Atos 19 - Bíblia

Paulo Éfeso Poktshi Rawyawaka Piranapni

¹ Corinto poktshi rawakanatawa Apolo tshinkaluru, seyni Paulo pimri poktshikaka hyapamta haté Éfeso poktshi rapoka. Pimrine hapatjetatshine hyoptota Paulo waneya.

² Waneya Paulo hepomhana wanna: — Hixlahe yoptotlu Hoyakalu Hiwejikaluru halixinri papko? Waneya ruhitluna: — Hi wimatyehikanatlu Hoyakalu Hiwejikaluru.

³ Hiyáhoni repomhana wanna: — Han-hixatshri batiz-lu hyoptota hixa? Waneya ruhitna: — João batiz-le tsonu.

⁴ Waneya Paulo wan-tshina: — João batiz-le hekhitlu yine rehchinikanuxyawakatkana. João hinkakna yine ralixyawakapluna wale hatjiniyaka hapokatshripa, walekni Jesus Cristo.

⁵ Waneya hjeminixkaluna xye pirana h-batiza-tkana Tsru Hixikatshriwa Jesus hiwakaya.

⁶ Waneya Paulo kapxaktseptahitna yine waneya Hoyakalu Hiwejikaluru hapokhohotna yine waneyakni satkaka nru hyanumaxyatkana hiyrun-koxa runkakletluna hinamtatshriwa pirana.

⁷ Waneklu papko wane rawapna doze jejine.

Tirano Tshinkaluru Escola-tepji Hjihlojyawaka Paulo Piranapni

⁸ Waneya mapa ksuru pchinika Paulo jihlokjekanatlu hanjihohnewakapji. Tsru htsernu hchinikanuyma ruhjekakna judeu-ne haté repixna hyoptoxyawakapluna Hoyakalu pohirewaxyawaka pirana hanu rixa hinkakletna Paulo.

⁹ Seyni pimrine tokantshi malixkane, hi ralixluna haté hektuwaka htshinanwakatluna Hoyakalu hatnu hapote pirana hixolune jemanu. Waneya wane ruchpajyatka Paulo Cristo halixatshineyma. Hiyáhoni Paulo Tirano tshinkaluru escola-tepji hya, hyinuwaka hasrukletna yine ptowru hohnekaka waneya.

¹⁰ Hepi mhale pchinika wan-rixatka. Paulo hinkakle tshinanu wanestsi hajene ptowruneka Ásia poktshi hajene judeu-ne haté judeu mixkane koxa yijnakotlu Hoyakalu pirana.

¹¹ Waneya hix-potuko himyekaklewatatshri hkamha Hoyakalu Paulo tshinanu.

¹² Satkaka yine haniklu Paulo hitakjereru hiyrunu raniksamajereru koxa ranikna waneya yeyixatshine yotneklu. Wan-rixinixkana yeyixatshine hitskalhatka haté kamtshine hichpajyana.

¹³ Seyni pimrinkaka judeu-ne ptowru poktshi hyapjetna hiwejikalune hektune hakakpiratatshine yine mane hwatshri. Wannamka hakakna hiwejikalune hektune Tsru Hixikatshriwa Jesus hiwakaya. Wanemka htshinna: — Paulo hinkakletjereru Jesus hiwaka tshinanu pasukanu.

¹⁴ Wan-rixjekanatna Ceva tshinkaluru whenene set-na. Ceva walekni judeu sacerdote-ne chefe-te.

¹⁵ Seyni pa kata hima hiwejikaluru hektutu wan-tshinatkana: — Hita himathetlu Jesus, Paulo koxa nimatheta seyni hixa hi nimatheta.

¹⁶ Waneya jeji hiwejikaluru hektutu himwatshri hiptekhohotna, hyahotkakna waneya tsru yahotkaklu tshinanu rasukna hiskamkatatshinetka, kachremanerune.

¹⁷ Waneya ptowruneka Éfeso poktshi hajene judeu-ne, judeu mixkane koxa hjempiranyehixinri hpikpotutna hiyáhoni hkahwakpirapotutluna Jesus Tsru Hixikatshriwa hiwaka.

¹⁸ Waneya hixo Cristo halixatshine yinuwaka hiphujtaletluna hkamhalerna hektutu hixowakaya.

¹⁹ Hixo kahontshine hixakanatatshine hapatjetlo yonawahlo kahontshi pirana yonaxikolu waneya ranikluna hixowaka hyoxijyatkalona. Waneya rutakyahojinixkalo yonawahlo wenru cinquenta mil proji prata kamhikolu poyahotapatka.

²⁰ Wan-rixa hipalepiranata Hoyakalu pirana hiyáhoni htseruwpiranapotutatka Hoyakalu pirana.

Paulo Yokanatna Timóteo, Erasto Macedônia Tshijne Hyiywakapna Piranapni

²¹ Hiyáhoni wan-rixatka, Paulo hichinikanuwata Macedônia tshijne Acaia tshijne koxa hyapamxyawaka Jerusalém poktshi hyiywakapa. Wane htshina: — Nali wane hwalexinipatka Roma poktshi nyanu koxa.

