Atos 2 - Bíblia

Hoyakalu Hiwejikaluru Hapojinri Piranapni

¹ Rapojinixka Pentecostes hohne, wanna ptowruneka pa hruko rapatjekanaxyatkana.

² Waneya waneklukawa potuko, hjemluna sejirtshi tenhohne hichpajikatshri, tsru kanniphalu pixka rixa hajpoleta htsepotlu htuplakanaxyawaknapji psoluka.

³ Waneya satkaka ruphujewnayehita tshitshmero katmerolkaka pixkalutu. Satkaka wanna tseptahi rapokmerotatka.

Hoyakalu Hiwejikaluru Yanumkakatkana Jesus Nuretanune Pa Nerunru Pejnu Hyanumaxyawakatkana Piranapni

⁴ Waneya wanna ptowruneka, katsepoyatka Hoyakalu Hiwejikaluru. Waneya hyinuwaka yanumlexyaluna pa nru pejnu, hyanumanruxinine nru pejnu Hoyakalu Hiwejikaluru yanumkakatkana wannanruya.

⁵ Jerusalém poktshi rawakanatna judeu-ne Hoyakalu hamotatshine ptowru tshijnekaka hichpajikatshine.

⁶ Waneya wale sejirtshi hjeminna, rapatjemtna. Rimyekamtna klu tshinanu satkaka yineru jemlu waleko htokanu, nuretkalune yanumakanaxinri.

⁷ Waneya hapatjemtatshine himyeka, hpikna. Waneya wane htshinna: — Hetanu! Nyi jejine yanumatatshine ptowruneka Galileia hajene.

⁸ Hanhe xawaka wixa yijnako yanumletna hixa satkakwu wunru potuko?

⁹ Hixa Pártia tshijne hajenwu, Média tshijne hajenwu, Elão tshijne hajenwu, Mesopotâmia tshijne hajenwu, Judeia tshijne hajenwu, Capadócia tshijne hajenwu, Ponto tshijne hajenwu, Ásia tshijne hajenwu,

¹⁰ Frígia tshijne hajenwu, Panfília tshijne hajenwu, Egito tshijne hajenwu, Líbia tshijne psojite Cirene poktshistsi hwatshri hajenwu. Satkakwu Roma poktshi hichpajikatshinwu.

¹¹ Satkakwu judeu-nerunwu, satkakwu hiprotaka judeu rixnatkawa. Satkaka Creta tshijne hichpajikatshine pimrine Arábia tshijne hichpajikatshine. Hanhe xawaka wixa himatjemletna nyi yine hixa satkakwu wunru potuko, Hoyakalu kamrure kihler-potuko pirana runkaklexyawakna?

¹² Hiyáhoni rimyekna wanna ptowruneka. Hi rimata klu ruchinikanretna hiyáhoni repomsakakna wannakakluko: — Klunernihe xawaka xye ptowruka?

¹³ Seyni pimrine hitsolhitatna, wane htshinna: — Nyi jejine himetatshine, vinho-ha rurna.

Pedro Hinkakle Piranapni

¹⁴ Seyni Pedro yopkaka pimrine onze Jesus nurreneyma waneya hyanumata hipokananu, hixolune yine jemanu: — Nimatletanune judeu-ne hiyrun-koxa hixa ptowruneka Jerusalém hwatshin-koxa hislahtokanutanno:

¹⁵ Hixa kahwakna nyi jejine himetatshine rixyawakna seyni hi koxa rimetna klu tshinanu tumakananustsikowani.

¹⁶ Seyni Hoyakalu tokanu hinkakletatshrini Joel tshinkalurni yonahnaputlu xye hohne wet-hiknohlexyawaklu. Joel-ni wan-hixa yonreta:

¹⁷ “Hoyakalu wan-tshina: Hmahaxinri hohne Hita henekanna hitanuko Hiwejikaluru ptowru neruka. Hixa whenene jejine suxon-koxa hinkakletanru hinamtatshriwa. Tsrutsolejine hipnawatanu. Maklujine hetanru hetkalurkaka.

¹⁸ Waneklu papko nenekanna ntowrene jejine, suxon-koxa Hiwejikaluru Hitanu. Hiyáhoni wanna hinkakletanru hinamtatshriwa.

¹⁹ Nekhitanru himyekaklewatatshrikaka tenhohneya tshijiya; hrahtshipni, tshitshmeropni hiyrunu tshitshiphapni hixko sajnuru.

²⁰ Rutshpokanu tkatshi. Jraplu ksuru, hma mapokkanuko pchini Hoyakalu Tsru Hixikatshriwa hohneru hijhakaluru hiyrunu hoyaknutshi.

²¹ Waneya katukta hanjitanru Tsru Hixikatshriwa hepixyawaklu riwekkakko.”

²² Waneya Pedro pnute hinkakna: — Jejine, israel-nerune, hyijnakotanru xako xye tokantshi: Hixa himatlu xye jeji Jesus Nazaré hajeru, Hoyakalu nurreru rixyawaka. Xye rekhitatkahi Hoyakalu ruyakolekakayma, tsrukaka himyekaklewatatshriyma, Jesus kamhaleru hixa tskalaya.

²³ Seyni Hoyakalu waleko ralujyawaka tshinanu Jesus renekhi hixa myoya. Waneya hixako hiylatlu. Jejine hektune cruz hiylaxyalu Jesus hixako tshinanu.

²⁴ Seyni Hoyakalu hiwekkakatnaklu Jesus, hipuktshi mixkonu hkochpajyalu Hoyakalu klu tshinanu hipuktshi hi himukata kachretlu Jesus.

