: “Ppalnanutka Damasco nwaka pyanu. Wane punkajiko nalukleru pkamhinripa.”

¹¹ — Wale tsru katalu tshinanu hi netanatka, hike potuko. Wale tshinanu nimotsatanune hkanojimtnona waneya Damasco napokatka.

¹² Hiyáhoni wane rawakanata satu jeji Ananias tshinkaluru, Moisés yonreru pirana homkahitatshrini wale. Judeu-ne Damasco hajene ptowruneka kahwakpiratlu Ananias.

¹³ Ananias yanwakatno, hitastsi hyopkaka waneya wane htshinno: “Nomole Saulo, petanutnaka.” — Waneklukawa potuko netatnaka waneya netatkalu Ananias.

¹⁴ Waneya wane htshina: “Wutsrukatenni Hoyakalute nuretatkayi pimaxyawakaplu waleko ralujyawaka hiyrunu pexyawakaplu Jesus Potukalu hiwakatletatshri.

¹⁵ Klu tshinanu ptowru yineru puphujtaxinri ptowru petanru pirana pyijnakotanru pirana koxa pjemyawaklu htokanu Jesus namaya.

¹⁶ Ha xawakni, kluhe pkahwakjeta? Ppalnanu, p-batiza-tkotka, pmunanhanru Tsru Hixikatshriwa Hoyakalu ruknojyawakaplu pektunu.”

¹⁷ — Waneya Jerusalém nsatojinixka, nanjihohnekanatawa Hoyakalupjiya netlu satu hetkaluru Hoyakalu pixkonu tshinanu.

¹⁸ Netlu Tsru Hixikatshriwa Hoyakalu hita riynumata: “Pchiretanu. Jerusalém puchpajini klu tshinanu wane hajene hi halixanyi hita pirana punkaklexinipa.”

¹⁹ — Waneya wane ntshinru Tsru Hixikatshriwa Hoyakalu: “Tsru Hixikatshriwa Hoyakalu, wanna himatlu hanjihohnewakapjikaka nujhajekanaxyana, kapna nyochmakjekanatna haté nkotshipjekanatna pixa Cristo-yi halixatshine.

²⁰ Hiyrunu puphujtatjerni Estêvão ruylaxinruna hit-koxa wane hwakanata. Nukchikhihlenutlu wan-rixyawakluna. Hiylalewatatshine mkalu ninota.”

²¹ — Waneya wane pnute Tsru Hixikatshriwa Hoyakalu wan-tshinno: “Pyanutka, howuk-tshijne nyokanatanyi judeu mixkane tskalaya.”

Hi Hkotshipjetluna Paulo Klu Tshinanu Romano-nerni Piranapni

²² Hyijnakokanatluna haté wale tokantshi htshinini waneya hsaplewpotutna waneya wane htshinna: — Wan-hixatshri yineru xye tshijne hnikaxika klu tshinanu hi rumukata hiwekleta xye tshijiya.

²³ Hsaplewjetna hkowchomkatna hiyrunu ruknopxepahitluna tshiji pahi. Rahnannuna.

²⁴ Waneya soldado-ne pohire yokanatna soldado-ne Paulo ranijyawakna soldado-nepji. Waneya hkotshipjexikowaka hyokanatluna klu tshinanu raluk-himatletlu klu tshinanu wan-rixa saplewjeryehitluna.

²⁵ Seyni rostukanatawaluna soldado-ne, Paulo wan-tshinru satu soldado-ne pohire wanestsi hwatshri: — Pumukathe kotshipjeretluhe satu jeji romano-neru mjihyehitkotu?

²⁶ Waneya xye hjeminixka soldado-ne pohire, hyatka soldado-ne pohire runkakapa, wane htshinru: — Pimatluhe klu pkamhinri? Xye jeji romano-nerni.

²⁷ Waneya soldado-ne pohire yanwakatlu Paulo wane htshinru: — Punkakanno, halikaklahe pixa romano-neryi? Waneya ruhitlu: — Hehe!

²⁸ Waneya soldado-ne pohire wan-tshina: — Tsru tiyiro nwenuta romano-neru nixyawaka. Seyni Paulo wan-tshina: — Hita wane tshijiko nmatuxya.

²⁹ Waneklukawa potuko hsaletjenemka hitspalamtatka. Hiyáhoni hpikpotuthonuka soldado-ne pohire klu tshinanu rali hosturetatkalu Paulo klu tshinanu romano-nerni wale.

³⁰ Waneya soldado-ne pohire haluk-himatletlu halikaka klu tshinanni hjihyehitluna judeu-ne. Hiyáhoni wale prika htowutna tsru hixikatshinwa sacerdote-ne hiyrunu tsrukakalune judeu-ne ptowruneka rapatjexyawakna. Waneya hkochpirokatkalu rostuxikolu waneya wanna hoji sreta ranikatkaluna Paulo.