Atos 15 - Bíblia

Ruhjekakle Judeu Mixkane Tshinanu Piranapni

¹ Waneya pimrine jejine Judeia hichpajikatshine Antioquia poktshi hapoka. Wanna yinuwaka hasrukletna Cristo halixatshine wane htshinna: — Hma mustakakjixkanuklunru hiptojimta Moisés yokanatanru tshinyawaka hixa hi himukata hiwekkakletko.

² Seyni Paulo, Barnabé koxa hi hikchikhihlenutlu rasruklewaxyawakna hiyáhoni ruhjekakna repomsakakna. Hiyáhoni rutakluna Paulo, Barnabé hiyrunu pimrine tsrukakalune Jerusalém hyiywakapna riynumsaxikowakapna nuretkalune hiyrunu Cristo halixatshine hapatjetatshine kosekatshine xye hepomsalu tshinanu.

³ Cristo halixatshine hapatjetatshine Antioquia hwatshine hepixa yokanrexyawakna waneya Fenícia tshijne Samaria tshijne koxa hyapamxiniklunna wane hajene runkakna judeu mixkane halixyawaka pirana. Hiyáhoni Cristo halixatshine ptowruneka poyikowamta.

⁴ Waneya Jerusalém rapojinixkana, Cristo halixatshine hapatjetatshine yoptotna, nuretkalune yoptotna hiyrunu Cristo halixatshine kosekatshine koxa yoptotna. Wane pnute runkaklewatna ptowru pirana Hoyakalu kamrurewaxyawaka wanna tshinanu.

⁵ Seyni satkaka fariseu-ne halixatshinetka yopkaka, hyanumatna: — Judeu mixkane haluk-jiprojhaptojimtaleta hiyrunu Moisés yonreru koxa romkahitanna.

Nuretkalune Hiyrunu Tsrukakalune Hapatjeta Jerusalém Poktshiya Piranapni

⁶ Hiyáhoni rapatjetatkana nuretkalune Cristo halixatshine kosekatshine koxa xye hepomsalu tshinanu.

⁷ Repomsakakna waneya howukchini hpalnatka Pedro, wane htshinna: — Nomolene, hixa himatlu mitshikawa Hoyakalu nurexyano hixa tskalaya kihle piranalu potuko hiwekkaklewatatshri pirana nunkaklexyawakapna judeu mixkane wanna koxa himukata yijnakoletlu, ralixyawakapluna.

⁸ Hoyakalu, ptowru yineru hchinikanu himathetatshri, hekhitlu hyoptoxyawakatkana judeu mixkane klu tshinanu renekatkana Hoyakalu Hiwejikaluru hixa pixka.

⁹ Hoyakalu hetanuya pixkakaklunwu hixa, wanna. Ralixlena tshinanu hpowrathajitna.

¹⁰ Ha xawakni, haklu tshinanhe hyahotlu Hoyakalu judeu mixkane Cristo halixatshine hoho hitajyawaklu xye hinolu. Hi wutsrukatenniko himukata hakotletlu xye hinolu, hix-koxa hi hakotatkalu.

¹¹ Seyni Tsru Hixikatshriwa Jesus walixyawaklu tshinanu wiwekkakka ruhlenu renekachale tshinanu, wanna pixka hchinikannu tshinanu.

Tiago Hiykole Piranapni

¹² Waneya potshketkana hixolune yine hapatjetatshine. Hyijnakotluna Paulo, Barnabé runkaklewaxyawakna ptowru hixatshri hetkalurkaka hiyrunu himyekaklewatatshrikaka Hoyakalu kamhiywakna judeu mixkane wannamyoya.

¹³ Waneya rali yanumletatkana Tiago wan-tshina: — Nomolene, hyijnakotanno:

¹⁴ Xawakni potuko Simão hinkakatkawu hanu rixa hepixletna Hoyakalu judeu mixkane mitshikananu klu tshinanu satkaka wanna tskalaya hnuretatka rayinetene rixyawakpatkana.

¹⁵ Waneko pixka rixtokanutna Hoyakalu tokanu hinkakletatshine mnukawa, wan-rixa yonretka:

¹⁶ “Xye hiknohinpatka, nsatokanutnaka Davi-pji yawnatshri nuhletanutnaka. Napatjetanru hiknajrotatshri waneya nkamhapjitanutnaka.

¹⁷ Waneya pa nerkaka himukata hapohchinikanretanru Tsru Hixikatshriwa Hoyakalu haté judeu mixkane ptowruneka nhiwaka hitakatshine,

¹⁸ htshina Tsru Hixikatshriwa Hoyakalu, xye ptowruka kamhatshri. Xye tshijne yinuwajinikananuko rimatakanatatka Hoyakalu kamrure tshinanu.”

¹⁹ Waneya Tiago pnute hya hinkakletatka: — Wane ntshina hita, hi wkojwakanna judeu mixkane Hoyakalu halixatshinepni.