²² Hiyáhoni hepi repirene, Timóteo hiyrunu Erasto tshinkalune hyokanata Macedônia nwaka. Seyni wale Paulo Ásia tshijne hitukatka pimri hohnekaka.

Tsru Kojwaklu Rixapoktshita Demétrio Piranapni

²³ Waneklu papko tsru kaheknanuwlu rixna Éfeso poktshi hajene Tsru Hixikatshriwa hatnu hapote pirana tshinanu.

²⁴ Satu jeji Demétrio tshinkaluru prata kamruretatshri kamhajekanatlu Diana-pji mayawle yáholukaka hkamha. Prata hkamhiylona. Hkamrurna tshinanu tsru tiyiro hyoptotna repixjeneyma.

²⁵ Waneya Demétrio hapatjetna repixjene hiyrunu pimrine wale kamrurtshi kamhatshine. Runkakna: — Jejine, hixa himata tsru tiyiro potuko wyoptoxyalu wkamrure tshinanu.

²⁶ Seyni hetanru hjemanu koxlu Paulo kamrure. Rumtukahchinikanutna hixo yine Éfeso hajene haté Ásia tshijne psol-tshijne hajen-koxa. Wale hinkajyana, yine kamhaleru hoyakalune hima hi halikakni. Hixo yine halixlu.

²⁷ Hiyáhoni pa katako wkamrure wamtakanu. Pa katako yine yinuwaka hichinikanuwletanu tsro hoyakalo Diana-pji hi hijhakaluru hkahwakkotka. Toyaknu nikatko. Waneya pa katako ptowru Ásia hajene haté psol-tshijne hajeneko hi kahwakpiratanutkalo hoyakalo Diana hihlenu.

²⁸ Waneya xye pirana hjeminixkaluna hjihekanuwpotutatkana yine. Waneya hsaplewatna wane htshinatkana: — Kihlero potuko Diana Éfeso hajero. Tsro Hixikatshrowani wala!

²⁹ Hiyáhoni tsru poktshi hajene ptowruneka kaheknanuwatatka. Waneya wanna kachitna Paulo himotsane Macedônia hajene Gaio tshinkaluru hiyrun-koxa Aristarco tshinkaluru hkachitna. Waneya hapatjexikowaka nwaka hkosemtna.

³⁰ Paulo-mka haluka jihlokleyehitna hixolune riynumsaxyawakapna. Seyni romkahitjene hi hitshitlu.

³¹ Hiyrun-koxa satkaka Ásia tshijne chefe-tene, Paulo himatletlene, yokantokannwakatlu, ruykotluna hapatjexikowaka hma jihlojyawakanupa.

³² Pimrine saplewjeta, pimrine pnuk-tshin-sapleta, klu tshinanu tsru sejirtshi rixna hapatjetatshine haté hixolune hi himata klu tshinanu rapatjetna.

³³ Waneya judeu-ne Alexandre tshinkaluru hixolune hanikajite ranikluna waneya judeu-ne yopkakjixatkalu. Waneya Alexandre hanjitna himyoya potshke rixyawakna rumukata hihle hinkaklexyawakapna hixolune tskalaya.

³⁴ Seyni hixolune himaxinixkalu judeu rixyawaka Alexandre, hi raluka jemtokanretluna hiyáhoni wanerutu htshin-sapletna wanna ptowruneka, hepi hora pchinika hsaplewjetna. Wane htshin-sapletna: — Kihlero potu Diana Éfeso hajero. Tsro Hixikatshrowani wala.

³⁵ Waneya tsru poktshi hajeru yonawahlewjetatshri potshke hixkakna hixolune yine. Wane htshinna: — Jejine, Éfeso hajene, ptowru yineru himatlu Éfeso poktshikni hislahjetlu Tsro hoyakalo Diana-pji hiyrun-koxa sotlu tenhohne hichpajikatshri rihnanutjetna. Kahwakpiratkaluru hkahwakluna wanna.

³⁶ Hiyáhoni potshkephi hi hkamhanru wale muchinikanretkanekhi klu tshinanu halikakni xyekaka pirana hike himukata malixlenutlu.

³⁷ Hixa hanikna wkata nyi jejine seyni hikemka htshinanwakatluna woyakalute hi koxa pa hixanu htshowhutna hanjihohnewakapjiya.

³⁸ Hiyáhoni Demétrio hiyrunu rikamrurewatanune pa pirana raluka tshinrenwakatatkana satkaka yine waneya rumukata yanwakletluna jemahchinikanjexikowaka. Wanena jematshine, wane rumukata hihjekakjerexinna.

³⁹ Seyni pa piranako haluka kochtsheklexini hixolune hapatjexikowaka hjemiko, wane potuko raluka jemkapiranyehixika.

⁴⁰ Klu tshinanu pa katako wepomhakoklunu klu tshinanni tsru sejirtshi wixatka xye hohne, hike wumukata tshinretna. Hike hikolukle minje.

⁴¹ Waneya rali wan-tshinrexinixkana yonawahlewjetatshri hyokanatatkana hixolune yine.