Atos 20 - Bíblia

Paulo Hapyehitatnaklu Macedônia Hiyrunu Acaia Tshijne Piranapni

¹ Waneya kojwawaktshi hiknohinixka Paulo tomhakjixna romkahitjene wale yehi hyiywakapna. Waneya Paulo rali tserutahchinikanrexinixkana runhatkana waneya hyatka Macedônia nwaka hyiywakapa.

² Waneya wale poktshi hyapamxinixka ruykotna hixolune Cristo halixatshine hixo pirana runkakna. Waneya Acaia tshijne rapoka wale.

³ Wan-rutuka mapa ksuru. Ralpokoxinixka Síria tshijne hyiywakapa rimatyehitka satkaka judeu-ne haluka kachretlu. Hiyáhoni Paulo hichiniklu Macedônia hyapamxyawaka hsatojyawakapa.

⁴ Ásia tshijne potuko rimotsatluna Sópatro tshinkaluru Pirro whene Bereia poktshi hajeru, Aristarco hiyrunu Segundo Tessalônica poktshi hajene, Gaio Derbe poktshi hajeru Timóteo, Tíquico hiyrunu Trófimo tshinkalune Ásia tshijne hajene.

⁵ Nyi jejine kosekatshinetka Trôade poktshi hkahwajyatkawuna.

⁶ Pão myapjetkotu hohne hiknohinixka Filipos poktshi wuchpajya. Waneya cinco hohne hiknohatka Trôade poktshi wyoptoxyana waneya wane wutuka sete hohne.

Paulo Trôade Poktshi Rawyawaka Piranapni

⁷ Waneya domingo hohne kayno hixa ptowrunekwu hapatjetatka pão wjiknajroxyawakapa. Paulo hinkaklewata haté hanikaj-yetshno runkakwu klu tshinanu wale prika wane ruchpajini.

⁸ Tenopjirutu mapa kwalutu wapatjexya waneru hixo nikotapi.

⁹ Satu makluji Êutico tshinkaluru hiphapto tenolu htuplakanata. Paulo hinkaklewatka pchinika Êutico tshinkaluru rixapnewata waneya howukchini rumkapotutatka hiyáhoni hiphapto tenolu rujrujyana. Waneya hyotunkajinixkaluna rali hipnaletanatka.

¹⁰ Waneya Paulo serpikanwakatlu Êutico waneya hyonohohwakatlu waneya hsapriklu. Waneya Paulo wan-tshinna: — Hi hkojwakahchinikanutanu klu tshinanu xawakni riwekatka.

¹¹ Waneya Paulo hatskotatnaklu teno hwahrukotatshri. Waneya hjiknajrotlu pão, hniklu. Riynumatna haté hohistsitkani waneya hyatka.

¹² Waneya pantshi ranikluna makluji hiwekatshri wale tshinanu rapnanuhchinikanutna wanna.

Assôs Poktshi Hpokowniyatka Paulo Waneya Mileto Poktshi Rapoka

¹³ Hixa kosejyatkalu Paulo wyohreklo tsro kanawa Assôs poktshi yatshropa. Wane wyoptoxinri Paulo klu tshinanu wane raluk-hixleta Paulo tshijiko raluk-hapoklexya.

¹⁴ Waneya hyoptoxinixkawu Assôs poktshiya hpokownatka tsro kanawa waneya Mitilene poktshi nwaka wyatka.

¹⁵ Waneya wane wuchpajya wale prikatkani Quios poktshi hinaple wyapamta. Wale prikatkani Samos yopjewakle wutspaka. Waneya pa hohnetnakni Mileto yopjewakle wutspakatka.

¹⁶ Paulo hi haluk-hitspakleta Éfeso poktshiya klu tshinanu hi hix-hohne raluk-hitukleta Ásia tshijne. Hchireta, Jerusalém poktshi rumukata hiknokaklexyalu Pentecostes hohneni.

Paulo Hinkakna Éfeso Hajene Cristo Halixatshine Hapatjetatshine Kosekatshine Piranapni

¹⁷ Mileto poktshi rawakanata Paulo waneya htomhakjixna Éfeso hajene Cristo halixatshine hapatjetatshine kosekatshine hyoptoxyawakapluna.

¹⁸ Rapojinixkana wanna wane htshinna Paulo: — Hixa himathetno. Ásia tshijne napojinri hohnekananuko haté xawakni himathetno hanu nixa hiwekleta.