²⁵ Klu tshinanu Davi-ni wan-tshinyehitatkalu: “Netlu Tsru Hixikatshriwa Hoyakalu nohoji hinaple rawhohnekanaxyawaka klu tshinanu npotukle sretako rawhonuka wale tshinanu hike npikanu.

²⁶ Hiyáhoni naji himuwata, nonru poyikowata haté noman-koxa hapnanuhchinikanutatka;

²⁷ Klu tshinanu hi puknokachamtanno hipuktshi yehiya. Hi koxa puchochatanru palukleru potukalu rujpahachaxyawakapa.

²⁸ Pasrukatkano hanu nixa hiwekletanu Hoyakalu halujyawaka tshinanuya. Pixayma nwiniklunu pixa tsepoxinno poyikowlu.”

²⁹ Waneya Pedro wan-tshinna: — Nonerune! Hitshitanno nunkajyawakaphi phujetanuru wutsrukatni Davi-ni pirana. Rupnanatka waneya hkapnatka haté xawakni wimwalu hewi hkapnaxikowakana.

³⁰ Davi-ni Hoyakalu tokanu hinkakletatshrinixkani hiyrun-koxa Hoyakalu hinkaklexyalu pirana himatatshrini. Hoyakalu hinkaklexyatkalu Davi-ni, satu waleko hiklopichane phuru hixyawakapa waleni pixka.

³¹ Hma mapokkanuklunuwa wale seyni Davi-ni himatakanatatka. Wale tshinanu wane htshina: “Hi ruknokachamtkotka yomletshiya, wale mane hi hijpahanu.” Davi-ni hinkakletlu Cristo hiwejyawakatnaka pirana.

³² Hoyakalu hiwekkakatnaklu xye Jesus hiyrunu hixa ptowrunekwu wale pirana hiphujetatshinwu.

³³ Hiyáhoni Jesus hanikkatka, Hoyakalu potukle sreta rawyawakpatka hiyáhoni hyoptotlu Hoyakalu Hiwejikaluru htshina hinkaklexyawakpotuklu Jesus. Hiyáhoni xye hixa hetanru hiyrunu hjemanru waleni Hoyakalu Hiwejikaluru hiyoklerni.

³⁴ Davi-ni hi hanikkatka tenhohne seyni wane htshina: “Tsru Hixikatshriwa Hoyakalu wan-tshinru Nutsrukate: ‘Hitastsi ptuplatanu npotukle sreta

³⁵ haté nenekanyi pkamnitjene ptowuxyawakapa.’”

Mapa Mil Yine Batiza-xikowaka Piranapni

³⁶ Wale tshinanu rimatankoxluna ptowruneka israel-nerune waleko Jesus cruz rutaklerna, Hoyakalu halikaka hitakatkalu, Tsru Hixikatshriwa hiyrun-koxa Messias rixyawaka.

³⁷ Waneya xye pirana hjeminna yine, ptowruneka kojwakahchinikanutatka. Hiyáhoni repomhana Pedro hiyrun-koxa pimrine nuretkalune: — Wimolene, kluneruktshika wkamhanutka xawakni?

³⁸ Waneya Pedro wan-tshinna: — Hehchinikanutanu hixa satkakhi Jesus Cristo hiwakaya h-batiza-xikowakapa hixa himtukjetatshrikaka hiknojikowakapa; wan-hixatshripa Hoyakalu Hiwejikaluru hyoptotanu Hoyakalu henekanhi.

³⁹ Klu tshinanu xye pirana Hoyakalu hinkaklexyatkahi hixa, hixa whenen-koxa runkaklexyalu hiyrun-koxa wanna ptowruneka hi hixastsi hwatshine tsonu runkaklexya. Tsru Hixikatshriwa Woyakalute tomhanune pejnu runkaklexyalu.

⁴⁰ Waneya Pedro hihle hinkakletna yine. Ruykotna, wane htshinna: — Hiwekkajikolupa hixa xye papko hiwekatshinetka hektutu kamhatshine tskalaya.

⁴¹ Hiyáhoni Pedro hinkakle halixatshine pejnu batiza-tkatka. Waneklu hohneni mapa mil yohnikna Jesus halixatshine.

Hehchinikanutatshine Hiwekle Piranapni

⁴² Hiyrun-koxa nuretkalune hasruklewle romkahitna. Hapatjeru romkahitna hiyrunu rapatjetna hnijyawakna hiyrun-koxa hanjihohneru hi ruchotna.

⁴³ Wanna ptowruneka kahwakpiratatkalu Hoyakalu. Hiyrun-koxa nuretkalune kamhalu hixo hiyakolukaka hiyrun-koxa hetkalurkaka.

⁴⁴ Cristo halixatshine ptowruneka himwakaka. Ptowruko rejnunkatna ptowruneko himwalu.

⁴⁵ Ruchankaluna rejnunkatna rimwalerna. Hkotspalkajyana ptowruneka satkaka hmahaxinrina.

⁴⁶ Ptowru hohneruka Hoyakalupji rapatjexyana pa hchinikanurunni. Pimrinkaka papji pejnu nijya. Pa nikkalunni himuwatatshinni pixkakaklune hkahwajnawana.

⁴⁷ Rimalwutluna Hoyakalu. Rumutkana ptowru neruneka. Wane pchinika Hoyakalu hixoletna pa hohnekaka wanna Cristo halixatshine hapatjetatshine pimrineyma hiwekkakkalunepa.