²⁰ Seyni halikaka wyonanwakatanna yonawahlo wan-tshinatshri: Hi hnikanru mayawletshicha henekkaluru nikalhitu, hi koxa hapoklewatanu, hi hnikanru hichrikaplaluru hituko, hi hihrahako hnikanu.

²¹ Klu tshinanu mitshikawakananuko Moisés hiykole pirana hinkakletkatka pa poktshikakaya hiyrunu haté xawakni ptowru hapnanuxikalur-hohne runkakletka pa hanjihohnewakapjikakaya.

Ruhixikolu Hyokananwakatluna Antioquia Piranapni

²² Hiyáhoni nuretkalune, Cristo halixatshine hapatjetatshine kosekatshineyma hiyrunu halixatshineymakananuko hnuretna satkaka jejine wannaya hyokanaxikolupna Antioquia Paulo, Barnabé-yma. Waneya hnuretna Judas, Barsabás hiwakatletatshri hiyrunu Silas. Cristo halixatshine ptowruneka kahwakpirpotutna nyi yine.

²³ Waneya sato yonawahlo hyokananwakatna Antioquia Cristo halixatshine, wane ttshina: “Hixa nuretkalunwu, Cristo halixatshine hapatjetatshine kosekatshinwu hiyrunu Cristo halixatshine ptowrunekwu halikanhi hixa wimolene judeu mixkane Antioquia hwatshine, Síria tshijne hwatshine, Cilícia tshijne hwatshine koxa.

²⁴ Wjempiranyehitna pimrine hix-yehi hichpajikatshine wane hapkapa hkojwakahchinikanuxyawakhi tokantshi tshinanu. Seyni hi wyokanatna.

²⁵ Hiyáhoni hixa ptowrunekwu wukchikhihlenutlu satkaka jejine wyokananwakaxyawakaphi wimatletleneyma Paulo, Barnabé.

²⁶ Nyi jejine henejnawa riwejinrina Jesus Cristo hiwaka tshinanu.

²⁷ Wale tshinanu wyokananwakathi Judas hiyrunu Silas. Wanna koxa hinkakanhi ptowruko wyonatanru pirana.

²⁸ Klu tshinanu Hoyakalu Hiwejikaluru hiyrunu hix-koxa hikchikhihlenutlu xye hinolu hma manijyawakanupna seyni xye tsonu rimretpotutanna:

²⁹ Hi hnikanru mayawletshicha henekkaluru nikalhitu, hi hihrahako, hi hichrikaplaluru hituko hnikanu. Hi hapoklewatanu. Xye ptowruka hma kamhaknuklunru kihlephi hixa. Seyoka.”

Ruhixikolu Hethaxikowaka Piranapni

³⁰ Waneya hyokanatatkana, Antioquia rapokna. Rapatjexinixkana Cristo halixatshine hapatjetatshine renekatkana yonawahlo.

³¹ Rethaxinixkalona yonawahlo hpoyikowamtna hkojirexikoluna pirana tshinanu.

³² Judas hiyrunu Silas, Hoyakalu tokanu hinkakletatshine rixkal-tshinanu, runkakna halixatshine hixo hiykolu pirana hiyáhoni hmixkowahchinikankakatkana halixatshine.

³³ Pchini tsonu wan-rutukna Judas hiyrunu Silas waneya Cristo halixatshine yokanatatkana kihle hchinikanurune nuretkalune hyokanatjerna yehi hyiywakapna.

³⁴ Seyni Silas wane haluk-hitukleta pchini tsonu.

³⁵ Seyni Paulo hiyrunu Barnabé Antioquia hituka, Hoyakalu tokanu rasrukjetna, runkaklewjetna Antioquia hajene halixatshineyma.

³⁶ Pa hohnetkani Paulo wan-tshinru Barnabé: — Wuya wsatokanu wapyehixyawakapna wimolene ptowru poktshikak-hajene Hoyakalu pirana wunkakanune mnukawa, hiyrunu wetanna hanu rixna wanna.

³⁷ Seyni Barnabé haluk-haniklet-koxlu João Marcos tshinkaluru.

³⁸ Seyni Paulo hi haluk-hanikletlu João Marcos, klu tshinanu ruchotna Panfília yehiya, hiyrunu hi repiretna kamrurtshiya.

³⁹ Htshihetjerewle tshinanu rutspalakajyana. Waneya Barnabé haniklu João Marcos Chipre tshijne nwaka hyahap-hatna.

⁴⁰ Seyni Paulo nuretlu Silas hiyáhoni hyatkana. Antioquia hajene Cristo halixatshine heneklu Paulo Hoyakalu hislahlewleya.

⁴¹ Waneya Paulo Síria tshijne hiyrunu Cilícia tshijne hyapamta Cristo halixatshine hapatjetatshine xkehkaka hmixkotahchinikanuxyawakapna.