¹⁹ Judeu-nerune hahxatno hiyáhoni xye kojwakahchinikanutno. Hixa himata hi hitako nalujyawaka nkamha seyni ptowru hohneruka Hoyakalu halujyawaka nkamhajeta, hixo kata ntshiyahata hixa tshinanu.

²⁰ Hiyrunu hixa himata, ptowruka nyahot-kamhaleta nepixyawakaphi, kihler-pirana nunkakjethi hixowakaya haté pa pjikakaya kihler-pirana nunkakjethi.

²¹ Nunkakna judeu-nerune judeu mixkane koxa rehchinikanuxyawakapna rektunu tshinanna hiyrunu nunkakna Hoyakalu ruchinikanrexyawakna hiyrunu Jesus Cristo Wutsrukate ralixyawakapna.

²² Seyni xawakni Hoyakalu Hiwejikaluru halujyawaka nkamhanu Jerusalém nwaka nyanu seyni hi nimata klu rixannona wane hajene.

²³ Seyni koxa nimatahnaputlu, klu tshinanu Hoyakalu Hiwejikaluru hinkakno, pa poktshikaka rawanu kojwawaktshi haté preso hwa hita tshinanu.

²⁴ Seyni hi namotlu niwekle. Hitaho hijhakalurni Hoyakalu kamrure nkamhiywakapa haté nnikaxyawakaplu nkamrure Tsru Hixikatshriwa Jesus henejyano. Xyekni nkamrure, nunkajyawakapna yine kihle piranalu potuko hiwekkaklewatatshri pirana, Hoyakalu hihlenu hixa tshinanu pirana.

²⁵ Hix-yehi nwaka pchinika nunkakletlu Hoyakalu pohirewaxyawaka pirana. Hiyáhoni xawakni nimatlu hi satukna hixa Hoyakalu pohirewaxyawaka pirana nunkakanunhi hetanutnakno.

²⁶ Wale tshinanu xawakni nunkakhi, pa hohnepa satu hamhinipa, hi hita tshinanni.

²⁷ Klu tshinanu hi psojikna Hoyakalu halujyawaka pirana nimalexyahi.

²⁸ Hislahinwa. Hislahan-koxna pimrine Hoyakalu Hiwejikaluru henejyahi hislahiywakna. Carneiro-ne hinotatshine pixka hixanna Hoyakalu halixatshine hapatjetatshine, hanjitkalunetka Hoyakalu whene hipnaleya.

²⁹ Klu tshinanu nimata nuchpajinpatka pimrine hinanu hocha hajeru kmatsyiru pixka rixa hapokletanna, wannamka haluka nikatletlu Hoyakalu halixatshine hapatjetatshine.

³⁰ Hiyrun-koxa satkaka hixako hepire weyawatanu waneya halikakalutu pixkalutu tokantshi htshinna seyni hi halikakni waneya pimrinepni hyapretakanna romkahlewaxyawakanapna.

³¹ Wale tshinanu tsru hislahle hixinwa. Hichinikanru mapa mhale pchinika hohohne hoyetshno koxa hikeklu nutuk-kojiretlethi hixa satkaka haté hixo kata ntshiyahyehithi.

³² Waneya xawakni Hoyakalu hislahlewle hiyrun-koxa Hoyakalu hihlenu hixa tshinanu pirana hislahlewle nutakanhi. Walekni himukata mixkowkaklethi htseruwahchinikanuxyawaka hiyrun-koxa renekanhi hyoptotanrupa Hoyakaluya ptowru yine potukaluneyma.

³³ Hixa tskala nwaka pchinika hikeklu hohne net-sotanukanatlu satu tiyirote hi koxa net-sotanukanatlu satu mkalu.

³⁴ Hixa himata, ptowru hohneruka nkamrurewata nmahaxinri nukchijyawakapa haté nimotsane mahaxinri koxa tshinanu.

³⁵ Nkamrure psoluyaka tshinanu nekhithi hixa haluka kamrurewleta hike mwikane wumukata hepixletanu. Hichinikanretanru Jesus Tsru Hixikatshriwa tokanu: “Katukta renejikolu yoptota hpoyikowata seyni heneklewatatshri pnute poyiknu.”

Paulo Hanjihohneta Wannayma Piranapni

³⁶ Waneya rali wan-tshinrexinixka Paulo hyoptsojita wannayma ranjihohnetatka.

^37-38 Hiyáhoni wanna tshiyahata klu tshinanu Paulo wan-tshinatkana, hi retanutnakluna. Waneya hsaprikluna ramlutluna. Waneya rimotsatluna tsro kanawa nwaka.