Atos 17 - Bíblia

Tessalônica Poktshi Rawyawakna Paulo Hiyrunu Silas Piranapni

¹ Waneya wane pnute Anfípolis poktshi hiyrunu Apolônia poktshi hyapamtna Paulo, Silas haté Tessalônica poktshi rapokna. Wale poktshi rawa satu hanjihohnewakapji judeu-nerune tshinanu.

² Waneya Paulo rixjexyawaka rixa hjihlokyehitlu. Mapa hapnanuxikalur-hohne Paulo hiynumsatna Hoyakalu tokanu yonatkaluru piranaya.

³ Runkaksatna haté rekhitna Cristo hijha hipnaleta wane pnute raluka yotunrexyalu hipuktshi. Wane htshina: — Xye Jesus nunkakletyehixyahi waleni Cristo tshinkaluru.

⁴ Satkaka judeu-ne halixlu Cristo pirana waneya romkahitna Paulo, Silas. Hixo grego-nerune Hoyakalu halixatshine haté hixo suxone phurone homkahitna.

⁵ Seyni judeu-ne malixkane hahxatna Paulo, Silas hiyáhoni rawapna satkaka jejine mahchinikanune waneya wanna hapatjetna hixolune yine hiyáhoni tsru sejirtshi rixkakna hixolune. Jasão tshinkalurupji nwaka hya hasukletna hixolune Paulo, Silas yine hoji hetanu hkochpajyawakapna.

⁶ Seyni hi rukchikatkana Paulo, Silas wale tshinanu ranikluna Jasão tshinkaluru hiyrunu pimrine Hoyakalu halixatshine tsru poktshi chefe-tene nwaka. Wane htshin-sapletna: — Nyi yine psol-tshijneka himtukatshinetka hiyrunu xawakni wkata runna.

⁷ Jasão hislahjetna Paulo, Silas hipjiya. Wanna ptowruneka majnakowjexyalu César hiykole pirana, wale tshiji towutatshri potukni, klu tshinanu wane htshinhimatna: Waneru satuko pohirtshi, Jesus tshinkaluru.

⁸ Waneya rali jemlexinixkaluna tokantshi hixolune yine hiyrunu tsru poktshi towutatshine koxa jihekanuwpotuta.

⁹ Waneya hipokananu ranjitiyirotetluna Jasão hiyrunu pimrine Cristo halixatshine waneya rali wenutlexinixkana ruchotatkana.

Bereia Poktshi Rawyawakna Paulo, Silas Piranapni

¹⁰ Waneya wale yetshno potuko Cristo halixatshine yokanatatkana Paulo, Silas Bereia poktshi nwaka. Wane rapojinixkana, judeu-ne hanjihohnewaklepji hyanna.

¹¹ Wane hajene Tessalônica hajene yohnika himatkaleruni hiyrunu ruslahpotutluna tokantshi. Ptowru hohnekaka ruchtotatna Hoyakalu pirana yonatkaluru rimaxyawakapluna ho halikaklahe xye pirana ho hike.

¹² Hiyáhoni híxona judeu-ne halixa, hixolune grego-nerune halixlu, suxone grego-nerone chefe-tene koxa halixlu.

¹³ Seyni Tessalônica hajene judeu-ne himaxinixka Paulo hinkakletlu Hoyakalu pirana Bereia poktshiya wane koxa hyanna wanna hkojwakahchinikanuxyawakna Bereia hajene.

¹⁴ Hiyáhoni Cristo halixatshine chinpotu yokanatatkalu Paulo mar powha sreta hyiywakapa. Seyni Silas, Timóteo koxa Bereia poktshi hituka.

¹⁵ Paulo hanikjene himotsatlu haté Atenas poktshi. Wane pnute Bereia poktshi hsatkapna, Paulo tokanu ranikanwakatna Silas, Timóteo. Wane htshina: Punanwakatanno chinpotukawa.

Paulo Hinkakle Pirana Atenas Poktshiya Piranapni

¹⁶ Waneya Silas, Timóteo hkahwakka pchinika Paulo Atenas poktshiya, hkojwakahchinikanutatka klu tshinanu retlu wale poktshi katseplu mayawletshicha.

¹⁷ Waneya Paulo hiynumsatna judeu-ne hiyrunu judeu mixkane kahchinikanurune hanjihohnewakapjiya. Hiyrun-koxa ptowru hohneruka riynumsatna yine hichanrewawakaya.

