Atos 21 - Bíblia

Tiro Poktshi Rapojyawaka Paulo Piranapni

¹ Wunhamxinixkana wane wuchpajya mar powha hanikajite hwatshijitatshri Cós hiwakatletatshri wyahapkata. Wale prika Rodes yopjewakle wutspaka waneya pnute wyatka haté Pátara poktshi wapoka.

² Wane wukchijyalo sato tsro kanawa Fenícia poktshi yamtatshro hiyáhoni wpokownatka pnute wyahap-hata.

³ Waneya wali hichinhalexinixkalu Chipre tshijne wpastate sreta wiknohamxyalu waneya Síria nwaka wyamtatka. Tiro poktshi wutspakyehita klu tshinanu wane tkowunuxiko kanawa.

⁴ Wale poktshi wukchijyana satkaka Hoyakalu homkahitatshine hiyáhoni pa semana wannayma wutukatka. Waneya wanna hiykotmaklu Paulo Hoyakalu Hiwejikaluruya Jerusalém hma yiywakanupa.

⁵ Seyni rapojinixka wyinri hohne, wyatka. Waneya Hoyakalu homkahitatshine, hhanunronna koxa hiwhenennaymakananuko himotsatwu tsru poktshi malekate. Ksatu wnahlu wyoptsojixya hixa ptowrunekwu, wanjihohnetatka.

⁶ Waneya wunhamxinixkana tsro kanawa wpokownatka. Hoyakalu homkahitatshine hsatokanwakatluna rawyawakna.

Cesareia Poktshi Rawyawaka Paulo Piranapni

⁷ Pnute wyatka. Tiro poktshi wuchpajyatka Ptolemaida poktshi wapokatka. Wane wyoptoxyana pimrine Hoyakalu homkahitatshine, wannayma wutukatka pa hohne.

⁸ Waneya wale prika wyatnaka Cesareia poktshi wapokatka. Waneya Filipe Hoyakalu pirana jinkakletaklerupji wjihloka wane wutukatka. Filipe satu Jerusalém Cristo halixatshine hapatjetatshine hepixatshrini pimrine jejineyma sete-tkana.

⁹ Quatro whenru Filipe maklojine hinamtatshri pirana hinkakletatshine.

¹⁰ Hix-hohne wane wwa waneya satu hinamtatshri pirana hinkakletatshri Ágabo tshinkaluru hapoka, Judeia tshijne ruchpajya.

¹¹ Waneya Ágabo hapokastsixinwu Paulo rostuptshijre hkochtsheka waneya waleko hijixi himyo koxa rostuxnawa waneya wane htshina: — Wla htshina Hoyakalu Hiwejikaluru: Wla rixa hosturetanruna judeu-ne Jerusalém hajene xye hostuptshijru hitakjetatshri. Waneya judeu mixkane renekko.

¹² Waneya xye pirana wyijnakoxinixka, hixa hiyrunu wane hajen-koxa, hanjitlu Paulo Jerusalém hma yiywakanupa.

¹³ Seyni Paulo hihitna: — Kluneru tshinanhe htshiyahata, klu tshinanhe hwamonuwkakno? Hita halpokoxnawa nostuxikolupa seyni hi wale tsonu, nalpokoxnawa nupninripa Jesus Cristo hiwaka tshinanu.

¹⁴ Hiyáhoni hi wumukata tshipetletlu wale tshinanu wutuk-kojiretletlu waneya wane wtshinru: — Hoyakalu halujyawaka rixkotka.

¹⁵ Wale hohnekaka hiknohinixka wuprukatka Jerusalém nwaka wyamta.

¹⁶ Satkaka Hoyakalu homkahitatshine Cesareia hajene himotsamtwu. Ranikwuna Menasom-pji, wale Chipre hajeru, walepji wutukanutka. Mitshikawako ralixatkalu Hoyakalu pirana.

Jerusalém Rapojyawaka Paulo Piranapni

¹⁷ Waneya Jerusalém wapojinixka Hoyakalu homkahitatshine yoptotwu. Hpoyikowpotutna.

¹⁸ Wale prika Paulo hixayma hapaka Tiago wetapyawakapa. Cristo halixatshine hapatjetatshine kosekatshine ptowruneka wane hapatjexya.

¹⁹ Waneya Paulo halikna wanna waneya runkakatkana psol-piranako Hoyakalu hixkajyawakna judeu mixkane waleko hkamrure tshinanu.

²⁰ Hyijnakoxinixkaluna hpoyahnutluna Hoyakalu waneya wane htshinruna: — Petewa wimole, hi pejnu mil kananu judeu Cristo halixatshinetka hiyrunu wanna ptowruneka Moisés yonreru pirana homkahpotutatshinetkani.

²¹ Wanna jempiranyehityi pasrukjexyawakna judeu-ne pa yine tskala hwatshine Moisés hiykole yonatkaluru pirana ruchoxyawakna haté pasrukjexyawakhimna hma jiprojhaptojimtawhenexyawakna hiyrunu hma kahwakpiraxyawakanruna judeu-ne hixjexyawaka.

²² Hiyáhoni kluhe wixanu? Wanna himatanu punyawaka.

