Atos 18 - Bíblia

Paulo Corinto Tshijne Hwiywaka Piranapni

¹ Waneya wane pnute Atenas poktshi ruchpajya Paulo Corinto poktshi nwaka hyatka.

² Wane rexyalu satu judeu Áquila tshinkaluru Ponto hajeru. Hi hix-hohne Itália tshijne ruchpajyawana wale hhanunro Priscila-yma. Klu tshinanu Cláudio, tshiji towutatshri, towutna judeu-ne ptowruneka Roma poktshi ruchpajyawakapna. Waneya Paulo yanwakatna Áquila hiyrunu Priscila.

³ Waneya wannayma rutukatka Paulo klu tshinanu waleko kamrurtshi hkamhakoxna wanna. Lona-pjikaka kamhatshinni wanna. Wane hkamrurewaxya wannayma.

⁴ Ptowru hapnanuxikalur-hohneko riynumsatna judeu-ne, grego-ne koxa hanjihohnewakapjiya. Htowutna Jesus ralixyawakapna.

Paulo Jesus Pirana Runkaklexyawaka Piranapni

⁵ Waneya Silas hiyrunu Timóteo tshinkalune Macedônia tshijne ruchpajiniklunutkana, Paulo henejnawa runkajyawakna yine kihler-potuko tokantshi. Wale tsonu hkamrureta. Rekhitna judeu-ne Jesus, Cristo rixyawaka.

⁶ Seyni hi hyoptotluna Paulo hinkakle hiyrunu hektuwaka htshinna, wale tshinanu Paulo hiplokamkata waneya wane htshinna: — Pa hohne hamhatshinenaphi hixako htshinanupni. Powramyono hixa hrahni tshinanu. Hi hita tshinanupni! Xawaknipatka judeu mixkane tsonu nyanwakatanutka.

⁷ Waneya hanjihohnewakapji ruchpajinixka Paulo satu jeji, Tício o Justo tshinkalurupji hyatka Paulo. Hanjihohnewakapjistsi rawapjita. Xye jeji kahwakpiratlu Hoyakalu.

⁸ Halikaka Crispo tshinkaluru, wale hanjihohnewakapji chefe-te, wale hiyrunu walepji hwatshine ptowruneka halixlu Tsru Hixikatshriwa Cristo pirana. Híxona Corinto poktshi hajene jemtokanutlu Paulo hiyáhoni ralixluna, h-batiza-tkatkana.

⁹ Waneya hoyetshno rixinixka Paulo Hoyakalu pixkonu tshinanu retlu satu hetkaluru. Tsru Hixikatshriwa Hoyakalu wan-tshinru: — Hi ppikanu! Seyni pnute pya hinkakletanna yine hi putuk-hinkakletanna yine.

¹⁰ Pixaymano. Hike yotnekanyi klu tshinanu hixo nonerune xye poktshi hwa.

¹¹ Waneya Paulo wane hitukatka pa mhale hanikaji mhale, Hoyakalu pirana rasrukna yine.

Gálio Tshinkaluru Hoji Sreta Rapojyawaka Paulo Piranapni

¹² Waneya Gálio tshinkaluru, Acaia tshijne chefe-te rixakanaxini, satkaka judeu-ne pa hchinikanurunni hkamnixyawakluna Paulo. Waneya ranikluna Paulo hijhahchinikanyehixikowaka.

¹³ Waneya judeu-ne wan-tshina: — Xye jeji hasrukna yine Hoyakalu rimalwuxyawakna seyni hi Moisés yonreru tshinyawaka rasrukna.

¹⁴ Waneya hyanumpiraxini Paulo, Gálio wan-tshinna judeu-ne: — Judeu-ne, satu pa hixanu jhamleru rixkamka ho kamrurtshi muhletu rixkamka, numukata yijnakoletanumkahi.

¹⁵ Seyni tokantshicha rixyawaka tshinanu hiyrunu hixako yonruru pirana rixyawaka tshinanu, hixako hihletanru. Hita hi nujhahchinikanyehitanru xyekaka tshinanu.

¹⁶ Hiyáhoni jemahchinikanjexikowaka hkochpajyatkana.

¹⁷ Waneya ptowruneka kachitlu Sóstenes tshinkaluru, wale hanjihohnewakapji chefe-te, waneya jemahchinikanjexikowaka hinaple ruylajinruna. Seyni Gálio hike htshina.

Paulo Satokanwakaxyawaklu Antioquia Piranapni

¹⁸ Waneya hix-hohne Corinto tshijne rutukatka Paulo waneya Cristo halixatshine ruknokamta Paulo waneya hpokownatka Paulo Síria tshijne hyiywakapa Priscila, Áquila-yma. Hma pokownaknuklunuwa Paulo jiwjitka Cencreia poktshiya klu tshinanu mitshi Hoyakalu runkaklexyalu rixannu.

¹⁹ Waneya Éfeso poktshi rapojinixkana wane ruknokamtna Priscila, Áquila. Waneya hanjihohnewakapji hjihloka Paulo judeu-ne riynumsaxyawakapa.

²⁰ Hiyáhoni ranjitluna Paulo wannayma rutujyawakapa hix-hohne seyni hi raluka.

²¹ Waneya Paulo hichpakpiraxinixka waneya wane htshina: — Hoyakalu halujinipa nsatokanu pa hohne. Hiyáhoni hpokownatka Paulo Éfeso poktshi ruchpajyatka.

²² Cesareia poktshi yopjewakle rapojinixka, ruptekatka Paulo Jerusalém nwaka hyahapkata Cristo halixatshine hapatjetatshine hyoptoxyawakapa, waneya rali hiynumsalexinixkana halixatshine Jerusalém hajene Antioquia sreta hyatka.

²³ Pimri hohnekaka wan-rutuka Paulo waneya hyatka. Galácia tshijne hiyrunu Frígia tshijne hyapamta hapatjetatshine hmixkowahchinikankajyawakapa.

Apolo Tshinkaluru Éfeso Hiyrunu Corinto Poktshi Rawyawaka Piranapni

²⁴ Satu judeu, Apolo tshinkaluru, Éfeso poktshi hapokatka. Alexandria poktshi hmatuxyatka wale. Kihle hinkaklewleru wale hiyrunu rimatjempotutlu Hoyakalu pirana yonatkaluru.

²⁵ Wale hasrukkatka Tsru Hixikatshriwa Hoyakalu hatnu hapote pirana tshinanuya. Tsru htokanuyma runkakletlu Jesus seyni João batiza-xyawaka pirana tsonu rimatatka.

²⁶ Waneya psol-mixkonuka hyinuwaka hinkaklewleta hanjihohnewakapjiya. Waneya hjeminixkaluna Priscila, Áquila, wannapji ranikluna Apolo waneya repixluna pnute rimatjemyawaklu Hoyakalu hatnu hapote pirana. Waleni Jesus Cristo pirana.

²⁷ Waneya hnurexinixkalu Apolo Acaia tshijne hyiywakapa Cristo halixatshine Éfeso hajene mixkowahchinikankakatkalu hiyrunu hyonanwakatna wane hajene Cristo halixatshine. Ruykotna kihle yoptole rixyawakapluna Apolo. Waneya wane rapojinixka Apolo hepixatkana wanna Hoyakalu hichiniklewle pirana halixatshinetka.

²⁸ Klu tshinanu Apolo psol-mixkonuka ruykotna judeu-ne hixowakaya, Hoyakalu pirana yonatkaluruyma rekhitna judeu-ne Jesus, Cristo rixyawaka.