¹⁸ Satkaka hijha himatkaletatshri epicureus tshinkalune hiyrunu estoicos tshinkalune ruhjekakna Paulo-yma. Repomhana: — Klu raluka tshinreta xye kyanumsakleru? Pimrine hihitlu: — Hatatjewa runkaklewyehitlu hoyakalune mimathetkone. Wane htshinna klu tshinanu Paulo hinkakletlu kihler-potuko tokantshi hiwekkaklewatatshri Jesus hiyrunu riwejinixnaka pirana.

¹⁹ Waneya ranikluna Paulo Areópagos hapatjere nwaka. Waneya wane htshinna: — Wuya puhle hinkakletanwu xye herotu chinikantshi pasrukjexyawu.

²⁰ Xye punkakle herotutkani hixaya. Waluk-himatjemletlu.

²¹ Atenas hajene ptowruneka haté pnute hajen-koxa hasruha jemletlu herotu pirankaka.

²² Waneya Paulo yopkaka Areópagos hapatjere hanikajite. Wane htshina: — Jejine Atenas hajene, psoluyaka nethi hixa ptowruka himalwuta hyoptsojityehita.

²³ Klu tshinanu poktshi niknohamxini nethi kluneru hyoptsojityehita hixa. Netlu satu henekachalu hitajikowaka, wane htshina yonreta: “HOYAKALU MIMATHETKOTU TSHINANU”. Hixa yoptsojityehitlu satu hoyakalumka seyni hi himatyehitlu hixa. Xyekni Hoyakalu potu nunkajyahi.

²⁴ Psol-tshijneko hkamha haté ptowruka xye tshijne hajeru hkamha Hoyakalu. Tenhohne tshij-koxa Hitsrukatni wale. Hi rujhalu pantshi yine kamhaleru rawyawakapa.

²⁵ Xye Hoyakalu honra yine hiwejinri heneklewatatshri, hinnipha heneklewatatshri hiyrunu yine halukleru heneklewatatshri. Hi rujhalu repixikowaka yineya. Rimwalu ptowru rujhaleru.

²⁶ Hyinuwajikolu Hoyakalu kamhalu satu jeji. Waleko ruchpajyatka ptowru nerkaka xye psol-tshijne rawyawakna. Klu tshinanu Hoyakaluko henekpapkolutna riwejyawakna hiyrunu renekna rawyawakna.

²⁷ Hoyakalu rujhiywakapna pa katako ptowruchaka rujhinri rukchikanruna. Klu tshinanu hi howuklu Hoyakalu hixa satkaka tshinanuya.

²⁸ Klu tshinanu wale wiwejya, waleymatkawu. Satkaka hixa hinkakjene wan-tshina: “Hixa Hoyakalu whenenwu.”

²⁹ Hoyakalu whenene wixyawaka tshinanu hi wkahwakanru yine kamhaleru mayawletshicha ouro kamhikolu, prata kamhikolu, sotlu kamhikolu Hoyakalu rixyawaka.

³⁰ Mitshikawni yine hi himathetlu Hoyakalu hiyáhoni retachakanatna yine. Seyni xawakni Hoyakalu ptowru yineru hinkaka rehchinikanuxyawakapa.

³¹ Hiyáhoni Hoyakalu hitaklu wale hohne psol-tshijneka rapnokaxikolupa hpotuknuyma. Mitshikawako Hoyakalu nuretlu satu jeji xye kamrurtshi hkamhiywakapa. Hiyáhoni Hoyakalu ptowru yineru rekhita hnurreruko rixyawaka klu tshinanu Hoyakalu yotunkaklu hipuktshiya.

Satkaka Hitsluhitatlu Satkaka Halixyawaklu Piranapni

³² Waneya hjeminixkana yine hipnatshine hiwejyawakpatnaka pirana satkaka heyikpiranatlu. Satkaka wan-tshina: — Pa hohnepa wjemanutnaklu xye pirana.

³³ Waneya wale papko Paulo wane hichpajya.

³⁴ Seyni satkaka yine halixlu Paulo hiyáhoni rimotsatluna. Satu halixatshri hiwakni Dionísio, wale Areópagos hajerni. Hiyrun-koxa sato suxo Dâmaris hiwakatletatshro halixlu hiyrunu pimrin-koxa halixlu.