²³ Hiyáhoni wane pixanu wtshinyawakyi. Hewina quatro jejine Hoyakalu runkaklexyaluna rixannuna. Xawakni rujhaluna wane potuko htshinyawakna rixyawakna.

²⁴ Panikanna waneya wannayma powratlewlu pirana pixinwa. Wanna tshinanu pwenutanru jiwjirewatatshri ptowruneka pekhixyawakapa hi halikakni htshinanwakaxyawakyina hiyrunu pekhixyawakapna pix-koxa homkahitlu Moisés yonreru pirana piwekleya.

²⁵ Ha judeu mixkane Cristo halixatshine tshinanu wali yokanrenwakatna yonawahlo wan-tshinatshri: Hi hnikanru mayawletshicha henekkaluru nikalhitu, hi hihrahako, hi koxa hostuplatkalurniko hnikanu. Hiyrun-koxa hi hapoklewatanu.

²⁶ Hiyáhoni Paulo hiynumatna quatro jejine waneya wale prika wannayma powratlewlu pirana hpohixnawana. Waneya wane pnute Hoyakalupji hjihlokna runkaklexyawakapluna klu hohne hnikatanruna powratlewlu hohnekaka. Wale hohne rixinipa satkaka wanna hanikanru henekachalu hiylatkalurupa.

Hkachixikowaka Paulo Piranapni

²⁷ Waneya wale sete hohne nikawnapiraxini satkaka judeu-ne Ásia tshijne hichpajikatshine malixkane hetlu Paulo Hoyakalupji rawakanata. Waneya wanna jihekna hixolune yine Paulo tshinanu hiyáhoni hkachitluna Paulo.

²⁸ Hsaplewatna wane htshin-sapletna: — Jejine, israel-nerune hepixanwu! Xyekni jeji ptowru poktshikaka yapatshri runkajyawakapna yine Moisés yonreru pirana wuchoxyawakapa, wimolene koxa wuchoxyawakapa haté xye Hoyakalupji wuchoxyawakapa htshina. Hiyrunu xawakni satkaka judeu mixkane ranika Hoyakalupji nwaka hiyáhoni rumtukachtaplu Hoyakalupji walenukotkani hikenutkani hiyrunu.

²⁹ Wane htshinatkana wanna klu tshinanu retluna Trófimo tshinkaluru Éfeso hajeru tsru poktshiya Paulo-ymalu. Wannamka kahwaklu Paulo hanikatkalu Trófimo tshinkaluru Hoyakalupji. Seyni hike.

³⁰ Waneya ptowru poktshi hajene jihekanuwatatka. Rasukamtna, hkachitluna Paulo waneya hkosemtluna Hoyakalupji malekate ranikluna. Waneya chinpotukawa ruchyatluna Hoyakalupji hiphaptotkaka.

³¹ Waneya hixolune hiylapiraxinixkalu Paulo, romano soldado-ne pohire Jerusalém poktshi hajeru jempiranyehitlu tsru sejirtshi hakanhatka Jerusalém poktshiya.

³² Waneya waneklu potuko wale pohire, soldado-ne chefe-tekaka hiyrun-koxa soldado-ne hmaklutene ranika waneya rasukanwakatna hixolune yine nwaka. Waneya hixolune hexinixkana soldado-ne rutuk-hiylakletluna Paulo.

³³ Waneya soldado-ne pohire yanwakatlu Paulo. Hkachitlu waneya rostukjixlu hepi corrente-tsaya. Waneya repomhayehitlu Paulo hiyrunu repomhalu kluhe hkamha wale.

³⁴ Pimrinkaka hixolune saplewata, satkaka pnuk-tshin-sapleta. Tsru saple tshinanu soldado-ne pohire hi himatyehitlu klukta hikoluklu. Wale tshinanu soldado-ne pohire towutna soldado-ne ranijyawakapluna Paulo soldado-nepji nwaka.

³⁵ Hatskowakastsi rapojinixkana soldado-ne rutjitluna Paulo hixolune jihekle tshinanu.

³⁶ Klu tshinanu hixolune yine homkahimtlu hsaplewatna wane htshin-sapletna: — Hiylatanru xako! Hiylatanru xako!

³⁷ Waneya hyochmakpiraxinixkaluna Paulo soldado-nepji Paulo wan-tshinru soldado-ne pohire: — Numukata hiynumletyihe? Waneya soldado-ne pohire hepomhalu: — Pimatluhe grego tokanu?

³⁸ Hi he Egito hajeryi mitshikawa pkamhalu tsru sejirtshi quatro mil jejine tshiji towutatshine kamnitatshine kosekatshriyi potshkewakaya?

³⁹ Seyni Paulo hihitlu wane htshina: — Hita judeu-nerno Cilícia tshijne tsru poktshite Tarso tshinikowaka hajerno. Pitshitannotshi hixolune yine niynumatanu.

⁴⁰ Waneya soldado-ne pohire hitshitlu Paulo riynumsaxyawakna yine. Hatskowaka hyopkakatka Paulo waneya romyokatka potshke rixyawakna hixolune yine. Potshke rixinixkana hixolune Paulo hiynumsatna judeu tokanuya wane htshinna: